މުއިއްޒުގެ ދޮންމަމާފުޅާއި ގުޅޭގޮތުން އަދަދު ނޫހުން ގެނެސްދިން ޑޮކިއުމެންޓްރީގައި ދެއްކީ ތެދުވާހަކަތަކެއް ކަމަށް މުއިއްޒުގެ ދޮންމަންމާފުޅު ވިދާޅުވެއްޖެ
29 ސެޕްޓެމްބަރު 2023 | ހުކުރު 09:28އިއްދައިގައި އިންދާ ގަދަބާރުން ކޯޓަށް ގެންދިޔަ
ޑރ. މުހައްމަދު މުއިއްޒުގެ ދޮންމަންމާފުޅު ރާއްޖެޓީވީއަށް ދެއްވި އިންޓަރވިއު
އިދިކޮޅު ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުގެ ދޮންމަންމާފުޅު، ޖީ ސްކީލާން ހުސެއިން އާއި ގުޅޭގޮތުން އަދަދުން ގެނެސްދިން އިންޓަރވިއުގައި ދެއްކީ ތެދުވާހަކަތަކެއް ކަމަށް މުއިއްޒުގެ ދޮންމަންމާފުޅު ވިދާޅުވެއްޖެއެވެ.
އަދަދުން ގެނެސްދިން ޑޮކިއުމެންޓްރީގައި ޖީ ސްކީލާން ހުސެއިން ދެއްކެވި ވާހަކަތަކާއި ގުޅިގެން ތަފާތު އެކި ވާހަކަތައް ދައްކާ އެއީ ދޮގެއްކަމަށް ބުނަމުން ދަނިކޮށް، ހުކުރު ދުވަހު ރާއްޖެޓީވީއަށް ދެއްވި އިންޓަރވިއުގައި ސްކީލާން ވިދާޅުވީ، މުއިއްޒު އޭނާއާއި ދޭތެރެގައި ކަންކުރި ގޮތުގެ ވާހަކަ ދައްކަން އެއްވެސް މީހަކު ފައިސާ ދީފައި ނުވާ ކަމަށެވެ. އަދި އެ ވާހަކަތަކީ ހަގީގަތް ކަމަށެވެ.
އޭނާ ވިދާޅުވީ އިންޓަރވިއު ދިނުމަށް ދުވަހަކުވެސް ފައިސާއެއް ލިބިވަޑައިނުގަންނަވާ ކަމަށެވެ. އަދި ރާއްޖެ ޓީވީއަށް ދެއްވި އިންޓަވިއުއަކީ، މުއިއްޒުއަކީ ކިހާވަރެއްގެ މީހެއްކަން ދުނިޔެއަށް ދައްކާލުމަށް ލިބިވަޑައިގެންނެވި ރަނގަޅު ފުރުސަތެއް ކަމަށެވެ.
އާންމުވި އިންޓަވިއުއަށްފަހު މުއިއްޒު އޭނާގެ މަރުޙޫމް ބައްޕާފުޅުގެ މުދަލުގެ ތެރެއިން، ލަންކާގައި ހުރި ފްލެޓާއި ގޯތި ސްކީލާންއަށް ދެއްވާފައިވާކަމުގެ ޚަބަރުތައް ދައުރުވަމުންދިއުމާއި ގުޅިގެން އެއީ ތެދެއްތޯ އަދި މުއިއްޒު ބައްޕާފުޅުގެ މުދަލުން ހާލާލު ބައިން ކިހާވަރެއް ލިބިފައިވޭތޯ ސުވާލުދެންނެވުމުން އޭނާ ވިދާޅުވީ މުއިއްޒު ބައްޕަގެ އެއްވެސް ބިމެއް ލަންކާގައި ނެތް ކަމަށެވެ. ލަންކާގައި އޮތީ އޭނާގެ އަމިއްލަފުޅު ބިމެއް ކަމަށާއި، މުއިއްޒު ބައްޕަގެ ބޭންކް އެކައުންޓުގައި 1.5 މިލިއަން ރުފިޔާ ހުރި ކަމަށެވެ.
ވިސާ އައުކުރުމުގެ ވާހަކަ މުއިއްޒު އަރިހުގައި އެއްގޮތަކަށް ވެސް ދެންނެވުނުތޯ އަދި ރާއްޖެއިން ވަޑައިގެންނެވުމަށްފަހު، މުއިއްޒު އާއި އެއްވެސް ގުޅުމެއް އޮންނެވިތޯ ސުވާލުދެންނެވުމުން ސްކީލާން ވިދާޅުވީ ލަންކާއަށް ވަޑައިގެންނެވި ފަހުން މުއިއްޒުއާއި އެއްވެސް ގުޅުމެއް ނެތް ކަމަށެވެ. ހުރިހާ މެސެޖަކާއި ފޯން ކޯލެއް ބްލޮކްކޮށްފައިވާ ކަމަށާއި، މުއިއްޒުއާއި ގުޅައިގެން މައްސަލަތަކުގެ ވާހަކަ ދައްކަވާނެ ގޮތެއްނެތް ކަމަށެވެ. އެއީ ހަގީގަތް ކަމަށާއި، ލަންކާއަށް ވަޑައިގެން ދުވަހުން ފެށިގެން އޭނާއަށް މެސެޖުންނާއި ފޯނު ކޯލު ކުރައްވަން މަސައްކަތްކުރެއްވި ނަމަވެސް އޭނާ ޖަވާބެއް ނުދެއްވާ ހުރިހާ މަގެއް ބަންދުކުރެއްވި ކަމަށެވެ.
ސްކީލާން ވިދާޅުވީ އޭނާ ދެން ދައްކަވާނެ ވާހަކައެއް ނެތް ކަމަށާއި، މުއިއްޒު ޒިންމާ ނުނެންގެވި ކަމަށެވެ. އަދި ކޮންމެ މަހަކު ފައިސާ ފޮނުއްވާނެ ކަމަށް ކޯޓުގައި މުއިއްޒު ވިދާޅުވި ނަމަވެސް އެންމެ ރުފިޔާއެއްވެސް އޭނާ ނުފޮނުއްވާ ކަމަށެވެ. އަދި އިއްދައިގައި އިންނަވަނިކޮށް ކޯޓަށް ވަޑައިގަންނަވާން ދެކޮޅު ހެއްދެވުމުން ގަދަބާރުން ކޯޓަށް ގެންދެވި ކަމަށާއި، އެކަމާ ވަރަށް ދެރަވެވަޑައިގަންނަވާ ކަމަށެވެ.
