ޑިމޮކްރަޓްސްއިން މިވަގުތު އެދޭގޮތަކީ, ރައީސުލްޖުމްހޫރިއްޔާއަށް ގާނޫނު އަސާސީން ލިބިދޭ ބާރުގެ ދަށުން ވެރިކަމުގެ ނިޒާމު ބަދަލުކުރުމާމެދު ފެންނަ ނުފެންނަ ވޯޓަކަށް ދިޔުންކަމަށް, އެޕާޓީގެ ވަގުތީ ޗެއަރޕަރސަން ހަސަން ލަތީފް ވިދާޅުވެއްޖެއެވެ.
ޑިމޮކްރަޓްސްއިން ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ހަސަން ލަތީފް ވިދާޅުވީ، ގާނޫނު އަސާސީގެ 4 ވަނަ ބާބަށް ގެންނަ ބަދަލާއެކު ނިޒާމީ ވޯޓަކަށް ދިޔުމަށް ޑިމޮކްރަޓްސްއިން ހުށަހަޅާކަމަށެވެ. ޕާޓީތަކާއެކު ޑިމޮކްރަޓްސްއިން ކުރަމުން އަންނަ މަޝްވަރާއަކީ ވެރިކަމުގެ ނިޒާމު ބަދަލުކުރުމުގެ މަޝްވަރާއެވެ. މި މަޝްވަރާތައް މިވަގުތު އެމްޑީޕީއާއެކު ނުރަސްމީ ސިފައެއްގައި ކުރިޔަށްދާއިރު އެމްޑީޕީން މިކަމަށް އަދި އެއްބަސްވެފައި ނުވިނަމަވެސް، ދެބަސްވެފައިވެސް ނުވާކަމަށް ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ ގާނޫނު އަސާސީއަށް ރައްޔިތުންގެ މަޖިލީހުންވެސް ބަދަލު ގެނެވޭނެކަމަށާއި ނަމަވެސް އެންމެ އަވަހަށް ނިޒާމީ ވޯޓެއް ނެގެން އަންނަނީ ރައީސަށް ގާނޫނު އަސާސީން ލިބިދޭ ބާރުން އެކަން ކުރުމުންކަމަށެވެ.
އަޅުގަނޑު ހިތުން އެކަން އެއީ ރައީސަށް މިވަގުތު ކުރެވެން އޮތް ކަމެއް. ގާނޫނު އަސާސީގަ އޮންނަ ގޮތުން އެއީ ރައީސަށްވެސް ކުރެވެން އޮންނަ ކަމެއް، އަދި ރައްޔިތުންގެ މަޖިލީހަށްވެސް ކުރެވެން އޮންނަ ކަމެއް. އަޅުގަނޑުމެން މި އެދެނީ ރައީސް އަރިހުގަ އެކަން ކުރުމަށް. ރައްޔިތުންގެ މަޖިލީހަށްވުރެ އަވަހަށް، އަދި ޑިމޮކްރަޓުން ދެކޭގޮތުގަ މިވަގުތު ކުރަންވަންވާނީވެސް ރަނގަޅު ނިޔަތެއް އޮންނަ ކަމަށްވާނަމަ، ރައީސުލްޖުމްހޫރިއްޔާ އެކަން.ވަގުތީ ޗެއަރޕަރސަން، ހަސަން ލަތީފް
ޑިމޮކްރަޓުން ހުށަހަޅަނީ ރިޔާސީ އިންތިޚާބުގެ ދެވަނަ ބުރުގެ ކުރިން ސެޕްޓެމްބަރު މަހުގެ 25 ވަނަ ދުވަހު ނިޒާމީ ވޯޓެއް ނެގުމަށެވެ. ހަސަން ލަތީފް ވިދާޅުވީ މިއޮތް މުއްދަތުގެ ތެރޭގައި އެކަމަށް ރައްޔިތުން ހޭލުންތެރިވެސް ކުރެވޭނެކަމަށާއި އިލެކްޝަންސް ކޮމިޝަނަށް އެކަމުގެ ތައްޔާރީތައްވެސް ވެވޭނެކަމަށެވެ.
އީސީން މިހާރުވެސް އަންނަނީ އިންތިޚާބަށް ތައްޔާރުވުމުގެ މަސައްކަތްތަކެއް ކުރަމުންކަމަށް ހަސަން ލަތީފް ވިދާޅުވިއެވެ.
ޚަރަދުގެ ގޮތުން މިހާރު ފުރަތަމަ ބުރު މިއޮތީ ނިމިފަ. ދެވަނަ ބުރަށް އީސީން އެ އަންނަނީ ތައްޔާރުވަމުން. ދެން އީސީގެ ވަރަށް ބައިވަރު މަސައްކަތް މުޅި ރާއްޖޭގައި ހިނގަމުންދާކަމަށް ގަބޫލުކުރެވޭ. ކުޑަކުޑަ މިސާލެއް؛ މިސާލަކަށް ވޯޓު ފޮށިތައް ހުރީ އަދިވެސް ރަށްރަށުގަ. އެވޯޓު ފޮށިތައް ފޮނުވުމެއް ނެތް. 30ށް އެހުރީ . ކަރުދާސް ޗާޕުކުރުން އޮންނާނެ. އެކަހަލަ ޚަރަދު ހިނގާނެ. ދެން މިވަރުގެ ބޮޑު ކަމަކަށް ބަލާއިރު ނުކުރާންވީ ސަބަބެއް ނެތް އަދި ކިތަންމެ ބޮޑު ޚަރަދެއް ދިޔަޔަސް. އަދި އެހާ ބޮޑު ޚަރަދެއް ދާނީއެއް ނޫން. އިންތިޒާމުތައް އެހުރީ ހަމަޖެހިފަ. އޮފިޝަލުން އެތިބީ ނެގިފަ. ޓްރެއިނިންގ އެހުރީ ދެވިފަ.ވަގުތީ ޗެއަރޕަރސަން، ހަސަން ލަތީފް
ޑިމޮކްރަޓުން ޕީޕީއެމްއާއެކު ކުރިޔަށްދިޔަ މަޝްވަރާތަކުގައި، އެއްބަސްވާ ލިޔުމެއްގައި ސޮއިކުރުމަށް ޕީޕީއެމްއިން ދެކޮޅު ހަދާފައިވަތީ އެވާހަކަތައް ވަނީ ހުއްޓާލާފައެވެ.
