ވިރާތު ކޯލީގެ ރެކޯޑާއެކު އިންޑިޔާ ފައިނަލަށް

ވިރާތު ކޯލީގެ ރެކޯޑާއެކު ކްރިކެޓް ވޯލްޑްކަޕުގެ ފައިނަލަށް އިންޑިޔާ ދަތުރުކޮށްފި އެވެ.

އަމިއްލަ ގައުމުގައި ކުޅެމުންދާ ވޯލްޑްކަޕުގެ ފައިނަލަށް އިންޑިޔާ ދިޔައީ އެންމެ ފަހުގެ ރަނައަޕް ނިއުޒީލޭންޑް 71 ލަނޑުން ބަލިކޮށްގެންނެވެ.

އިންޑިޔާއިން މި މެޗުގައި ފުރަތަމަ ބެޓްކޮށް 397 ލަނޑު ހެދި އެވެ. މީގެ ތެރޭގައި ކޯލީ ހެދި 113 ލަނޑު ވެސް ހިމެނެ އެވެ. މިއާއެކު އޭނާ ވެގެންދިޔައީ އެއް ދުވަހުގެ ކްރިކެޓްގައި އެންމެ ގިނައިން ސައްތަ ހަމަކުރި ކުޅުންތެރިޔާ އަށެވެ. އިއްޔެގެ މެޗަކީ އޭނާ 100 ލަނޑު ހަމަކުރި 50 ވަނަ މެޗެވެ. ކުރިން މި ރެކޯޑް އޮންނަނީ އިންޑިޔާގެ ބެޓްސްމަން ސަޗިން ޓެންޑުލްކަރު އަތުގަ އެވެ.

ވިރާތު ކޯލީ ބުނީ މިއީ "ދެކެމުން އައި ހުވަފެން ހަގީގަތަށްވުން،" ކަމަށެވެ.

އޭނާ ބުނީ ޓެންޑުލްކަރަކީ އިންޑިޔާގެ ކްރިކެޓާއި ދުނިޔޭގައި ބެޓިންގެ ރަސްގެފާނު ކަމަށާއި އޭނާ އަތުގައި އޮތް ރެކޯޑެއް ހޯދުމަކީ ވަރަށް އުނދަގޫކަމެއް ކަމަށެވެ.

ކްރިކެޓް ވޯލްޑްކަޕުގެ ފައިނަލުގައި އިންޑިޔާއާ ދެކޮޅަށް ނުކުންނާނީ ދެކުނު އެފްރިކާ އާއި އޮސްޓްރޭލިޔާ މިއަދު ބައްދަލުކޮށް މޮޅުވާ ގައުމެކެވެ.