ޔާމީން ދޫކޮށްލެެވެން ނެތްކަމަށް ދެއްކޭނެ ގާނޫނީ ކަންތައްތަކެއް އެބަހުރިކަމަށް ކުރީގެ ރައީސް އަބްދުﷲ ޔާމީން އެންޑޯޒްކުރެއްވި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުކަމަށް ބެލެވޭ ބޭފުޅަކު ދެއްކެވި ވާހަކަފުޅުތަކެއްގެ އޯޑިއޯއެއް ލީކުކޮށްލައިފިއެވެ.

މި އޮޑިއޯގައި މުއިއްޒު ކަމަށް ބެލެވޭ ބޭފުޅަކު ވިދާޅުވަނީ އޮތްގޮތަކީ މިވަގުތު ރައީސް ޔާމީން މިނިވަންކުރުމުގެ ކަންކަން މަޑުޖައްސާލާފައި އޭގެ ފަހުން ރައްޔިތުންގެ މަޖިލީހުގެ އިންތިހާބުން ބޭނުންވާ ކެންޑިޑޭޓުން ފީލްޑްކޮށްގެން އެ އިންތިހާބުގައި ނުކުންނަ ނަތީޖާއަކަށްފަހުގައި އެކަންކަން (ޔާމީން ދޫކޮށްލުމުގެ ކަންކަން) ކުރުމަށް ވަނީ އެދިވަޑައިގަންނަވާފައެވެ.

މި އޯޑިއޯގައި ޔާމީން މިނިވަންކުރުން ލަސްކުރަންވީ ބައިވަރު ސަބަބުތަކެއް ވެސް ދެއްކިދާނެ ކަމަށާއި، އެގޮތުން މިހާރު ގާނޫނު އޮތްގޮތުން ބެއިލްގެ ނިޒާމު ނެތުމާއި، އިތުރު ކަންތައްތަކާއި، އަދި ސަރުކާރާއި ހަވާލުވީ ކަމުގައިވިޔަސް މަޖިލީހުގެ މެޖޯރިޓީ ނެތުމުން، އެ ބިލު (ބެއިލްގެ ބިލު) ފާސް ނުވަނީސް ގާނޫނީ ގޮތުން ނުވާނެ ކަމާއި، ގާނޫނީ ގޮތުން ތަފާތު ސަބަބުތަކެއް ދެއްކިދާނެކަމަށް ވިދާޅުވެއެވެ.

ވެރިކަން ލިބިވަޑައިގެންފިނަމަ، މާލެ ރައްޔިތުންނަށް ދީފައި ހުރި ގޯތިތައް ފުށިދިއްގަރު ފަޅަށް ބަދަލުކުރައްވާނެކަމަށް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ވިދާޅުވާ ކަމަށް ބުނާ އޯޑިއޯއެއްވެސް މީގެ ކުރިން ވަނީ ލީކުކޮށްލާފައެވެ.

އެއިރު ލީކުވެފައިވާ އޯޑިއޯގައި މުއިއްޒު ވިދާޅުވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ދީފައިވާ ގޯތިތައް މިހާރު ދީފައި ހުރި ސަރަހައްދުތަކުން ބަދަލުކޮށް ފުށިދިއްގަރު ފަޅަށް ބަދަލުކުރުމުގެ ޕްރޮޖެކްޓެއް އިއުލާންކުރައްވާނެ ކަމަށެވެ.

ޔާމީން މިނިވަން ނުކުރާނެކަމަށް ދެކެވޭ ވާހަކައިގެ އޯޑިއޯއާއި ގުޅިގެން މުއިއްޒު ވަނީ އެއީ ދޮގެއް ކަމަށް ވިދާޅުވެފައެވެ.