ހިޔާ ފްލެޓް ތަކުގައި ލިފްޓް ހަރުކުރަން 278 މިލިއަން ރުފިޔާ ޚަރަދު ކުރާކަން ހާމަ ވެއްޖެއެވެ.

ލިފްޓް ތަކަށް ސަރުކާރުން ކުރާ ޚަރަދު ހާމަވީ، ހަނިމާދޫ ދާއިރާގެ މެންބަރު އަބްދުލް ޣަފޫރު އެއްސެވި ސުވާލަކަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު ފަޒުލް ރަޝީދު ދެއްވި ޖަވާބާ އެކުގައެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީ ގައި ޣަފޫރު ވަނީ 18 މިލިއަން ޑޮލަރު (278 މިލިއަން ރުފިޔާ) ލިފްޓްތައް ހަރުކުރުމަށް ހޭދަވޭތޯ އައްސަވާ ފަޒުލް އާ ސުވާލު ކުރައްވާފައެވެ.

އެ ސުވާލާ ގުޅިގެން ފަޒްލް ވިދާޅުވީ އެއީ ތެދެއް ކަމަށެވެ.

ޗައިނާގެ ޝެންޔެންގެ ޔުއަންޝާ އިންޓެލެކްޗުއަލް އިންޑަސްޓްރީ ގްރޫޕާ ހަވާލު ކޮށްގެން ކުރިއަށް ގެންދާ ހިޔާ ފްލެޓުތަކުގައި ލިފްޓު ހަރުކުރުމުގެ މަޝްރޫއު އަކީ ރައީސް އޮފީހުގެ އިކޮނޮމިކް ކައުންސިލުން ނިންމައިގެން ކުރިއަށް ގެންދާ މަސައްކަތެއް ކަމަށް ވެސް ފަޒުލް ކޮމިޓީ ގައި ވިދާޅުވިއެވެ.

މި މަސައްކަތުގެ ތެރެއިން 16 ޓަވަރުގައި 32 ލިފްޓް ހަރުކުރާއިރު، ލިފްޓަކަށް 550،000 އެމެރިކާ ޑޮލަރު 8.5 މިލިއަން ރުފިޔާ ހޭދަވާނެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީ އަށް އެޗްޑީސީގެ މެނޭޖިންގ ޑިރެކްޓަރ ބުދަ ދުވަހު ހާޒިރު ކުރީ އެޗްޑީސީއަށް އެކި ވިޔަފާރިތަކުން ދައްކަން ޖެހި ނުދައްކައިވާ ފައިސާއާ ގުޅިގެން ސުވާލު ކުރުމަށެވެ.

ހިޔާ ފްލެޓް ތަކުގައި ލިފްޓް ހަރުކުރުމުގެ މަސައްކަތް ހަވާލު ކޮށްފައިވަނީ އިންތިހާ އަށް ބޮޑު އަގުގައި އޭގައި ކަރަޕްޝަން އެކުލެވޭ ގޮތައް ކަމަށް އާންމުންގެ ތެރޭގައި ވާހަކަތައް ފެތުރިފައިވާއިރު، ލިފްޓް ތައް ހަރުކުރާ އަގަކީ ބޮޑު އަގެއް ކަމަށް ދެކެންތޯ މެންބަރަކު ސުވާލު ކުރުމުން އެ ސުވާލަށް ފަޒުލް ޖަވާބެއް ނުދެއްވައެވެ.

މައުލޫމާތު ލިބިފައިވާ ގޮތުގައި ލިފްޓްތަކުގެ އަގުގެ ގޮތުގައި ޗައިނާގެ ކުންފުންޏަށް 18.3 މިލިއަން ޑޮލަރު ދެއްކުމުގެ އިތުރުން، ލިފްޓް ތައް ހަރު ކުރުމަކީ އަދި ވަކި ޚަރަދެކެވެ. އެކަމަށް އިތުރު 17.6 މިލިއަން ރުފިޔާ ހޭދާވާ ކަމަށްވެއެވެ.