ފައިނަލުގެ ފުރަތަމަ ޖާގަ މިސްކިތްމަގު އެންމެންގެ ގުޅުން ހޯދައިފި

ވީއޭއެމް 26 ވަނަ ވޮލީބޯލް އެސޯއިއޭޝަން ކަޕް އަންހެން ޑިވިޝަންގެ ފައިނަލުގެ ފުރަތަމަ ޖާގަ މިސްކިތްމަގު އެންމެންގެ ގުޅުން ހޯދައިފިއެވެ.

މިސްކިތްމަގު ޓީމުން ފައިނަލަށް ދަތުރުކުރީ ފުރަތަމަ ސެމީގައި ޕޮލިސް ކުލަބާއި ވާދަކޮށް 3-1 ސެޓުން މެޗް ކާމިޔާބުކޮށްގެންނެވެ. މުބާރާތުގައި މިސްކިތްމަގު ޓީމުން މޮޅު ކުޅުމެއް ދައްކަމުން އަންނައިރު އެޓީމުން ފައިނަލަށް ދަތުރުކޮށްފައި މިވަނި 100 ޕަސެންޓް މޮޅާ އެކުގައެވެ.

ފޯރިގަދަ ކުޅުމެއް ފެނިގެންދިޔަ ސެމީގެ ފުރަތަމަ މެޗުގެ ފުރަތަމަ ދެސެޓު ވެސް ކާމިޔާބުކުރީ މިސްކިތްމަގު ޓީމުންނެވެ. އެޓީމުން ސެޓްތައް ގެންދިޔައީ 25-22 އަދި 25-23 އިންނެވެ. ޕޮލިސް ކުލަބުން ވަނީ ކުޅުން ވަރުދަގަކޮށް ތިން ވަނަ ސެޓު އަތުލާފައެވެ. އެގޮތުން އެޓީމުން ތިން ވަނަ ސެޓު ގެންގޮސްފައިވަނި 25-18 އިންނެވެ. ނަމަވެސް މިސްކިތްމަގު ޓީމުން ވަނީ އެޓިމްގެ ފޯމުގައި ކުޅެ ހަތަރު ވަނަ ސެޓު 25-20 ކާމިޔާބުކޮށް ފައިނަލުގެ ޖާގަ ކަށަވަރު ކޮށްފައެވެ. މެޗުގެ މޮޅު ކުޅުންތެރިއަކަށް ހޮވުނީ މިސްކިތްމަގު ޓީމުގެ އައިމިނަތު އަރީޝާއެވެ.

ޕޮލިސް މި މެޗުން ބަލިވި ނަމަވެސް އެޓީމަށް އަދިވެސް ފައިނަލުގެ ފުރުސަތު އެބަ އޮތެވެ. އެޓިމަށް ޖެހޭނީ ނުރާސްފަތި ދުވަހު ކުޅޭ 3 ވަނަ ސެމީގައި ފްރެންޑްސް ކްލަބް ފުނާޑާއި ދެކޮޅަށް ވާދަކުރާށެވެ.

ފްރެންޑްސް ކްލަބް ފުނާޑުން 3 ވަނަ ސެމީއަށް ދަތުރުކުރީ ދެވަނަ ސެމީގައި ދަ ފޭދޫ ސްޕޯޓްސް އާއި ދެކޮޅަށް ކުޅުނު މެޗު ސީދާ 3 ސެޓުން ކާމިޔާބުކޮށްގެންނެވެ. އެމެޗުގެ ސެޓުތަށް ފުނާޑުން ގެންދިޔައީ 25-11، 25-22 އަދި 25-20 އިންނެވެ. ބުދަ ދުވަހު ހަވީރު ކުޅުނު މި މެޗުގެ މޮޅު ކުޅުންތެރިއަކަށް ހޮވުނީ ފްރެންޑްސް ކްލަބް ފުނާޑުގެ އައިޝަތް ޝައްފައެވެ.

ތިންވަނަ ސެމީފައިނަލް މެޗް ކުޅުމަށް ހަމަޖެހިފައިވަނީ ބުރާސްފަތި ދުވަހުއެވެ. ފުވައްމުލައް ސިޓީގައި ކުރިއަށްދާ މި މުބާރާތުގެ ފައިނަލް މެޗް ކުޅުމަށް ހަމަޖެހިފައިވަނީ މިމަހުގެ 22 ވަނަ ދުވަހުއެވެ.