ސާފްގެ ޖެނެރަލް ސެކްރެޓަރީއަކަށް ނޭޕާލްގެ ކަޓޭލް

ދެކުނު އޭޝިއާގެ ފުޓްބޯޅައިގެ މައި ޖަމުއިއްޔާ (ސާފް) ގެ ޖެނެރަލް ސެކްރެޓަރީއަކަށް ނޭޕާލްގެ ޕުރުޝޮތަމް ކަޓޭލް ހަމަޖައްސައިފިއެވެ.

ސާފްގެ ޖެނެރަލް ސެކްރެޓަރީގެ މަގާމަށް ކަޓޭލް އައްޔަންކުރީ ލަންކާގައި ބޭއްވި ސާފްގެ އެކްސްޓްރާ އޯޑިނަރީ ކޮންގްރެސްގައިން، ކުރިން އެ މަގާމު ފުރަމުން އައި އަންވަރުން ހައްގު މަގާމުން އިސްތިއުދާ ދެއްވުމުންނެވެ.

އޭޝިޔާގެ ފުޓްބޯޅައިގެ މައި ޖަމާއަތް ކަމަށްވާ (އޭއެފްސީ) ގައި ވެސް މަސައްކަތް ކޮށް 17 އަހަރުގެ ތަޖުރިބާލިބިފައިވާ ކަޓޭލް ވިދާޅުވީ ސާފުގެ ޖެނެރަލް ސެކްރެޓަރީގެ މަގާމު ލިބުމަކީ އޭނާގެ ކެރިއަރުގައި ލިބުނު ވަރަށް ބޮޑު ކުރިއެރުމެއް ކަމަށެވެ. އަދި އެފަދަ މަގާމެއް ލިބުމަކީ އުފާކުރާ ކަމެއް ކަމަށް ވެސް އޭނާ ވިދާޅުވިއެވެ.

ކަޓޭލް ވިދާޅުވީ ކެރިއަރުގައި މިފަދަ މަގާމެއް ލިބުމަކީ އިތުރަށް ކުރިއަށް ދިއުމަށް ލިބުނު ވަރަށް ބޮޑު ފުރުސަތެއް ކަމަށާއި އަދި އެހާމެ ބޮޑު ޗެލެންޖެއް ކަމަށެވެ. އަދި އޭނާގެ ފުޓްބޯޅަ ކެރިއަރު ފެށުނު ފަހުން މިހާތަނަށް މިއީ ދެކުނު އޭޝިޔާއާ ވަރަށް ގާތުން މަސައްކަތް ކުރަމުން ކަމަށާއި އޭޝިއާގެ ރީޖަން އަކީ މިއީ ވަރަށް ޗެލެންޖިން ރީޖަނެއް ކަމަށް ވެސް ކަޓޭލް ވިދާޅުވިއެވެ.

ކަޓޭލް އިތުރަށް ވިދާޅުވީ މި ރީޖަން އަކީ ކުރިއަރަމުން އަންނަ އަދި ފުރުސަތު ފަހި ސަރަހައްދެއް ކަމަށާއި މި ސަރަހައްދުގެ ފުޓްބޯޅައިގެ ކުރިމަގު އޮތީ އުޖާލާކޮށްކަމަށް ވެސް އޭނާ ވިދާޅުވި އެވެ.

އޭނާ ވަނީ ސާފުގެ ރައީސް ބަނގްލަދޭޝްގެ ޢާޒީ ސަލާހުއްދީނަށް ޝުކުރު އަދާކޮށްފަ އެވެ. އެގޮތުން އޭނާ ވިދާޅުވީ ސާފް ގެ ޖެނެރަލް ސެކްރެޓަރީގެ މަގާމު ލިބުމުން ރައީސް ސަލާހުއްދީނާއި ހިންގާ ކޮމިޓީގެ މެމްބަރުންނަށް ޝުކުރު އަދާކުރާ ކަމަށް ކަޓޭލް ވިދާޅުވި އެވެ.

ކަޓޭލްގެ މައިގަނޑު ދާއިރާ އަކީ ހިންގުމުގެ ދާއިރާ ކަމަށް ވާއިރު، ޖެނެރަލް ސެކްރެޓަރީގެ މަގާމުގައި ކަޓޭލްގެ އެންމެ ފުރަތަމަ ބޮޑު މަސައްކަތަކަށް ވަނީ ސްރީލަންކާގައި މި އަހަރުގެ ޖޫން މަހު ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތް ރާވައި ހިންގުމެވެ.