މި ސަރުކާރުގައި މިނިވަން މުއައްސަސާއަކުން ބަލަމުން ދިޔަ އެއްވެސް މައްސަލައަކަށް ނުފޫޒު ފޯރުވާފައެއްނުވޭ: މެންބަރު އަހުމަދު އީސާ
16 ސެޕްޓެމްބަރު 2023 | ހޮނިހިރު 07:45ބަލަމުން ދިޔަ މައްސަލައަކަށް ސަރުކާރުން ވަދެ، އެމައްސަލައެއް ހުއްޓުވާފައެއްނުވޭ
ކެބިނެޓް ބައްދަލުވުމެއްގެ ތެރެއިން
ރައީސުލްޖުމްހުރިއްޔާ އިބްރާހީމް މުހައްމަދު ސާލިހުގެ ސަރުކާރުގައި މިނިވަން މުއައްސަސާއަކުން ބަލަމުން ދިޔަ އެއްވެސް މައްސަލައަކަށް ނުފޫޒު ފޯރުވާފައި ނުވާކަމަށާއި، މިނިވަންކަމާއެކު މަސައްކަތް ކުރުމުގެ ފުރުސަތު ފަހިކޮށްދިން ކަމަށް ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މެންބަރު ވިދާޅުވީ، މި ސަރުކާރުގެ ފަސް އަހަރުގެ ތެރޭގައި މިނިވަން މުއައްސަސާތަކުން މަސައްކަތް ކުރަމުންދަނީ ވަރަށް މިނިވަންކަމާއެކު އެއްވެސް ނުފޫޒެއްނެތި ކަމަށެވެ. އެ މުއްސަސާއަކުން ބަލަމުން ދިޔަ މައްސަލައަކަށް ސަރުކާރުން ވަދެ، އެ މައްސަލައެއް ހުއްޓުވާފައި ނުވާކަމަށް މެންބަރު ވިދާޅުވިއެވެ. ނަމަވެސް ކުރީގެ ރައީސް އަދި މިހާރު ޖަލު ހުކުމެއް ތަންފީޒު ކުރައްވަމުން ގެންދަވާ އަބްދުﷲ ޔާމީންގެ ވެރިކަމުގައި، މިނިވަން މުއައްސަސާތަކުން މައްސަލަތައް ބަލަން ފެށުމުން ނުފޫޒު ފޯރުވި މިންވަރު ރައްޔިތުންނަށް ފެނިފައިވާ ކަމަށް އޭނާ ވިދާޅުވިއެވެ. އަދި އޭރުގެ އޮޑިޓަރ ޖެނަރަލް އަމިއްލަ ފުރާނަފުޅުގެ ރައްކާތެރިކަން ހޯއްދެވުމަށް ޖެހިވަޑައިގަތީ ރާއްޖެ ދޫކުރައްވައި ވަޑައިގަންނަވަން ކަމަށް މެންބަރު ވިދާޅުވިއެވެ.
ޔާމީންގެ ދައުރުގައި އޮޑިޓަރ ޖެނެރަލް މަގާމުގައި ހުންނެވީ ނިޔާޒު އިބްރާހީމެވެ.
މީގެ އިތުރުން މެންބަރު އަހުމަދު އީސާ ވިދާޅުވީ، ވަކި މައްސަލައެއް ބެލުމަށް ރައްޔިތުން މަޖިލީހުގެ މެޖޯރިޓީގެ ބާރުގެ ބޭނުންކޮށްފައި ނުވާނެކަމަށާއި، ސަރުކާރުގެ ވަކި ވަޒީރެއްގެ މައްސަލަ ބަލާތީ ކަމަށް ބުނެ ހުއްޓުވާފައި ނުވާނެކަމަށެވެ. އަދި މިނިވަން މުއައްސަސާތަކުގެ ބޭފުޅުން މަގާމުތަކުން ދުރުކުރުމަށް ވެސް މިސަރުކާރުން މަސައްކަތްކޮށްފައި ނުވާކަމަށް މެންބަރު ވިދާޅުވިއެވެ. ނަމަވެސް ޕީޕީއެމްގެ ވެރިކަމުގައި މިކަންކަން ހިނގާފައިވަނީ އިދިކޮޅަށް ކަމަށް މެންބަރު ވިދާޅުވިއެވެ.
މެންބަރު ވިދާޅުވީ މިއަދު މިނިވަން މުއައްސަސާތަކުގެ ބޭފުޅުންނަށް އެބޭފުޅުންގެ ޒިންމާ ބިރެއްނެތި އަދާކުރެއްވޭ ކަމަށެވެ.
ކުރިއަށް އޮތް ރިޔާސީ އިންތިޚާބުގެ ދެވަނަ ބުރަށް އިޝާރާތް ކުރައްވައި މެންބަރު އަހުމަދު އީސާ ވިދާޅުވީ، މިއީ ގައުމުގެ މުސްތަގުބަލާ ވަރަށް ބޮޑަށް ގުޅިފައިވާ ކަމެއް ކަމަށެވެ. އަދުލުވެރި އިޚްލާސްތެރި ވެރިން އިޚްތިޔާރުކުރަން ޖެހޭކަމަށާއި، ރައްޔިތު މީހާގެ އަތުގައި އޮންނަ ވޯޓު ދޫކޮށްލަން ވާނީ ޒިންމާދާރުކަމާއެކު ކަމަށެވެ. މީހަކު ނުވަތަ ބަޔަކު ދައްކާހާ ވާހަކައަށް ބަލަން ނުޖެހޭކަމަށާއި، ރާއްޖޭގެ މާޒީއަށް ބަލާފައި، ގޮތް ނިންމަންޖެހޭ ކަމަށް މެންބަރު ވިދާޅުވިއެވެ.
