ޑޮލަރުގެ މައްސަލައަށް ރައީސްގެ ދެ ހައްލެއް، އެންމެ ރަނގަޅު ހައްލު އަންނަ އަހަރު ތަންފީޒުކުރަން ފަށާ ޑޮލަރު ބޭނުންވަރަކަށް ލިބެން ފަށާނެ

ޑޮލަރުގެ މައްސަލަ ހައްލު ކުރުމަށް ރައީސް އިބްރާހިމް މުޙައްމަދު ޞާލިހު ދެ ހައްލެއް ހުށަހަޅުއްވައި އެންމެ ރަނގަޅު ހައްލު އަންނަ އަހަރު ތަންފީޒުކުރަން ފަށާނެކަމަށާ އޭރުން ޑޮލަރު ބޭނުންވަރަކަށް ލިބެން ފަށާނެ ކަމަށް ރައީސް ވިދާޅުވެއްޖެއެވެ.

ރައީސް ވިދާޅުވީ ރާއްޖޭގެ ވިޔަފާރިވެރިންނާއި، އާންމުންނަށް ކުރިމަތިވެފައިވާ ޑޮލަރުގެ މައްސަލައަށް ހައްލެއް ހޯދައިދިނުމަށް ވިޔަފާރިވެރިންނާއި އާންމުން އެދެމުންދާ ކަމަށެވެ. އަދި މެނިފެސްޓޯގައި ކުރިއަށް އޮތް ދައުރުގައި އެކަމަށް ހައްލު ގެނައުމަށް ކަންކުރައްވާނެ ގޮތް ހިމަނުއްވާފައިވާނެ ކަމަށެވެ.

ރައީސް ވިދާޅުވީ ރާއްޖޭގެ އިގްތިސާދު ދެގުނަކޮށް، 82 ބިލިއަން ރުފިޔާއިން 170 ބިލިއަން ރުފިޔާއަށް ރާއްޖޭގެ އިގްތިސާދު އިތުރުވެގެންދާނެ ކަމަށެވެ. މީގެ އިތުރުން ކުރިއަށް އޮތް ފަސް އަހަރު ނިމޭއިރުގައި ރާއްޖޭގެ އިގްތިސާދުގެ ދެގުނަވާނެ ކަމަށް ވިދާޅުވެފައި ވެއެވެ. މީގެ ތެރެއިން ބޮޑުބަޔަކީ ޑޮލަރު ކަމަށާއި، އެއީ ޑޮލަރުން ވަންނަ އާމްދަނީ އިތުރުވެގެންދިއުން ކަމަށް ރައީސް ވިދާޅުވިއެވެ.

ރައީސް ވިދާޅުވީ މިއާއެކު ރާއްޖޭގެ ރައްޔިތުން ބޭނުންވާ ވަރަށް ބޭންކުތަކުން ޑޮލަރު ހިފެހެއްޓޭނެ ކަމަށެވެ. އަދި މި މަސައްކަތް ޓޫރިސްޓް އިންޑަސްޓްރީގައި އުޅުއްވާ ބޭފުޅުންނާއެކީގައި މަޝްވަރާ ކުރެވުނު ކަމަށެވެ.

ރައީސް ވިދާޅުވީ ދެވަނަ އޮޕްޝަނަކަށް ވާހަކަދެކެވުނީ ރާއްޖެއަށް އެތެރެވާ ޑޮލަރުގެ ވަކި އިންސައްތައެއް ރާއްޖޭގައި ހިފެހެއްޓުން ކަމަށެވެ. 30 އިންސައްތަ ނަމަވެސް ވަކި މުއްދަތަކަށް ރާއްޖޭގައި ބަހައްޓަންޖެހުން ކަމަށާއި، އެކަމަށް ގާތްގަނޑަކަށް އެއްބަސްވުމަކަށް އާދެވުނު ކަމަށް ރައީސް ވިދާޅުވިއެވެ.

ރައީސް ވިދާޅުވީ ކުރިއަށް އޮތް ދައުރުގައި، އިންތިހާބުވުމަށްފަހުގައި އަހަރު ދުވަހުގެ ތެރޭގައި ޑޮލަރާއި ގުޅޭ ކޮންމެވެސް އެއް ސިޔާސަތެއް ތަންފީޒުކުރަން ފައްޓަވާނެ ކަމަށެވެ. އެއާއެކު ރައްޔިތުންނަށް ދަތިވެގެން އުޅޭ ޑޮލަރުގެ މައްސަލައަށް ދާއިމީ ހައްލެއް ލިބިގެންދާނެ ކަމަށެވެ.

ރައީސް ވިދާޅުވީ މާލޭގައި ހުންނަ ޑޮލަރު އޭޓީއެމްއިން ޑޮލަރު ނެގޭ އުސޫލުން އައްޑޫ ސިޓީންވެސް އެކަން ކުރެވުމަކީ ރަށުގެ ޒުވާނުންނާއި، އާންމުންނާއި ވިޔަފާރިވެރިން އެދޭ އެދުމެއް ކަމަށެވެ. އަދި ބީއެމްއެލްއާއެކު މަޝްވަރާކޮށް އޭޓީއެމް މެދުވެރިކޮށް އައްޑޫއިން އެކަން ކުރެވޭނެ ގޮތް ހަމަޖައްސަވައިދެއްވާނެ ކަމަށް ވިދާޅުވެފައި ވެއެވެ.