ދެކުނު އޭޝިޔާ ސަރަހައްދުގެ ފުޓުބޯޅަ މުބާރާތް (ސާފް ޗެމްޕިއަންޝިޕް) ފަސް ކުރަން ނިންމައިފި އެވެ.

ކުރިން ރާވާފައި އޮތީ ޖޫން މަހުގެ ތެރޭގައި ސާފް ޗެމްޕިއަންޝިޕް ކުރިއަށް ގެންދިޔުމަށެވެ. އެގޮތުން ޖޫން މަހުގެ 22 ވަނަ ދުވަހުން ފެށިގެން، ޖުލައި މަހުގެ ފަސް ވަނަ ދުވަހަށް ސާފް ޗެމްޕިއަންޝިޕް ކުރިއަށް ގެންދަން އޮތީ ސްރީ ލަންކާގަ އެވެ.

ނަމަވެސް، 2026 ވަނަ އަހަރަށް ސާފް ޗެމްޕިއަންޝިޕް މިހާރު ވަނީ ފަސްކޮށްފަ އެވެ. އަދި އޭގެ ބަދަލުގައި ލަންކާ އިން އިންވިޓޭޝަނަލް މުބާރާތެއް ބާއްވަން މަސައްކަތް ކުރަމުން އަންނަ ކަމަށް ވަނީ މީޑިއާ ތަކުގައި ރިޕޯޓުކޮށްފަ އެވެ.

ސާފްގެ ހިންގާ ކޮމެޓީގައި ހިމެނޭ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ނައިބު ރައީސް އަލީ އުމަރު، "ރާއްޖެ އެމްވީ" އަށް ވިދާޅުވި ގޮތުގައި މުބާރާތް ފަސްކުރަން ޖެހުނީ މިއަހަރުގެ މުބާާރާތް ހޯމް އެންޑް އަވޭ އުސޫލުން ކުރިއަށް ގެންްދެވެން ނެތުމުގެ ސަބަބުން ކަމަށެވެ.

މިއަހަރުގެ މުބާރާތުގެ މާކެޓިން ޕާޓްނަރަކަށް ހަމަޖައްސާފައި ވަނީ ސްޕޯޓްސްފައިވް އެވެ. އެ ކުންފުނިން ބޭނުން ވަނީ މުބާރާތް ހޯމް އެންޑް އަވޭ އުސޫލުން ކުރިއަށް ގެންދިޔުމަށެވެ. އެހެން ނަމަވެސް، މިއަހަރުގެ މުބާރާތް އެ އުސޫލުގެ ދަށުން ކުރިއަށް ގެންދެވެން ނެތީ އެވެ.

މުބާރާތް ފަސްކޮށްފައިވާއިރު، ދެން މުބާރާތް ބާއްވާނެ ތަނެއް ނިންމާނީ ދެން އޮންނަ ސާފްގެ ކޮންގްރެސް އަކުން ކަމަށް މީޑިއާ ތަކުގައި ވަނީ ބުނެފަ އެވެ. ސާފްގެ ކޮންގްރެސް އޮތީ އަންނަ މަހު ނޭޕާލްގަ އެވެ.

ސާފް ޗެމްޕިއަންޝިޕް ފަސް ކުރަން ޖެހުނުއިރު، ލަންކާ އިން އައީ މިއަހަރުގެ މުބާރާތަށް ވަރަށް ބޮޑަށް ތައްޔާރުވަމުންނެވެ. ލަންކާ އިން ވަނީ މީގެ ކުރިން ވެސް އިންވިޓޭޝަނަލް މުބާރާތެއްް ބާއްވައިފަ އެވެ.