ޖަރުމަނު ލީގުގައި ހޮނިހިރު ދުވަހުގެރޭ ވާދަވެރި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗު ފަސޭހަކަމާއި އެކު ކާމިޔާބުކޮށް ލީގުގެ އެއްވަނައިގައި ހަތަރު ޕޮއިންޓްގެ ލީޑެއް ބަޔާން މިޔުނިކުން ނަގައިފިއެވެ.

ރޭ ކުޅުނު މެޗުން ބަޔާއިން ޑޯޓްމަންޑުގެ މައްޗަށް ކުރިހޯދާފައިވަނީ 1-3 ގެ ނަތީޖާއަކުންނެވެ.

ޑޯޓްމަންޑްގެ އަމިއްލަ ދަނޑުގައި ރޭ ކުޅުނު މި މެޗުގައި ބަޔާންގެ ފަރާތުން މޮޅު ކުޅުމެއް ފެނިގެން ދިޔައިރު، މެޗުގެ 16 ވަނަ މިނެޓްގައި ބަޔާންއިން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. ރޮޑްރިގޭޒްގެ އެހީތެރިކަމާއި އެކު މި ލަނޑު ކާމިޔާބު ކޮށްދިނީ އާރެޔަން ރޮބެންއެވެ.

ބަޔާންގެ ދެވަނަ ލަނޑު ޖަހާ މެޗުގެ ލީޑު ފުޅާކުރީ މެޗުގެ 37 ވަނަ މިނެޓްގައި ރޮބަޓް ލެވެންޑޯސްކީ ކާމިޔާބުކޮށްދިން ލަނޑުންނެވެ. މިއީ ލެވެންޑޯސްކީ ލީގުގައި ކާމިޔާބުކުރި 11 ވަނަ ގޯލެވެ.

ދެ ލަނޑުގެ ލީޑަކާއި އެކު މެޗުގެ ފުރަތަމަ ހާފު ބަޔާންއިން ނިންމާލިއިރު، އެޓީމުގެ ތިންވަނަ ލަނޑު ޖަހާ މެޗުގެ ލީޑު އިތުރަށް ފުޅާކުރީ މެޗުގެ 67 ވަނަ މިނެޓްގައި ޑޭވިޑް އަލަބާ ކާމިޔާބު ކޮށްދިން ލަނޑުންނެވެ.

ޑޯޓްމަންޑުން މި މެޗުގައި ކާމިޔާބުކުރި ހަމައެކަނި ގޯލު މެޗުގެ 88 ވަނަ މިނެޓްގައި ކާމިޔާބު ކޮށްދިނީ އެޓީމުގެ ޑިފެންޑަރު މާކް ބާޓްރާއެވެ.

ރޭގެ މޮޅާއި އެކު ބަޔާން ލީގުގެ އެއްވަނައިގައި އޮތީ 26 ޕޮއިންޓާއެކުއެވެ. ލީގުގެ ދެވަނައިގައި 22 ޕޮއިންޓާއެކު ރެޑްބުލް ލީޕްޒިގް އޮތްއިރު ތިންވަނައިގައި 20 ޕޮއިންޓާއެކު އޮތީ ޑޯޓްމަންޑެވެ.

ލީގުގައި ބަޔާން ދެން ބައްދަލު ކުރާނީ އައުގްސްބާގްއާއެވެ. ޑޯޓްމަންޑް ނިކުންނާނީ ސްޓުޓްގާޓާ ދެކޮޅަށެވެ.