ހަނީފް ހައްޔަރުކުރީ ސޯޝަލް މީޑިއާގައި ސަރުކާރުގެ އަގު ވައްޓާލާތީ ކަމަށް ބުނެ: ހަސީން
ހަނީފްގެ ބަންދަން ވަނީ ހަތް ދުވަސް ޖަހާފަ
އިބްރާހީމް ހަނީފް: އެމްޑީޕީ ޕާލެމެންޓް ގްރޫޕްގެ ލީޑަރު އިބޫ އާ އެންމެ ގާތުގައި
އިސްލާހީ ހަރަކާތުގައި އިސްކޮށްއުޅުއްވާ އެމްޑީޕީގެ އެކްޓިވިސްޓް އިބްރާހީމް ހަނީފް ހައްޔަރުކޮށްފައި ވަނީ ސޯޝަލް މީޑިއާގައި ސަރުކާރާއި ރައީސުލްޖުމްހޫރިއްޔާއާ ގުޅޭ ގޮތުން އަގު ވެއްޓޭ ގޮތަށް ދޮގު ޚަބަރު ފަތުރާކަމަށް ބުނެ ކަމަށް ހަނީފް ގާނޫނީ ވަކީލު އަބްދުﷲ ހަސީން ވިދާޅުވެއްޖެ އެވެ.
އާދިއްތަ ދުވަހު "ރާއްޖެއެމްވީ"އަށް މައުލޫމާތު ދެއްވަމުން ހަސީން ވިދާޅުވީ ހަނީފްގެ ބަންދަށް ހަތް ދުވަސް ޖަހާފައިވާ ކަމަށެވެ.
ހަނީފް ހައްޔަރު ކޮށްފައިވަނީ ބުރާސްފަތު ދުވަހުގެ ރެއެވެ.
އެނގިފައިވާ ގޮތުގައި ހަނީފް ހައްޔަރު ކޮށްފައި ވަނީ އޭނާ ގޭގައި ހުންނަވަނިކޮށެވެ.
ހަނީފް ހައްޔަރު ކުރުމާގުޅިގެން އަދާލަތު ޕާޓީގެ ނައިބު ރައީސް އަލީ ޒާހިރު ކުރެއްވި ޓްވީޓެއްގައި ވަނީ އިސްލާހީ މަސައްކަތުގައި އިސްކޮށް އުޅުއްވާ އެކްޓިވިސްޓް ހަނީފް ހައްޔަރު ކޮށްފައިވަނީ ސިޔާސީ މަޤްޞަދަކަށްޓަކައި ކަމަށް ވިދާޅުވެފައެވެ. އަދި ސިޔާސީ މަޤްޞަދަށްޓަކައި މީހުން ހައްޔަރުކުރުން ހުއްޓާލުމަށް އަލީ ޒާހިރު ވަނީ ގޮވާލައްވާފަ އެވެ.
ހަނީފް ހައްޔަރުކޮށްފައިވާ އިރު މިދުވަސްވަރަކީ އިދިކޮޅު ސިޔާސީ ފަރާތްތައް ފުލުހުން ހާޒިރުކުރުން އިތުރުވެފައިވާ ދުވަސްވަރެކެވެ. އެ ގޮތުން ފާއިތުވި ހަފްތާއެއްހާ ދުވަހުގެ ތެރޭގައި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި ކިނބިދޫ ދާއިރާގެ މެންބަރު އަބްދުﷲ ރިޔާޒް އާއި ދިއްގަރު ދާއިރާގެ މެންބަރު ފާރިސް މައުމޫނާއި އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވަނީ ފުލުހަށް ހާޒިރުކޮށް ސުވާލުކޮށްފައެވެ. މީގެ އިތުރުން ސޯޝަލް މީޑިއާ އެކްޓިވިސްޓް ތޮއްޔިބު ޝަހީމް ވެސް ވަނީ ހައްޔަރުކޮށްފައެވެ.
