ނޫސްވެރިންނަށާއި ސޯޝަލް މީޑިއާ އެކްޓިވިސްޓުންނަށް ބިރު ދެއްކުން ހުއްޓާލާ: އެމްޑީޕީ
ދިވެހިންނަށް ފުރައްސާރަ ކުރަނީ ކަމަށްބުނި
އެމްޑީޕީގެ ނޫސްވެރިންގެ ބައްދަލުވުމެއްގައި އެޕާޓީގެ ވެރިން ވާހަކަ ދައްކަވަނީ
ފ. އަތޮޅު ވިއްކާލުމާއި ގުޅޭގޮތުން ރައީސް ޢަބްދުﷲ ޔާމީނާއި ވަޒީރުން، އާންމުކުރައްވާފައިވާ މައުލޫމާތުތައް ހާމަކުރަމުންދާ މީޑިޔާތަކާއި ނޫސްވެރިންނާއި ސޯޝަލް މީޑިޔާގައި ހަރަކާތްތެރިވާ ފަރާތްތަކަށް ސަރުކާރުން ފުރައްސާރަކުރުން ހުއްޓާލުމަށް އެމްޑީޕީން ގޮވާލައިފިއެވެ.
ހޯމަ ދުވަހު އެމްޑީޕީން ނެރުނު ނޫސްބަޔާނެއްގައި ބުނެފައިވަނީ ފ. އަތޮޅު ވިއްކާލުމުގެ ވާހަކަ ރައީސް ޔާމީނާއި ސަރުކާރުގެ އެކިއެކި ފަރާތްތަކުން ދައްކަމުން އަންނަ ދުވަސްވަރެއްގައި ފ. އަތޮޅުގެ ރައްޔިތުންނާ އެކަމާ ގުޅޭ އެއްވެސް މައުލޫމާތެއް މިއަދާ ހަމައަށް ވެސް ހިއްސާކޮށްފަނުވާ ކަމަށެވެ.
ބަޔާނުގައި ބުނެފައިނީ އެވާހަކަތައް ގެނެސްދޭ މީޑިއާތަކާއި ނޫސްވެރިންނާއި ސޯޝަލް މީޑިޔާގައި ހަރަކާތްތެރިވާ ފަރާތްތަކަށް ސަރުކާރުން ފުރައްސާރަކުރަމުންދާ ކަމަށެވެ.
"ނޫސްވެރިންނަށާއި، ސޯޝަލް މީޑިޔާގައި ހަރަކާތްތެރި ފަރާތްތަކަށް ސަރުކާރުން ފުރައްސާރަކުރަމުންދާތީ ދިވެހިރައްޔިތުންގެ ޑިމޮކްރަޓިކް ޕާޓީން އެކަން ކުށްވެރިކޮށް ކަންބޮޑުވުން ފާޅުކުރަން"
އެމްޑީޕީގެ ބަޔާނުގައި ބުނެފައިވަނީ ޤާނޫނު އަސާސީން ލިބިދޭ ބާރުގެ ބޭނުންކޮށް ރައްޔިތުން ފ. އަތޮޅުގެ މައްސަލައާ މެދު ކަންބޮޑުވުން ފާޅުކުރުމުން އެފަރާތްތައް ފުލުސް އޮފީހަށް ހާޒިރުކޮށް ބަޔާންތައް ނަގައި ހެދުމަކީ މޯލްޑިވްސް ޕޮލިސް ސަރވިސްއިން ހިންގާ ޤާނޫނާ ޚިލާފް ޖަރީމާއެއް ކަމަށެވެ.
"ފާއިތުވީ މަސްދުވަހުގެ ތެރޭގައި ރާއްޖެޓީވީގެ ނޫސްވެރިން ތަކުރާރުކޮށް ފުލުސް އޮފީހަށް ހާޒިރުކުރުމާއި، ކުއްލި ގޮތަކަށް އެ ޗެނެލް ޖޫރިމަނާކުރުމާއި، ސޯޝަލް މީޑިޔާގައި ޙާރަކާތްތެރިވާ ޝައްމޫން ޖަލީލާއި ޠައްޔިބު ޝަހީމް ފުލުސް އޮފީހަށް ހާޒިރުކޮށް 3 މަސްދުވަހުގެ މުއްދަތައް އެމީހުންގެ މޮބައިލް ފޯނު އަތުލައި، ށ. ބިލެތްފަހީގައި އެމްޑީޕީއަށް ނިސްބަތްވާ ފަރާތްތައް ހާޒިރުކުށް ފާފުއަތޮޅާ ބެހޭގޮތުން ވާހަކަނުދެއްކުމަށް ބުނެ ސޮއިކުރުވައި، ހއ. ދިއްދޫ އެމް.ޑީ.ޕީ އިސްވެރިން ހާޒިރުކޮށް ފާފު އަތޮޅާ ގުޅޭގޮތުން އެއްވެސް ވާހަކައެއް ދައްކައި ލިޔުންތައް ޝާއިއުކޮްށްގެން ނުވާނެކަމުގައި އިންޒާރުދިނުމަކީ ރައްޔިތުންނަށް ލިބިދޭ ޚިޔާލުފާޅުކުރުމުގެ ޙައްޤަށް ފާޅުކަންބޮޑުގޮތުގައި ފުލުހުން އަރައިގަތުމެވެ." ބަޔާނުގައި ވެއެވެ.
އެމްޑީޕީގެ ބަޔާނުގައި ބުނެފައިވަނީ ރާއްޖޭގެ އަތޮޅަކާ ގުޅޭ ގޮތުން ސަރުކާރުން ދައްކަމުން އަންނަ ވާހަކަތައް ރައްޔިތުންނަށް ސާފުވާންޖެހޭ ކަމަށެވެ. އަދި އެކަމާ މެދު ހާމަކަންބޮޑުގޮތެއްގައި ވާހަކަ ދެކެވި ރައްޔިތުންގެ ބައިވެރިވުން ހިމެނެން ޖެހޭ ކަމަށް ބަޔާނުގައި ވެއެވެ.
ފ. އަތޮޅާ ގުޅޭ ގޮތުން ރައްޔިތުންގެ ނުތަނަވަސްކަން އިންތިހާއަށް އިތުރުވެފައިވާއިރު ސަރުކާރުން ޖަވާބުދާރީވާންޖެހޭނެ ކަމަށާއި ފުލުހުންނާއި، ސިފައިންނާއި، ދައުލަތުގެ އެންމެހައި ފަރާތްތަކުންވެސް ރައްޔިތުންގެ ޚިޔާލުފާޅުކުރުންތަކަށް އިހްތިރާމްކޮށް ޞުލްޙަވެރި ސިޔާސީ ޙަރަކާތްތަކަށް ޖާގަ ދިނުމަށް އިލްތިމާސްކުރާ ކަމަށް އެމްޑީޕީގެ ބަޔާނުގައި ވެއެވެ.
