ރާއްޖެ ކަޓުވާލާ ނޭޕާލް ސެމީއަށް
25 ސެޕްޓެމްބަރު 2023 | ހޯމަ 13:58ރާއްޖެއަށް ލިބުނީ އެއް ޕޮއިންޓް
ލަނޑުޖެހުމަށްފަހު ނޭޕާލް ކުޅުންތެރިން އުފާފާޅުކުރަނީ: ފޮޓޯ-ސާފް
19 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ ކަޓުވާލުމަށްފަހު ނޭޕާލް ސެމީފައިނަލުން ޖާގަ ހޯދައިފިއެވެ.
ރާއްޖެއަށް ސެމީފައިނަލްގައި ފުރުޞަތު ގެއްލުނު މެޗު ނޭޕާލުން ކާމިޔާބުކުރީ 4-1 ނެވެ. މެޗު އެއްވަރުކޮށްލައިގެންވެސް ސެމީއަށް ދިއުމުގެ ފުރުޞަތު އޮތް މެޗުގެ ފުރަތަމަ ހާފްގައިވެސް ނޭޕާލުން ދެ ލަނޑު ޖަހާ ލީޑެއް ނެގިއެވެ. ފުރަތަމަ ހާފްގައި ނޭޕާލްގެ ދެ ލަނޑު ޖެހީ ޕްރަޝާންތް ލަކްސަމްއާއި, ސާމިރު ތަމަންގއެވެ. ދެވަނަ ހާފް ފަށައިގެން 13 ވަނަ މިނިޓްގައި ރާއްޖެއިން ލަނޑެއް ޖަހާ އުއްމީދު ހޯދިއެވެ. ރާއްޖެއަށް ލަނޑު ޖަހައިދިނީ އާދަމް ލަޔާން ރަޝީދެވެ. އެކަމަކު ރާއްޖެއަށް އިތުރު ފުރުޞަތެއް ނުދީ ނޭޕާލްގެ ނިރާޖަމް ދަމީ 88 ވަނަ މިނިޓްގައި ލަނޑުޖަހާ ލީޑް އަލުން ފުޅާކުރިއެވެ. ނޭޕާލްގެ ހަތަރުވަނަ ލަނޑު އިތުރުވަގުތުގައި ޖެހީ ދެވަނަ ލަނޑުވެސް ޖެހި ސާމިރު ތަމަންގއެވެ. މެޗުގެ ބޮޑުބައި ދެޓީމުންވެސް ކުޅުނީ 10 ކުޅުންތެރިންނާއެކުއެވެ. އެއީ ކުޅުމުން ބޭރުގައި ހިނގި ކަމެއްގައި ރާއްޖޭގެ މުހައްމަދު އިޔާން ހަސަންއާއި, ނޭޕާލްގެ ސުޖަން ޑަންގޯލްއަށް ރަތްކާޑް ދެއްކުމުނެވެ.
ނޭޕާލް ސެމީފައިނަލަށް ދަތުރުކުރީ ރާއްޖެ އަތުން މޮޅުވެގެން ހޯދި ތިން ޕޮއިންޓާއެކުއެވެ. ޕާކިސްތާން އަތުންވީ ބައްޔެވެ. ގްރޫޕްގެ އެއްވަނަ ޕާކިސްތާން ހޯދީ ހަތަރު ޕޮއިންޓާއެކުއެވެ. ރާއްޖެ ނިންމާލީ ޕާކިސްތާން އަތުން ހޯދި ޕޮއިންޓާއެކުއެވެ. ޕާކިސްތާނާ ވާދަކޮށް ރާއްޖެ އެއްވަރުވީ 1-1 ނެވެ. އަނެއް ގްރޫޕުން ސެމީއަށް ދަތުރުކުރީ އިންޑިޔާއާއި ބޫޓާނެވެ.
