ޖަރުމަނު ކޯޗުކަން ނާގެލްސްމަން އަށް

ހުސްވެފައިވާ ޖަރުމަނުގެ ކޯޗުކަން ހޫލިއަން ނާގެލްސްމަން އަށް ދީފި އެވެ.

ހުސްވި ސީޒަނުގެ މެދުތެރެއިން ބަޔާން މިއުނިކޫން ވަކިކުރި ޒުވާން ކޯޗަށް އޭގެ ހަ މަސް ފަހުން ޖަރުމަނުގެ ގައުމީ ކޯޗުކަން ދިނީ އަންނަ އަހަރު އެ ގައުމުގައި ބާއްވާ ޔޫރޯ ފުޓްބޯޅަ މުބާރާތުގެ ނިޔަލަށެވެ. އޭނާގެ ކޮންޓްރެކްޓް އައު ކުރާނެކަން ނިންމާނީ އެ މުބާރާތަށް ފަހު އެވެ.

ޖަރުމަނުގެ ކޯޗުކަމާ ހަވާލުވުމަށްފަހު ނާގެލްސްމަން ބުނީ ޔޫރޯ އަމިއްލަ ގައުމުގައި ބޭއްވުމުގެ ފުރުސަތަކީ އެތައް އަހަރަކުން ލިބޭ ފުރުސަތެއް ކަމަށާއި އެ މުބާރާތުގެ ނަތީޖާ ރަނގަޅު ކުރުމަކީ އެންމެ މުހިންމު ފޯކަސް ކަމަށެވެ.

ޖަރުމަނުގެ ގައުމީ ޓީމުގެ ޑިރެކްޓަރު އަދި ކުރީގެ ކޯޗު އަދި ފޯވަޑް ރޫޑީ ވޮލާ ބުނީ ނާގެލްސްމަން އަކީ ކޯޗަކު ހޯދަން ފެށިއިރު ވެސް އެންމެ ފުރަތަމަ ޗޮއިސް ކަމަށެވެ.

ޖަރުމަނުގެ ކޯޗުކަން ހުސްވީ އެ މަގާމުގައި މިދިޔަ ދެ އަހަރެއްހާ ދުވަހު ހުރި ބަޔާންގެ ކުރީގެ ކޯޗު ހަންސީ ފްލިކް މަގާމުން ވަކިކުރުމުންނެވެ. އެއީ މިދިޔަ އަހަރުގެ ވޯލްޑްކަޕުގެ ގްރޫޕް ސްޓޭޖުން ކެޓުމާއި އޭގެ ފަހުން ވެސް ނަތީޖާތައް ގޯސްވުމުންނެވެ. ޖަރުމަނު 2014 ވަނަ އަހަރުގެ ވޯލްޑްކަޕް ކާމިޔާބު ކުރި ފަހުން ވޯލްޑްކަޕުގައި ގްރޫޕް ފިޔަވަހިން ކުރިއަށް ނުދެ އެވެ. ނާގެލްސްމަނަށް އޮތީ މިކަން ބަދަލުކޮށް ކާމިޔާބީގެ މަގަށް ޓީމު ގެންގޮސްދިނުމެވެ.