ރިޔާސީ އިންތިޚާބު 2023: ބޭރުގައި ބަހައްޓާ ފޮށިތަކުގެ ތެރެއިން އެންމެ ލަހުން ވޯޓްލާން ފަށާނީ މެލޭޝިއާގައި
ރިޔާސީ އިންތިޚާބުގެ ދެވަނަ ބުރުގައި ޖުމްލަ 586 ވޯޓް ފޮށި ބަހައްޓާނެ
ރިޔާސީ އިންތިޚާބުގެ 2023ގެ ފުރަތަމަ ބުރުގެ ތެރެއިން
ރިޔާސީ އިންތިޚާބު 2023ގެ ދެވަނަ ބުރުގައި، ރާއްޖޭން ބޭރުގައި ވޯޓްފޮށި ބަހައްޓާ ގައުމުތަކުގެ ތެރެއިން އެންމެ ލަހުން ވޯޓްލާން ފަށާނީ މެލޭޝިއާގައި ކަމަށް އީސީން ބުނެފިއެވެ.
ރާއްޖެއިން ބޭރުގެ 5 ގައުމެއްގައި ވޯޓު ފޮށި ބެހެއްޓުމަށް ވަނީ ނިންމާފައެވެ. އެއީ އެކުވެރި އަރަބި އިމާރާތުގެ (އަބޫދާބީ)، ސްރީލަންކާގެ (ކޮލަންބޯ)، އިންޑިއާގެ (ޓްރިވެންޑްރަމް)، އިނގިރޭސިވިލާތުގެ (ލަންޑަން) އަދި މެލޭޝިއާގެ (ކުއަލަލަމްޕޫރް)ގައެވެ.
އެގޮތުން އަބޫދާބީގައި އެގައުމުގެ ގަޑިން ވޯޓުލާން ފަށާނީ ހެނދުނު 8:00ގައެވެ. ހަވީރު 5:00ގައި ވޯޓުލުން ނިންމާނެއެވެ. އިންޑިއާގައި 8:30ން 5:30ށް، ސްރީލަންކާގައި 8:30ން 5:30ށް، އިނގިރޭސިވިލާތުގައި 8:30ން 5:30ށް އަދި މެލޭޝިއާގައި 11:00ން ރޭގަނޑު 8:00ށެވެ.
ރިޔާސީ އިންތިޚާބުގެ ދެވަނަ ބުރުގައި ޖުމްލަ 586 ވޯޓް ފޮށި ބަހައްޓާނެއެވެ.
އީސީގެ ނައިބުރައީސް އިސްމާއީލް ހަބީބް ވިދާޅުވީ ރީ-ރަޖިސްޓްރޭޝަނަށްފަހު ޖުމްލަ 12 ފޮށި އިތުރުވި ކަމަށެވެ. ފުރަތަމަ ބުރުގައި ޖުމްލަ ބެހެއްޓީ 574 ވޯޓް ފޮއްޓެވެ.
ހަބީބް ވިދާޅުވީ ދެވަނަ ބުރުގައި އިތުރުވީ މާލޭގައި 4 ވޯޓް ފޮށި، ހުޅުމާލެ ފޭސް އެކެއްގައި 2 ފޮށި، ހުޅުމާލެ ފޭސް ދޭއްގައި 4 ފޮށި، ވިލިމާލޭގައި 1 ފޮށި އަދި އިންޑިއާގެ ޓްރިވެންޑްރަމްގައި 1 ފޮށި ކަމަށެވެ.
ރިޔާސީ އިންތިޚާބުގެ ދެވަނަ ބުރުގެ ވޯޓުލުމަށް ހަމަޖެހިފައިވަނީ ސެޕްޓެމްބަރު މަހުގެ 30 ވާ ހޮނިހިރު ދުވަހުއެވެ. ދެވަނަ ބުރުގައި އަލަށް ވޯޓުލެވޭ 408 މީހުން ހިމެނެއެވެ. އަލަށް ވޯޓުލެވޭ މީހުންނާއެކު ޖުމްލަ 282,803 މީހުންނަށް ދެވަނަ ބުރުގައި ވޯޓުލުމުގެ ހައްގު ލިބިގެންވެއެވެ.
