އިޓާލިއަން ލީގުގައި ސަސުއޯލޯއާ ދެކޮޅަށް ކުޅުނު މެޗުން ޔުވެންޓަސް ބަލިވެއްޖެ އެވެ.

ސަސުއޯލޯގެ ދަނޑުގައި ހޮނިހިރު ދުވަހުގެ ރޭ ކުޅުނު މެޗުން ޔުވެންޓަސް ބަލިވީ 4-2 އިންނެވެ. މިއީ މި ސީޒަންގެ އިޓާލިއަން ލީގުގައި ޔުވެންޓަސް ބަލިވި ފުރަތަމަ މެޗެވެ. ލީގުގައި މިހާތަނަށް ކުޅުނު ފަސް މެޗުގެ ތެރެއިން އެ ޓީމު ވަނީ ތިން މެޗުން މޮޅުވެފަ އެވެ. އެއް މެޗުން ބަލިވީއިރު، އަނެއް މެޗު ވަނީ އެއްވަރުވެފަ އެވެ.

މެޗު ފަށައިގެން 12 ވަނަ މިނެޓުގައި ސަސުއޯލޯ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ އާމަންޑް ލޯރިއެންޓޭ އެވެ. ނަމަވެސް އޭގެ ފަހުން މެޗުގެ 21 ވަނަ މިނެޓުގައި ޔުވެންޓަސް އަށް ނަތީޖާ ހަމަހަމަވީ ސަސުއޯލޯގެ ޑިފެންޑަރު މަތިއަސް ވިނާ އަތުން ބައި ކޮޅަށް ވަން ލަނޑުންނެވެ. ދެ ވަނަ ފަހަރަށް ސަސުއޯލޯ އިން މެޗުގައި ލީޑު ނެގީ 41 ވަނަ މިނެޓުގަ އެވެ. މަތިއުސް ހެންރީކޭ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޑޮމެނިކޯ ބެރާޑީ އެވެ. ނަމަވެސް ދެ ވަނަ ހާފުގައި ޔުވެންޓަސް އިން ނަތީޖާ ހަމަހަމަ ކުރި އެވެ. 78 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ފެޑެރިކޯ ޗިއެސާ އެވެ. އޭނާ އެ ލަނޑު ޖެހީ ނިކޮލޯ ފަގިއޯލީ ތަނަވަސްކޮށްދިން ފުރުސަތެއްގަ އެވެ. ނަމަވެސް އޭގެ ފަހުން ފިނަމޮންޓީ ވަނީ ލަނޑު ޖަހައި ސަސުއޯލޯ އަށް ކުރި ހޯދައިދީފަ އެވެ. މެޗުން ސަސުއޯލޯ އަށް ފުރިހަމަ މޮޅެއް ލިބުނީ ފަހު ވަގުތު ޔުވެންޓަސްގެ ފެޑެރިކޯ ގަޓީ އަތުން ބައި ކޮޅަށް ވަތް ލަނޑުންނެވެ.

މި ނަތީޖާ އާއެކު ޔުވެންޓަސް އޮތީ ލީގު ތާވަލްގެ ހަތަރު ވަނައިގަ އެވެ. އެއީ ކުޅުނު ފަސް މެޗުން 10 ޕޮއިންޓު ހޯދައިގެންނެވެ. ފަސް މެޗުން ހަ ޕޮއިންޓާއެކު ސަސުއޯލޯ އޮތީ 11 ވަނައިގަ އެވެ.