ޔުއެފާ ޗެމްޕިއަންސް ލީގު ގްރޫޕް ސްޓޭޖުގެ ފުރަތަމަ މެޗުގައި ސްޕެއިންގެ ބާސެލޯނާއާ ދެކޮޅަށް ނިކުންނައިރު، އެ ޓީމުގެ ވަރުގަދަކަމާ މެދު ސަމާލުވާނެ ކަމަށް ރޯޔަލް އެންޓްވާޕްގެ ކޯޗު މާން ވެން ބޮމެލް ބުނެފި އެވެ.

ބާސެލޯނާ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ވެން ބޮމެލް ބުނީ، ފާއިތުވި އަހަރުތަކުގައި ބާސެލޯނާ އޮތީ އަސްލު އެމީހުންގެ ފެންވަރުގައި ނޫން ކަމަށެވެ. އެހެން ނަމަވެސް، ބާސެލޯނާގެ ކޯޗުކަމާ ޒަވީ ހެނާންޑޭޒް ހަވާލުވި ފަހުން، އެ ޓީމު މަޑުމަޑުން އެ ފެންވަރަށް ޖެހެމުން އަންނަ ކަމަށް އޭނާ ވަނީ ބުނެފަ އެވެ. ވެން ބޮމެލް ބުނީ އޭނާ ދެކޭ ގޮތުގައި ބާސެލޯނާ އިން އެ މަސައްކަތް ކުރުމުގައި ދެމި ތިބެން ޖެހޭ ކަމަށާއި، އެ ޓީމަށް ޔުއެފާ ޗެމްޕިއަންސް ލީގު ވެސް ކާމިޔާބު ކުރެވޭނެ ކަމަށެވެ. އޭނާ ބުނީ ޒުވާން ކުޅުންތެރިންނާއެކު ބާސެލޯނާ އިން ކުޅެމުން އަންނަނީ، ޔޫރަޕުގެ އެންމެ މަތީ ފަންތީގައި އެ ޓީމަށް ފައިތިލަ ސާބިތުކޮށްލެވޭނެ ފެންވަރުގެ ކުޅުމެއް ކަމަށެވެ.

ވެން ބޮމެލް ބުނީ ބާސެލޯނާއާ ދެކޮޅަށް ކުޅެން އެންޓްވާޕަށް އުނދަގޫ ވާނެ ކަމަށާއި، ނަމަވެސް މިއީ މުބާރާތަކަށްވުމުން އެ ޓީމުން ވެސް ފަސް ނުޖެހޭނެ ކަމަށެވެ. އޭނާ ބުނީ ބާސެލޯނާގެ ވަރުގަދަ ކަމަށާއި، އެ ޓީމުގެ ނުރައްކާތެރިކަމާމެދު ވަންޓްރާޕް ވަރަށް ބޮޑަށް ސަމާލުވާނެ ކަމަށެވެ. އެ ޓީމުގެ ކުޅުންތެރިން ވެސް މަސައްކަތް ކުރާނީ އެ މެޗުން އެކަށީގެންވާ ނަތީޖާއެއް ނެރުމަށް ކަމަށާއި، އެ ޓީމުގެ އަމާޒަކީ ވެސް އެއީ ކަމަށް ވެން ބޮމެލް ވަނީ ބުނެފަ އެވެ. އޭނާ ބުނީ ބާސެލޯނާއާ ދެކޮޅަށް ކޯޗެެއްގެ ގޮތުގައި ނިކުތުމަކީ ވެސް ވަރަށް ބޮޑު ޝަރަފެއް ކަމަށެވެ. ބާސެލޯނާގައި ކުޅުނު ދުވަސްވަރު، އެ ޓީމާއެކު ގިނަ ހަނދާންތަކެއް އޮތް ކަމަށެވެ.

ވެން ބޮމެލް ވަނީ 2005 ވަނަ އަހަރުން 2006 ވަނަ އަހަރަށް ބާސެލޯނާ އަށް ކުޅެފަ އެވެ. ބާސެލޯނާ ދޫކޮށް ދެން އޭނާ ބަދަލުވީ ބަޔާން މިއުނިކަށެވެ.