ދަރުމަވަންތަ ހޮސްޕިޓަލާ ގުޅޭގޮތުން ސޯޝަލް މީޑިއާގައި ދައުރުވަމުންދާ ވާހަކަތައް އައި.ޖީ.އެމް.އެޗުން ދޮގުކޮށްފި
މާލިއްޔަތު ޤާނޫނަށް އިސްލާހުތަކެއް ގެނައުމަށްފަހު މި މަޝްރޫޢު ހަވާލުކޮށްފައިވަނީ ސިންގަޕޯގެ ޝެންހުއާ ކުންފުންޏާ
ދަރުމަވަންތަ ހޮސްޕިޓަލް
ދަރުމަވަންތަ ހޮސްޕިޓަލާ ގުޅޭގޮތުން ސޯޝަލް މީޑިއާގައި ދައުރުވަމުންދާ ވާހަކަތައް އައި.ޖީ.އެމް.އެޗުން ދޮގުކޮށްފިއެވެ.
ދަރުމަވަންތަ ހޮސްޕިޓަލުގެ ޚިދުމަތާއި ގުޅޭ ނުރަނގަޅު މައުލޫމާތުތަކެއް މީސްމީޑިއާގައި ދަނީ ދައުރުވަމުންނެވެ. އެ ހޮސްޕިޓަލުން ބުނީ ކުރީ ސަރުކާރުން 3 ޓަވަރު އަޅާނެ ކަމަށް ބުނެ ޢިމާރާތްކުރި24 ފަންގިފިލާގެ ދަރުމަވަންތަ ހޮސްޕިޓަލުގައި ޤައުމީ ޔުނިވަރސިޓީއަށް ޚާއްޞަކޮށްފައިވާ 8 އަދި 14 ވަނަ ފަންގިފިލާ ފިޔަވައި މުޅި ޢިމާރާތުގައި ބަލިމީހުން ބެލުމާއި ސިއްޙީ ޚިދުމަތްތައް ދެމުންދާ ކަމަށެވެ.
އަދި އެތަނުގެ 8 އަދި 14 ވަނަ ފަންގިފިލާ ޚާއްސަކޮށްފައިވަނީ ޤައުމީ ޔުނިވަރސިޓީގެ ދަރިވަރުންނަށް ކަމަށް ވަނީ ބުނެފައެވެ.
އިތުރު ތަފްޞީލު ދެއްވަމުން އައި.ޖީ.އެމް.އެޗުން ބުނީ 15 ވަނަ ފަންގިފިލާ އިން 19 ވަނަ ފަންގިފިލާ އަކީ ޕްރައިވެޓް ކޮޓަރިތައް ކަމަށާއި 20 ވަނަ ފަންގިފިލާއަކީ ޕްރެސިޑެންޝަލް ސޫޓް ކަމަށެވެ.
އަދި 21 ން 23 ވަނަ ފަންގިފިލާގައި ވިޒިޓިންގ ޑޮކްޓަރުން ތިބުމުގެ އިންތިޒާމު ހަމަޖައްސާފައިވާއިރު 24 ވަނަ ފަންގިފިލާއަކީ މީޓިންގ ރޫމްތަކަށް ޚާއްޞަކޮށްފައިވާ ތަނެއްކަމަށް ވެސް އެ ހޮސްޕިޓަލުން ބުނެފައި ވެއެވެ.
ދަރުމަވަންތަ ހޮސްޕިޓަލަކީ ކުރީގެ ރައީސް ޔާމީންގެ ދައުރުގައި އަދި މިހާރު ޕީ.އެން.ސީ.ގެ ރިޔާސީ ކެންޑިޑޭޓް އަދި އޭރުގެ ހައުސިންގ އެންޑް އިންފްރާސްޓްރަކްޗަރ މިނިސްޓަރ މުޢިއްޒުގެ ބެލުމުގެ ދަށުން ވަކި 3 ޓަވަރު ބިނާކުރުމަށް ނިންމައި އެވޯޑު ކުރި ޕްރޮޖެކްޓެކެވެ. މި 3 ޓަވަރުގެ ތެރޭގައި 10 ފަންގިފިލާގެ 2 ޢިމާރާތާއި 25 ފަންގިފިލާގެ ޢިމާރާތެއް އަޅާނެކަމަށް އޭރުގެ ޕްލޭންތަކުން ދައްކައެވެ. މި މަޝްރޫޢު ނިމުނު އިރު 3 ޓަވަރުގެ އަގަށް ނިންމާފައިވަނީ 1 ޢިމާރާތުގެ ތޮށިގަނޑެވެ.
މިއީ ދައުލަތުން ޚަރަދުކޮށްގެން ހިންގާފައިވާ އެންމެ އަގުބޮޑު މަޝްރޫޢު ކަމަށް ވާއިރު މަޝްރޫޢުގެ އަގަކީ 143 މިލިއަން ޑޮލަރެވެ. ނަމަވެސް މި ސަރުކާރުން ބެލި ބެލުމުން އެންމެ ބޮޑުވެގެންވެސް މިފަދަ ޢިމާރާތެއް ބިނާކުރުމަށް ދާނެކަމަށް އަންދާޒާކުރެވެނީ 40 މިލިއަން ޑޮލަރު ކަމަށް ސަރުކާރުން ވަނީ ބުުނެފައެވެ. އަގުހެޔޮ ސިއްޙީ ޚިދުމަތް ފޯރުކޮށްދިނުމުގެ ނަމުގައި ދައުލަތުގެ މާލިއްޔަތު ޤާނޫނަށް އިސްލާހުތަކެއް ގެނައުމަށްފަހު މިމަޝްރޫޢު ހަވާލުކޮށްފައިވަނީ ސިންގަޕޯގެ ޝެންހުއާ ކުންފުންޏާއެވެ.
