އިންތިޚާބުގެ ފުރަތަމަ ބުރުގައި ދިމާވި ކަންކަން ދެވަނަ ބުރަށް ވާނީ ހައްލުކޮށްފައި - ޚުޒައިމާ
29 ސެޕްޓެމްބަރު 2023 | ހުކުރު 07:5812 ފޮށި އިތުރުކުރެވިފައިވޭ
އިލެކްޝަންސް ކޮމިޝަންގެ ޑެޕިއުޓީ ޑިރެކްޓަރ އޮފް ޕޮލިޓިކަލް ޕާޓީ އެންޑް ރެގިއުލޭޝަންސް، ޚުޒައިމާ ތައުފީގު
ސެޕްޓެމްބަރު މަހުގެ 9 ވަނަ ދުވަހު ބޭއްވި ރިޔާސީ އިންތިޚާބުގެ ފުރަތަމަ ބުރުގައި ދިމާވި ކަންކަން ފާހަގަކޮށް، ދެވަނަ ބުރު ބާއްވާއިރު އެކަންކަން ހައްލުކުރެވިފައިވާނެކަމަށް އިލެކްޝަންސް ކޮމިޝަންގެ ޑެޕިއުޓީ ޑިރެކްޓަރ އޮފް ޕޮލިޓިކަލް ޕާޓީ އެންޑް ރެގިއުލޭޝަންސް، ޚުޒައިމާ ތައުފީޤު ވިދާޅުވެއްޖެއެވެ.
ރާއްޖެޓީވީގެ ފަސްކާފު ޕްރޮގްރާމުގައި ވާހަކަފުޅު ދައްކަވަމުން ޚުޒައިމާ ވިދާޅުވީ ފުރަތަމަ ބުރުގެ ކަންކަން ނިމިގެންދިޔައީ އުއްމީދުކުރިވަރަށްވުރެ ރަނގަޅަށް ކަމަށެވެ. ދެވަނަ ބުރަށް ވެސް އުއްމީދުކުރަނީ އެގޮތަށް ކަމަށާއި، ފުރަތަމަ ބުރުގައި ފާހަގަކުރެވުނު ކަންތައްތަކުގެ ތެރެއިން ރަނގަޅުކުރަން ޖެހޭ ކަންކަން ބަލާފައިވާނެ ކަމަށެވެ.
އެގޮތުން ތާށިކަން ހުރި މަރުކަޒުތަކާއި، ކިއުގައި ގިނައިރުވި މަރުކަޒުތަކާއި އޮފިޝަލުންގެ މައްސަލަތައްވެސް ހައްލުކޮށްފައިވާ ކަމަށް ވިދާޅުވިއެވެ. މީގެ އިތުރުން ވޯޓު ފޮށިތައް ވެސް އިތުރުކޮށްފައިވާނެ ކަމަށާއި، 1 ފޮށި ހުރިތަނަށް 2 ފޮށި އިތުރުކޮށް 12 މަރުކަޒަކަށް ބަދަލު ގެނެވިފައިވާ ކަމަށާއި މީގެ އިތުރުން ވިލާކޮލެޖުގައި ކުރިން ވޯޓު ފޮއްޓެއް ބެހެއްޓިފައި ނެތް ނަމަވެސް ދެވަނަ ބުރުގައި އެތަނުގައި މަރުކަޒެއް ގާއިމްކޮށްފައިވާ ކަމަށް އޭނާ ވިދާޅުވިއެވެ.
ޚުޒައިމާ ވިދާޅުވީ ރީ-ރަޖިސްޓްރޭޝަންގައި އުއްމީދުކުރިވަރަށްވުރެ ގިނަ ބަޔަކު ރީ-ރަޖިސްޓްރޭޝަނަށް ހުށަހެޅި ކަމަށެވެ. ސަބަބަކީ ބަންދު ދުވަސްތަކެއް އަންނާތީ އަތޮޅުތަކުން މާލެއަށް އަދި މާލެއިން އަތޮޅުތަކަށް ރީ-ރަޖިސްޓްރީވެފައިވާ ކަމަށެވެ.
ނަމަވެސް ގިނަ އަދަދެއްގެ ބަޔަކު ރީ-ރަޖިސްޓްރީކުރަން އެދިފައިވީ ނަމަވެސް ފުރުސަތު ދެވި ފައިނަލް ރަޖިސްޓްރީ އާންމުކޮށް ކޮމިޝަންގެ ފަރާތުން ރަޖިސްޓްރީގައި ސޮއިކޮށް، ކެންޑިޑޭޓުންގެ ފަރާތުން ވެސް ރަޖިސްޓްރީގައި ސޮއިކުރައްވާފައިވާ ކަމަށް ޚުޒައިމާ ވިދާޅުވިއެވެ.
ޚުޒައިމާ ވިދާޅުވީ ބޭރުގައި ބަހައްޓާފައި ފޮށިތަކުގެ ތެރެއިން އިތުރު ފޮއްޓެއް ބަހައްޓާފައިވަނީ އިންޑިއާގައި ކަމަށެވެ. އިންޑިއާގައި މިހާރު 3 ފޮށި ހުންނާނެ ކަމަށާއި، ބޭރު ގައުމުތަކުގެ ފޮށިތަކަށް ވޯޓުލާ ގަޑިއަކީ، މާލެ ގަޑިން ހެނދުނު 8:00ން 5:00ށް ދިމާވާ އެ ގައުމެއްގެ ގަޑިއާ ދިމާވާ ވަގުތާއި ކަމަށެވެ. ނަމަވެސް ބަދަލު އަންނަނީ އެންމެ ގައުމެއްގައި ކަމަށާއި، އެއީ ލަންޑަންގައި ކަމަށް ޚުޒައިމާ ވިދާޅުވިއެވެ.
