17 މިލިއަން ޕައުންޑް ހޯދަން ރޮނާލްޑޯ ޔުވެންޓަސްއާ ދެކޮޅަށް ދައުވާކުރަނީ
29 ސެޕްޓެމްބަރު 2023 | ހުކުރު 00:30މިއީ ކޮވިޑް19ގެ ދަތީގެ ތެރޭގައި ނުނަގައި ފަސްކުރި މުސާރަ
ކްރިސްޓިއާނޯ ރޮނާލްޑޯ ޔުވެންޓަސްގެ ޖާޒީގައި: ކުލަބާ ދެކޮޅަށް ދައުވާކުރާނެ
އޭނާ އަށް ދޭންޖެހޭ ފައިސާ ނުލިބިގެން އިޓަލީގެ ޔުވެންޓަސްއާ ދެކޮޅަށް ކްރިސްޓިއާނޯ ރޮނާލްޑޯ ކުރާ ދައުވާގެ އަޑުއެހުން ފަށަން ތައްޔާރުވެއްޖެ އެވެ.
ދުނިޔޭގެ އެންމެ މުއްސަނދި އެއް ކުޅުންތެރިޔާ އޭނާގެ ކުރީގެ ކުލަބާ ދެކޮޅަށް ދައުވާކުރަނީ 17.5 މިލިއަން ޕައުންޑް ހޯދުމަށެވެ. މިއީ ކޮވިޑް19ގެ ދަތީގެ ތެރޭގައި ނުނަގައި ފަސްކުރި މުސާރަ އެވެ.
އިޓަލީގެ ނޫސްތަކުން ބުނަނީ ކޮވިޑްގެ ތެރޭގައި 2020ވަނަ އަހަރު ޔުވެންޓަސްގެ ކުޅުންތެރިން ވަނީ ގުޅިގެން މުސާރަ ފަސްކުރަން އެއްބަސްވެފަ އެވެ. ނަމަވެސް އެއީ ފަހުން މުސާރަ ދޭގޮތަށެވެ. މާލީ ދަތިތަކުގެ ސަބަބުން ޔުވެންޓަސްއިން ވަނީ ޖެހިގެން އައި އަހަރު ވެސް ކުޅުންތެރިންނާއި ވަކިވަކިން ވާހަކަ ދައްކައި މުސާރަތައް ފަސްކޮށްފަ އެވެ.
ސައޫދީ ޕްރޯ ލީގުގައި މިހާރު ކުޅެމުން އަންނަ ރޮނާލްޑޯ ނިންމާފައިވަނީ އޭނާ އަށް ދޭންޖެހޭ ފައިސާ ހޯދުމަށް ކޯޓަށް ދިއުމަށެވެ. މިކަމަށްޓަކައި އޭނާ ވަނީ ބޭނުންވާ ލިޔެކިއުންތައް ހޯދައިދިނުމަށް އިޓަލީގެ ޕަބްލިކް ޕްރޮސެކިއުޓަރުގެ އޮފީހުގައި އެދިފަ އެވެ.
ރެއާލް މެޑްރިޑަށް ކުޅުމަށްފަހު ޔުވެންޓަސްއަށް ބަދަލުވެ، ރޮނާލްޑޯ ވަނީ އެކުލަބަށް ތިން ސީޒަނުގައި ކުޅެދީފަ އެވެ. އަދި 134 މެޗުން 101 ގޯލު ޖަހައިދިނެވެ. އޭނާ 2021 ވަނަ އަހަރު ކުލަބު ދޫކޮށްލީ ކުރީގެ ކުލަބު މެންޗެސްޓާ ޔުނައިޓެޑަށް ބަދަލުވުމަށެވެ.
ޔުވެންޓަސްއާ ދެކޮޅަށް މުސާރައިގެ މައްސަލާގައި އެކުލަބުގެ ކުރީގެ އެހެން ބައެއް ކުޅުންތެރިން ވެސް ދަނީ ދައުވާކުރަން ތައްޔާރުވަމުންނެވެ.
