މާލޭގެ ދަފްތަރުގައި ޖެހިފައިވާތާ 20 އަހަރަށްވުރެ ގިނަ ދުވަސްވެފައިވާ މީހުންނާއި މާލޭގައި 20 އަހަރަށްވުރެ ގިނަ ދުވަހު އުޅޭކަން ކަށަވަރުކޮށްދޭ އެންމެންނަށް ޚާއްސަކޮށް ގޯއްޗާއި ފްލެޓް ލިބޭނެ ހައުސިންގ ސްކީމެއް އެކުލަވާލާފައިވާކަމަށް ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މާލޭ ރަށްވެެހިންނަށް އެކަނި ގޯއްޗާއި ފްލެޓް ދިނުމަށް ކުރިޔަށްގެންދިޔަ ބިންވެރިޔާ ސްކީމަށް ގިނަ ބައެއްގެ ފާޑުކިޔުން އަމާޒުވެފައިވާއިރު އަންގާރަ ދުވަހުގެ ރޭ ގަލޮޅު ކަންމަތީގައި ކުރިޔަށްގެންދިޔަ ކަންމަތީ ބައްދަލްވުމުގައި ވާހަކަދައްކަވަމުން ރައީސް ވިދާޅުވީ މާލޭގައި ދިރިއުޅޭ ރައްޔިތުންނަށް އޮތް އެންމެ ބޮޑު ދައްޗަކީ ބޯހިޔާވަހިކަންކަމަށެވެ. މާލޭގައި އެތައް އަހަރަކު އުޅޭ މީހާއަށް އޭނާ އުފަން ބިމުން ބޯހިޔާވަހިކަން ނުލިބޭއިރު މާލެއިންވެސް ބޯހިޔާވަހިކަން ލިބޭނެ މަގެއްނެތްކަމަށް ރައީސް ވިދާޅުވިއެވެ.
އެހެންކަމުން މިސަރުކާރުން މިމައްސަލައަށް ހައްލު ގެނައުމަށް އެކަމާއި ގުޅުންހުރި ސިޔާސަތުތައް މިހާރު އެކުލަވާލާފައިވާކަމަށް ރައީސް ވިދާޅުވިއެވެ.
މާލޭގައި ދިރިއުޅޭ، ދަފްތަރުގައި ޖެހިފައިވާ 20 އަހަރަށްވުރެ ގުނަ ދުވަސްވީ މީހުންނާއި މާލޭގައި 20 އަހަރަށް ވުރެ ގިނަ ދުވަހު އުޅޭކަން ކަށަވަރުކޮށްދޭ އެންމެންނަށް ހައުސިންގ ސްކީ،މް ދަށުން ފްލެޓާއި ގޯތި ދޫކޮށްދޭނަން. އެކަމުގެ ސިޔާސަތުތައް މިދިޔަ ދެތިން ދުވަހުގެ ތެރޭގައި ވަނީ ކަނޑައަޅާފައި. ދެން އޮތީ ފައިނަލްކޮށް އެކަން އިއުލާންކުރުން. އިރާދަކުރެއްވިއްޔާ މާލޭގައި ދިރިއުޅޭ މާލޭގެ ރަށްވެހިންނާއި ހިޖުރަކޮށްގެންއުޅޭ އެންމެންނަށް ދާއިމީ ބޯހިޔާވަހިކަމެއް ހޯދައިދޭނަން.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ވިދާޅުވީ މިސަރުކާރުން ކުރިންވެފައިވާ ބޯހިޔާވަހިކަމުގެ ވައުދުގެ ތެރެއިން ކަސްޓަމްސް އާއި ޔުނިވަރސިޓީ އާއި ކަރެކްޝަންސްގެ މުވައްޒަފުންނަށް ފްލެޓް ދިނުމުގެ ކަންކަން މިހާރު ހިނގަމުންދާކަމަށެވެ. އެގޮތުން ކަސްޓަމްސްގައި މަސައްކަތްކުރާ ފަރާތްތަކުގެ ތެރެއިން ފްލެޓް ލިބޭ މީހުން މިހާރު ހާމަކޮށްފައިވާއިރު ކުރިޔަށް އޮތްތަނުގައި ޔުނިވަރސިޓީތަކާއި ކަރެކްޝަންސްގެ މުވައްޒަފުންގެ ފްލެޓްތައްވެސް ހަވާލުކުރާނެކަމަށް ރައީސް ވިދާޅުވިއެވެ.
މީގެއިތުރުން އެމްޕީއެލްގެ މުވައްޒަފުން މީގެ ދެދުވަސްކުރިން ރައީސް އާ ބައްދަލުކުރައްވާ އެމްޕީއެލް ފްލެޓްތަކުގެ ޑައުންޕޭމަންޓާއި ކުލި ބޮޑުކަމުގެ ޝަކުވާކޮށްފައިވާކަމަށާއި އެމްޕީއެލް ފްލެޓްތައް ލިބޭ ފަރާތްތަކުގެ ޑައުންޕޭމަންޓް ކުޑަކޮށް ކުއްޔަށް ހެޔޮބަދަލެއް ގެންނަވާނެކަމަށް ރައީސް ވިދާޅުވިއެވެ. އެކަންވެސް ވަރަށް އަވަހަށް އިއުލާންކުރައްވާނެކަމަށް ރައީސް ވިދާޅުވިއެވެ.
މީގެއިތުރުން މާލޭގެ ގޭގެއަށް ކުރާ ޒިޔާރަތުގައި ގިނަ ބައެއްގެ ކަންބޮޑުވުމެއްގެ ގޮތުގައި ފާހަގަކުރެވުނު ވިނަރެސް ފްލެޓްގެ ޑައުންޕޭމަންޓާއި ކުލި ބޮޑުވުމުގެ މައްސަލައަށް ހައްލު ގެނައުމުގެ ގޮތުން އެތަނުގެ ޑައުންޕޭމަންޓަށް ބަދަލު ތަކެއް ގެނެސް ކުލި ކުޑަކޮށް ހެޔޮ ބަދަލެއްގެންނަވާނެކަމަށާއި އެކަންވެސް އިއުލާންކުރައްވާނެކަމަށް ރައީސް ވިދާޅުވިއެވެ.
