ފޯރީއާއެކު އެމްޑީޕީން މާފަންނުމެދު ދާއިރާގައި ޑޯޓުޑޯގެ ހަރަކާތްތައް ކުރިއަށް ގެންގޮސްފި
15 ސެޕްޓެމްބަރު 2023 | ހުކުރު 14:18މިހަރަކާތް ކުރިއަށް ގެންގޮސްފައިވަނީ ހުކުރު ދުވަހުގެ ހަވީރު 4:00ން 6:00ށް
ޑޯޓުޑޯގެ ހަރަކާތްތަކުގެ ތެރެއިން
ދެވަނަ ބުރުގެ ރިޔާސީ އިންތިޚާބާއި ގުޅިގެން އެމްޑީޕީން މާފަންނުމެދު ދާއިރާގައި ޑޯޓުޑޯގެ ހަރަކާތްތައް ކުރިއަށް ގެންގޮސްފިއެވެ.
މިހަރަކާތް ކުރިއަށް ގެންދިއުމުގައި އިސްކޮށް ހުންނެވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ކެމްޕެއިން ތަރުޖަމާނު މާރިޔާ އަހްމަދު ދީދީ އެވެ.
މިހަރަކާތް ކުރިއަށް ގެންގޮސްފައިވަނީ ހުކުރު ދުވަހުގެ ހަވީރު 4:00ން 6:00ށެވެ. މިހަރަކާތުގައި ގިނަ އަދަދެއްގެ އެމްޑީޕީ ސަޕޯޓަރުން ބައިވެރިވެފައިވެއެވެ.
ކެންޕޭން ޓީމުން ގިނަ އަދަދެއްގެ ގޭތަކަށް ގޮސް، ރައްޔިތުންގެ ހާލަތު ވަރަށް ގާތުން ބަލާފައިވާއިރު، ރައްޔިތުންގެ ކަންބޮޑުވުންތައް އަޑު އަހާފައިވެއެވެ. ކުރިއަށް އޮތްތަނުގައި ރައްޔިތުން އެދޭ ގޮތަށް މައްސަލަތައް ހައްލުކޮށްދޭނެ ކަމުގެ ޔަގީންކަން ދީފައިވެއެވެ. އެމްޑީޕީގެ މެނިފެސްޓޯއަށް އަލިއަޅުވާލައި، މެނިފެސްޓޯއަކީ ވެސް ރައްޔިތުންގެ ހިޔާލާ އެއްގޮތަށް ރައްޔިތުން ބާރުވެރިކުރުވުމަށް ތައްޔާރުވެފައިވާ މެނެފެސްޓޯއެއް ކަމަށް އެމްޑީޕީން ބުނެއެވެ.
ކުރިއަށް އޮތް ފަސް އަހަރަށް ރައީސް އިބްރާހިމް މުހައްމަދު ސާލިހު އިންތިޚާބު ވެއްޖެކަމުގައިވާނަމަ އެ މެނިފެސްޓޯ ތަންފީޒު ކުރެވިގެންދާނެ ކަމަށް އެމްޑީޕީން ބުނެއެވެ.
މިފަހަރުގެ ރިޔާސީ އިންތިޚާބުގެ ފުރަތަމަ ބުރުގައި ރައީސް ސާލިހަށް ލިބިވަޑައިގެންނެވީ ދެވަނަ އެވެ. އަދި ކުރި ހޯއްދެއްވީ ޕީއެންސީގެ ކެންޑިޑޭޓް ޑރ.މުހައްމަދު މުއިއްޒެވެ. އެކަމާއި ގުޅިގެން އެމްޑީޕީން ބުނެފައިވަނީ ކެންޕޭން ކުރުމުގައި ގޯސްތަކެއް ހެދިފައިވާ ކަމަށެވެ. އެހެންކަމުން ދެވަނަ ބުރުގެ ކެންޕޭންގައި އެމައްސަލަތަކަށް ހައްލު ލިބޭ ގޮތަށް ކެންޕޭންގެ ހަރަކާތްތައް ކުރިއަށް ގެންދާނެ ކަމަށް އެމްޑީޕީން ބުނެއެވެ. މީގެ އިތުރުން އެމްޑީޕީން ބުނީ ސަރުކާރަށް އަމާޒުކޮށް އިދިކޮޅު ދައްކާ ވާހަކަތަކަށް ރައްދު ދިނުމާއި، ދޮގު ވާހަކަތަކުގެ ހަގީގަތްތައް ރައްޔިތުންނަށް ހާމަކޮށްދޭނެ ކަމަށެވެ.
