ފިތުނަ އުފައްދާ ފިތުނަ ފަތުރާ އޭގެ މައްޗަށް ފިތުނަ ހަދަނީއެވެ.

ރިޔާސީ އިންތިހާބުގެ ދެވަނަ ބުރުގެ ކެމްޕޭން ވަރަށް ފޯރިއާއެކު ކުރިއަށް އެބަދެއެވެ. އެއްބަޔަކު އެކަން ކުރަނީ ރައްޔިތުން ގާތަށް ގޮސް މެނިފެސްޓޯ ވިއްކައިގެންނެވެ. އަނެއްބަޔަކު އެކަން ކުރަނީ ފިތުނަ އުފައްދަން ފައިސާ ދީގެން ފިތުނަ ފަތުރާ ފިތުނަ ހަދައިގެންނެވެ. މިބުނާ ފިތުނަ އުފައްދަނީ އިދިކޮޅުންނެވެ. އެ މީހުންނަކީ އެއްވެސް އިރެއްގައި ރީތިގޮތުގައި ކެމްޕޭން ކުރަން އެނގުނު ބައެއް ނޫނެވެ. ކޮންމެވެސް ބަޔަކަށް ގެއްލުން ދީގެން ދޮގާއި މަކަރާއި ހީލަތްތެރިކަމާއެކު އެކަން ކުރަމުން އަންނަ ބަޔަކެވެ.

ރިޔާސީ އިންތިހާބުގެ ދެވަނަ ބުރުގައި ކެމްޕޭން ކުރުމުގެ ބަދަލުގައި ވާދަވެރިންގެ އަގުވައްޓާލަން މޮޅުކަމެއް ކުރީއެވެ. ސޯޝަލް މީޑިއާގެ ޕްލެޓްފޯމްތަކުގެ ތެރެއިން ދިވެހިންގެ މެދުގައި އެންމެ މަޝްހޫރު އެއް ވަސީލަތަކީ ޓްވިޓަރއެވެ. އޭގައި ބަޔަކު ކޮންމެ އެއްޗެއް ހިއްސާކުރިއަސް ތެދު ދޮގެއް ބަލާނުލާ އެ ޝެއަރކޮށް ނަގާނެއެވެ. މިފަހުން އިންޑިއާދެކެ ރުޅިއަންނަ އަދި އިންޑިއާއިން މީގެ ކުރިން ވާގި ހޯދައިގެން މަންފާ ލިބިފައި ތިބި މަދު ބަޔަކާއި، ޗައިނާއަށް ވަފާތެރި އަދި ނޫސްވެރިކަމުގެ ޓެގް އަޅުވައިގެން ތިބި ދެތިން މީހަކާއި، ސިޔާސީ ޕާޓީގެ ނަމުގައި ދިވެހިންގެ މިނިވަންކަން ނަގާލާ ގޮށްމުށުގެ ބާރު ދެއްކި ބަޔަކު، ބަޔަކަށް ލާރި ދީގެން ކުރުވި ހަޑި މުޑުދާރު ކަމެއްގެ ވާހަކައެއް ދައްކާލާނަމެވެ.

ފައިސާ ދީގެން ކޮންމެ ކަމެއްވެސް ބަޔަކު ލައްވާ ކުރުވަފާނެއެވެ. އެގޮތުން އިންޑިއާގެ ޓްވިޓަރގައި ލާރި ދީގެން ދޮގު ހަބަރުތައް ފަތުރާ މީހުންގެ ތެރޭގައި ފިތުނަ އުފައްދަން މަސައްކަތް ކުރާ ބަޔަކަށް އިދިކޮޅުން ފައިސާ ދީގެން މިވަނީ ރައީސް އިބްރާހިމް މުހައްމަދު ޞާލިހަށް ތާއިދުކުރާކަން ދެއްކުމަށް "ސޯލިހް ފޮރ މޯލްޑިވްސް" ގެ ނަމުގައި ކެމްޕޭނެއް ހިންގާފައެވެ. މިއީ ބަޔަކު ރާވައިގެން ކުރިކަމެއްކަން ފުރަތަމަވެސް އެނގޭ ކަމަކީ އެ ފައިސާ ދިން މީހުން ކުރި ޓްވީޓްތައް، ދިވެހިންގެ މެދުގައި ފިތުނަ އުފައްދާ އެއްބައިވަންތަކަން ނަގާލަން މަސައްކަތް ކުރާ ދިޔަރެސް ނޫހާއި އެ ނޫހުގައި އުޅޭ ނޫސްވެރިކަމުގެ ޓެގް އަޅުވައިގެން އުޅޭ ދެތިން އެކްޓިވިސްޓެއް އެ ޓްވީޓްތައް ހިއްސާކުރަން ފެށި ހިސާބެވެ. އެހެން ބަޔަކަށް އެ ނުފެނި ހަމައެކަނި އެމީހުންނަށް ފެންނަން ފެށުމުންނެވެ.

ދެން މި ޓްވީޓްތައް އެންމެ ގަދަޔަށް ފަތުއަޑު ކިޔާފައި ފަތުރަން ފެށީ މަގުތަކަށް ނުކުމެ އާންމުންނަށް ޖެއްސުން ކުރުމުގައި އަވަދި ނެތި އުޅޭ ފިޔާތޮށި ކުލައިގެ ކުދިން ކޮޅަށެވެ. މިއީ މީގެ ކުރިންވެސް މިބައިގަނޑު ކުރި ކަމެކެވެ.

އެންމެ ފަހުން އެކުރި ކަންތައް އަތަށްގޮވީއެވެ. ފައިސާ ދީފައި އެކަން ކުރިވި މީހުންނަށް އެއީ ކޮންކަމަކާ ގުޅޭ ކަމެއްކަން ވެސް ރޭކާ ނުލީއެވެ. ފައިސާ ދިނީމައި އެމީހުން އެހެންޔާވެސް ކުރާ އުސޫލުން ކުރީއެވެ. ނަމަވެސް އެމީހުންނަށް މިކަމުގެ ރޭކާލިއިރު އިދިކޮޅުން ފައިސާ ދީގެން ކުރި ކަމެއްގެ ފުރިހަމަ ފައިދާ އިިކޮޅުން ނަގައިފިއެވެ.

އިދިކޮޅުން ފައިސާ ދީގެން ޓްވީޓް ކުރި މީހަކު އޭނާއަށް ކުރެވުނީ ރަނގަޅު ނޫންކަމެއްކަން ގަބޫލުކުރެވުނު ހިސާބުން އެކަން ޓްވިޓާގައި ހާމަކޮށް މައާފަށްވެސް އެދިފައިވެއެވެ. އޭނާ ކުރި ޓްވީޓުގައި ބުނެފައިވަނީ ޕީޕީއެމްގެ ޕްރޮޕެގެންޑާ ކެމްޕޭނެއްގެ ޝިކާރައަކަށް ވުމަކީ ހިތާމަހުރި ކަމެއް ކަމަށެވެ. އަދި އޭނާގެ ސަމާލުކަމަށް އައިސްފައިވަނީ ޕީޕީއެމުން އޭނާގެ ޓްވީޓްތައް ބޭނުންކޮށްގެން އިންޑިއާއާ ދެކޮޅަށް ނަފްރަތު އުފައްދަމުން ދާކަން ކަމަށެވެ.

އަދި އެއީ ޕީޕީއެމް އިން އިންޑިއާ-ރާއްޖޭގެ ގުޅުމަށް އެމީހުން ގުޅިގެން ދިން ހަމަލާއެއްކަމަށާއި، އެމީހުންގެ ބަހަށް ހެއްލުނީތީ އެކަމަށް މައާފަށް އެދޭކަމަށެވެ.

ރައްޔިތުން މިއަދު ވިސްނަންވީ ކަމަކީ މިފަދަ ކަންކަމާއި ދޭތެރޭއެވެ. ގައުމުގައި އަނިޔާވެރި ވެރިކަމެއް އަނެއްކާވެސް އިއާދަކުރަން ބަޔަކު އަޑީގައި ތިބެގެން ރޯމާ ދުވާލު މިދަނީ ފިތުނަ އުފައްދަމުންނެވެ. މިފަދަ ދަށު ދަރަޖައަކަށް ވެއްޓޭނެ ބަޔަކު ވެރިކަމަށް އާދެވިއްޖެނަމަ ދެން ކުރާނެ ކަމަކާއި މެދު ވިސްނާލާށެވެ. އަމާންކަމުން ނާމާންކަމަށް ދާން އެކަކުވެސް ނޭދޭނެއެވެ.

ހަމަ އެފަދައިން ހަރުކަށި ކަމަކީވެސް މިމީހުން ގޮތް ހުސްވީމަ ލާރި ދީގެން ކުރުވާ ކަންކަން ކަމަށް ގިނަ ބަޔަކު ގަބޫލު ކުރެއެވެ. ތަންތަނާ މުދަލުގަ ހުޅު ޖެހުމަކީ ފަހުވަގުތު ދެކެން އެކަކުވެސް ބޭނުންވާނެ ކަންކަމެއް ނޫނެވެ. ލައިގެން ހުންނަ ޓީޝަރޓްގެ ކުލަޔަށް ބަލާފަ ވަޅި ހަރަނީ އެވެ. މިކަންކަމުން މިންޖުވެގެން ތިބި އަމާން އޮމާން ފަސް އަހަރު އަޅުގަނޑުމެން ދެކެފީމެވެ. ދެން އަނެއްކާވެސް އެފަދަ ކަންކަމަށް ދާކަށް ބޭނުމެއް ނޫނެވެ.