ރައީސް އައްޑޫއަށް ވަޑައިގެންފި
27 ސެޕްޓެމްބަރު 2023 | ބުދަ 01:55ރައީސް އެމްޑީޕީގެ ކެމްޕޭން ޓީމުތަކާއި ބައްދަލުކުރައްވާނެ
ރައީސް ސާލިހު އައްޑޫސިޓީޢަށް ފުރާވަޑައިގަތުން
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކެމްޕޭނަށް އައްޑޫސިޓީއަށް ވަޑައިގެންފިއެވެ.
އެމަނިކުފާނު އައްޑޫސިޓީއަށް ވަޑައިގެންނެވީ އަންގާރަ ދުވަހުގެ ރޭ ދަންވަރުގެ ވަގުތެއްގައެވެ.
ރައީސްގެ މި ދަތުރުފުޅުގެ ތެރެއިން ބުދަ ދުވަހު ރައީސް އެމްޑީޕީގެ ކެމްޕޭން ޓީމުތަކާއި ބައްދަލުކުރެއްވުމަށް ވަނީ ނިންމާފައެވެ.
މީގެއިތުރުން އައްޑޫ ސިޓީގެ ދަތުރުފުޅު ނިންމަވާލެއްވުމަށްފަހު، ރައީސް ފުވައްމުލަކު ސިޓީ އާއި ގދ. ތިނަދޫއަށް ވެސް ވަޑައިގަންނަވާނެއެވެ.
ދެވަނަ ބުރުގެ ރިޔާސީ އިންތިޚާބާ ގުޅިގެން ރައީސް ވަނީ މާލޭގައި ޑޯޓުޑޯ ހަރަކާތްތައް ކުރިއަށްގެންދާވާފައެވެ. އެގޮތުން އެމަނިކުފާނު ވަނީ މާފަންނު މެދު ދާއިރާ، މެދު ހެންވޭރު ދާއިރާ، ހެންވޭރު ހުޅަނގު ދާއިރާ، ހެންވޭރު އުތުރު ދާއިރާ، ހެންވޭރު ދެކުނު ދާއިރާގެ އިތުރުން މާފަންނު ހުޅަނގު ދާއިރާގައި ކެމްޕޭން ހަރަކާތްތައް ކުރިއަށް ގެންދަވާފައެވެ.
މިފަހަރުގެ ރިޔާސީ އިންތިޚާބުގެ ފުރަތަމަ ބުރުގައި ރައީސް ސާލިހަށް ލިބިވަޑައިގެންނެވީ ދެވަނައެވެ. އަދި ކުރި ހޯއްދެއްވީ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ. އެކަމާ ގުޅިގެން އެމްޑީޕީން ބުނެފައިވަނީ ކެންޕޭން ކުރުމުގައި ގޯސްތަކެއް ހެދިފައިވާކަމަށެވެ.
އެހެންކަމުން ދެވަނަ ބުރުގެ ކެންޕޭންގައި އެ މައްސަލަތަކަށް ހައްލު ލިބޭގޮތަށް ކެންޕޭންގެ ހަރަކާތްތައް ކުރިއަށް ގެންދާނެކަމަށް އެމްޑީޕީން ބުނެއެވެ. މީގެ އިތުރުން އެމްޑީޕީން ބުނީ ސަރުކާރަށް އަމާޒުކޮށް އިދިކޮޅުން ދައްކާ ވާހަކަތަކަށް ރައްދުދިނުމާއި، ދޮގު ވާހަކަތަކުގެ ހަގީގަތްތައް ރައްޔިތުންނަށް ހާމަކޮށްދޭނެ ކަމަށެވެ.
