ކުޅުދުއްފުށި ސިޓީގެ ލޭބަރ ކުއާޓާއެއްގައި ރޯވި އަލިފާންގަނޑު ނިއްވާލައިފި

ކުޅުދުއްފުށި ސިޓީގެ ލޭބަރ ކުއާޓާއެއްގައި އަލިފާނުގެ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދޭ ގޮތުގައި މި ހާދިސާ ހިނގާފައިވަނީ އެ ސިޓީގައި ކުރިއަށްގެންދާ 400 ހައުސިންގ ޔުނިޓުގެ ލޭބަރ ކުއާޓާއެއްގައެވެ. އެ ތަނުގައި ރޯވި އަލިފާން އެމްއެންޑީއެފް ނޮދަން އޭރިއާ ކޮމާންޑް، ކުޅުދުއްފުށި ފަޔަރ ސްޓޭޝަނުގެ ފަޔަރފައިޓަރުން ހަރަކާތްތެރިވެ ނިއްވާލާފައިވާ ކަމަށް ވެސް އެ އިދާރާއިން މައުލޫމާތު ދީފައި ވެއެވެ.

އެމްއެންޑީއެފުން ބުނި ގޮތުގައި މި ހާދިސާގެ ރިޕޯޓު ނޮދަން އޭރިއާ ކޮމާންޑް، ކުޅުދުއްފުށި ފަޔަރ ސްޓޭޝަނަށް ލިބުނީ ހޮނިހިރު ދުވަހުގެ މެންދުރު 14:35 އެހާއިރުއެވެ. މި ހާދިސާގެ ރިޕޯޓު ލިބުމާއެކު އެ ފަޔަރ ސްޓޭޝަންގެ ފަޔަރފައިޓަރުން އެ ސަރަހައްދަށް ގޮސް ރޯވެފައިވާ އަލިފާން ގަނޑު 15:05 އެހާއިރު ނިއްވާލާފައިވާ ކަމަށް ބުނެފައިވެއެވެ.

މި ހާދިސާގައި ލިވިންގ ކުއާޓަރުގެ އެތެރެ ބޭނުން ނުކުރެވޭ ވަރަށް އަނދާފައިވާ ކަމަށާ ރޯވާން ދިމާވި ސަބަބު އަދި ސާފު ނުވާކަމަށް ޚަބަރު ލިބެއެވެ.

ނަމަވެސް އެއްވެސް މީހަކަށް އަނިޔާއެއް ލިބިފައިނުވާ ކަމަށް އެމްއެންޑީއެފުން މައުލޫމާތު ދެއެވެ.