ހުޅުމާލޭ ދެވަނަ ފިޔަވަހީގެ ފަޅު މިރޭ ހިއްކަން ފަށަނީ
21 ސެޕްޓެމްބަރު 2023 | ބުރާސްފަތި 14:57ބިން ހިއްކުމުގެ މަސައްކަތް ކުރިއަށްދަނީ ފިޔަވަހިތަކަކަށް ބަހާލައިގެން
ހުޅުމާލޭ ދެވަނަ ފިޔަވަހީގެ ފަޅު
ބިންވެރިޔާ ސްކީމުގެ ދަށުން ދޫކުރުމަށް ހަމަޖެހިފައިވާ ގޯތިތަކަށް ބޭނުންވާ ބިން ހިއްކުމަށް، ހުޅުމާލޭ ދެވަނަ ފިޔަވަހީގެ ފަޅު ބުރާސްފަތި ދުވަހުގެ ރޭގެ ވަގުތެއްގައި ހިއްކަން ފަށާނެ ކަމަށް އާބަންކޯއިން ބުނެފިއެވެ.
އާބަންކޯއިން ބުނީ ބުރާސްފަތި ދުވަހުގެ ރޭ ގާތްގަނޑަކަށް 9:00ގެ ފަހުން ބިން ހިއްކުމުގެ އަމަލީ މަސައްކަތް ފެށިގެންދާނެކަމަށެވެ.
މި މަސައްކަތުގެ ޕްރޮޖެކްޓް މެނޭޖަރު ހުސައިން ހަނާން އަހުމަދު ވިދާޅުވީ، ބިން ހިއްކުމަށް ވާންޖެހޭ ހުރިހާ ތައްޔާރީތަކެއް ވެފައިވާކަމަށެވެ. އަދި ބިން ހިއްކުމުގެ މަސައްކަތްތައް ކުރިއަށް ގެންދަނީ ފޭސްތަކަކަށް ބަހާލައިގެން ކަމަށާއި، ފުރަތަމަ ހިއްކާނީ 10 ހެކްޓަރު ކަމަށެވެ. އަދި ވިދާޅުވީ ގާތްގަނޑަކަށް 2 ހަފުތާ ތެރޭގައި ނިންމާލެވޭނެ ކަމަށާއި، ގާތްގަނޑަކަށް ހައެއްކަ ހަފުތާތެރޭގައި މުޅި ޕްރޮޖެކްޓުގެ މަސައްކަތް ނިންމާލެވޭނެ ކަމަށެވެ.
ސަރުކާރުގެ ބިންވެރިޔާ ސްކީމުގެ ދަށުން ގޯތި ދިނުމަށް ހުޅުމާލޭ ފޭސް 2ގެ ހުޅަނގަށް އޮންނަ ފަޅުން 62.6 ހެކްޓަރުގެ ބިން ހިއްކާނެއެވެ.
މި މަޝްރޫއުގެ މަސައްކަތް ކުރުމަށް ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ހަވާލުކުރީ މިދިޔަ އޮގަސްޓު މަހުގެ ތެރޭގައެވެ.
އާބަންކޯއިން ބުނީ މި ސަރަހައްދުގައި އަޅާފައިވާ ސަފާރީތަކާއި ކަނޑު ދަތުރުކުރާ އުޅަނދުތައް ނެގުމަށް ތަކުރާރުކޮށް އެންގިނަމަވެސް އެދެވޭ ގޮތުގައި އެއްބާރުލުން ލިބިފައިނުވާ ކަމަށެވެ. އެހެންކަމުން އުޅަނދުތައް ނެގުމުގެ މަސައްކަތް ކުންފުނިން ކުރަމުންދާކަމަށް އާބަންކޯއިން ބުނެއެވެ. އަދި މި މަސައްކަތް ކުރުމުގައި އާއްމުންގެ އެއްބާރުލުން ބޭނުންވާކަމަށް އާބަންކޯއިން ބުނެއެވެ.
