ޕީޕީއެމްއަކީ އިންތިޚާބުތަކާ މެދު ޝަކުވާކުރުމުގެ ތާރީޚެއް އޮތް ބައެއްކަމަށް ސްޓެލްކޯގެ މެނޭޖިން ޑިރެކްޓަރު އަދި އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފް ވިދާޅުވެއްޖެއެވެ.

ޝަރީފް އެފަދައިން ވިދާޅުވީ ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުންނެވެ. ޝަރީފް ވިދާޅުވީ ޕީޕީއެމް އަކީ މީގެ ކުރިން ވެސް އިންތިޚާބުތަކާއި ދިމާކޮށް އިންތިޚާބުގެ އެކި ކަންކަމާ މެދު ޝަކުވާކުރަމުންދާ ބައެއް ކަމަށެވެ. ޝަރީފް މިހެން ވިދާޅުވެފައި މި ވަނީ ރިޔާސީ އިންތިޚާބުގެ ދެވަނަ ބުރަށް ގިނަ ބަޔަކު ރީރަޖިސްޓަރ ކުރުމާއި ގުޅިގެން އެއީ ސަރުކާރަށް ރިޔާސީ އިންތިޚާބު ކާމިޔާބުކޮށްދޭން އީސީން ރާވައިގެން ކުރި ކަމެއް ކަމަށް އިދިކޮޅު ފަރާތްތަކުން ތުހުމަތުކުރަމުން ދަނިކޮށެވެ. އިދިކޮޅު ފަރާތްތަކުން ވަނީ ރީރަޖިސްޓްރޭޝަން މަރުހަލާގެ ސައްހަކަމާއި މެދު ސުވާލު އުފައްދާފައެވެ.

އިދިކޮޅުގެ އެ ވާހަކަތަކަށް އިޝާރާތްކުރައްވާ ޝަރީފް ވިދާޅުވީ ރީރަޖިސްޓްރޭޝަން މަރުހަލާ އަކީ އެކަނި އެންމެ ފަރުދަކު ނިންމާ ނިންމުމެއްގެ މައްޗަށް ކުރިއަށް ގެންދާ މަރުހަލާ އެއް ނޫން ކަމަށެވެ. އެ މަރުހަލާގައި ގިނަ ބައެއް ޝާމިލްވާ ކަމަށާއި އެ އެންމެން އެއްބަސްވެގެން ބައިވެރިވެގެން އިންތިޚާބު އޮޅުވާލުމަކީ ވަރަށް ނާދިރުކަމެއް ކަަމަށް ޝަރީފް ވިދާޅުވިއެވެ. އަދި ކޮމިޝަންގެ ރައީސް ނުވަތަ އެ ނޫންވެސް މެންބަރަކު ބޭނުންވިޔަސް އިންތިޚާބު އޮޅުވާނުލެވޭނެ ކަމަށާއި އިންތިޚާބުގެ އުސޫލުތައް ހެދިފައި ވަނީ އެއަށް ވުރެ ފުރިހަމައަށް ކަަމަށް ޝަރީފް ވިދާޅުވިއެވެ.

އެގޮތުން ރާއްޖޭގެ އިންތިޚާބީ މަރުހަލާ އަށް ބޭރުގެ ފަރާތްތަކުން ތައުރީފް ކޮށްފައިވާ ކަމަށް ވެސް ޝަރީފް ވިދާޅުވިއެވެ. މީގެ އިތުރުން އިންތިޚާބުގެ ފުރަތަމަ ބުރުން އިދިކޮޅު ފަރާތްތަކަށް ރަނގަޅު ނަތީޖާ އެއް ލިބުމުން އެއްވެސް ވަރަކަށް އީސީއާ މެދު ސުވާލު ނުއުފައްދާ ކަން ޝަރީފް ފާހަގަކުރެއްވިއެވެ. އެހެންކަމުން އެފަދަ ވާހަކަތަކުގެ އަސްލެއް ނެތް ކަމަށް ވެސް ޝަރީފް ވިދާޅުވިއެވެ.

ޝަރީފް މިހެން ވިދާޅުވެފައި ވާއިރު ރިޔާސީ އިންތިޚާބު 2018އިގެ ނަތީޖާއާ މެދު ސުވާލު އުފައްދާ އޭރުވެސް ޕީޕިއެމް އިން ވަނީ ކޯޓަށް ގޮސްފައެވެ. އަދި އިންތިޚާބުގައި ދެލި ފޮހެވޭ ގަލަމެއް ބޭނުން ކުރި ކަމަށް ވެސް ވަނީ ތުހުމަތުކޮށްފައެވެ.