ވޯލްޑްކަޕުގައި ކުޅެވޭނެތޯ ބަލަން ޕާކިސްތާން ބޯލަރު އިނގިރޭސިވިލާތަށް

ޕާކިސްތާނުގެ ބާރު އުކުންތެރިޔާ ނަސީމް ޝާހަށް ވޯލްޑްކަޕުގައި ކުޅެވޭނެތޯ ޔަގީންކުރުމަށް، ފަރުވާ އަށް އޭނާ އިނގިރޭސި ވިލާތަށް ފޮނުވަން ނިންމައިފި އެވެ.

އުމުރުން 20 އަހަރުގެ ޝާހުގެ ކޮނޑަށް އަނިޔާވީ އޭޝިޔާ ކަޕުގައި ޕާކިސްތާނާއި އިންޑިޔާ ކުޅުނު މެޗުގެ ފަހު ބައިގެ ތެރޭގަ އެވެ. އިންޑިޔާ އާއި ޑުބާއީން އޭނާގެ ކޮނޑުގެ އެމްއާރުއައި ވަނީ ހަދާފަ އެވެ. ނަމަވެސް ޕާކިސްތާނުގެ ކްރިކެޓް ބޯޑުން ބޭނުންވަނީ އިނގިރޭސި ވިލާތުގެ ސިއްހީ މާހިރުންގެ ލަފާ ހޯދުމަށެވެ.

އިންޑިޔާގައި ބާއްވާ ވޯލްޑްކަޕް ފަށާނީ އަންނަ މަހުގެ ފަސް ވަނަ ދުވަހު އެވެ. އޭޝިޔާ ކަޕުގެ ފައިނަލަށް ނުގޮސް ކަޓާފައިވާތީވެ ޕާކިސްތާނުގެ އުއްމީދަކީ ވޯލްޑްކަޕަށް ޓީމު ވަރުގަދަ ކުރުމެވެ. އެ ގައުމުން ވަނީ 1992ގެ ވޯލްޑްކަޕް ކާމިޔާބުކޮށް 99ގެ ފައިނަލްގައި ކުޅެފަ އެވެ.