ލޯން އެއްބަސްވުމެއްގެ ދަށުން ވެސްޓްހަމް ޔުނައިޓެޑަށް ޖޯ ހާޓް ސޮއިކޮށްފިއެވެ.

އުމުރުން 30 އަހަރުގެ ހާޓް ސިޓީއާއެކު ހަދާފައިވާ އެއްބަސްވުމުގައި ބާކީ ދެ އަހަރު އޮއްވާ އޭނާ ވެސްޓްހަމްއަށް ބަދަލުވީ ކިތައް އަހަރަށްކަމެއް އަދި ކަށަވަރެއް ނުވެއެވެ.

ވެސްޓްހަމްއަށް ބަދަލުވުމަށްފަހު އެ ކްލަބުގެ ރަސްމީ ވެބްސައިޓަށް މައުލޫމާތު ދެމުން ހާޓް ބުނީ ސިޓީއަކީ އޭނާއަށް ވަރަށް ހާއްސަ ކްލަބެއް ކަމަށާއި، އެހެންނަމަވެސް ރައިވަލް ކްލަބަކަށް ބަދަލުވާން ނިންމީ ވަރަށް ބައިވަރު ސަބަބުތަކަށްޓަކައި ކަމަށެވެ.

މިދިޔަ ސީޒަނުގައި ލޯން އެއްބަސްވުމެއްގެ ދަށުން ޓޮރީނޯއަށް ކުޅުނު ހާޓް ބުނީ އޭނާ އިޓަލީ ލީގުގައި ހޭދަކުރީ އުފާވެރި ދުވަސްތަކެއް ކަމަށާއި، އެހެންނަމަވެސް އެނބުރި އައިސް ޕްރިމިއާ ލީގު ކުޅެން ކެތް މަދުވެފައި ހުރި ކަމަށެވެ.

އެގޮތުން އޭނާ ބުނީ ވެސްޓްހަމްގައި ރަނގަޅު ކުޅުމެއް ދައްކާ ހާސިލްކުރެވެން އޮތް އެއްޗެއް ހާސިލްކުރަން އޭނާ އެހީތެރިވެދޭނެ ކަމަށާއި، ވެސްޓްހަމްއަކީ ރަނގަޅު ސަޕޯޓަރުންތަކެއް ތިބި ކްލަބެއް ކަމަށެވެ.

މެންޗެސްޓާ ސިޓީން ވިދާލި ހާޓް ޓޮރީނޯއަށް މި ސީޒަނުގައި ބަދަލުވެ އޭނާ ވަނީ 36 މެޗު ކުޅެފައެވެ. އެގޮތުން އޭނާ ވަނީ މެޗުތަކުގައި މޮޅެތި ސޭވްތަކެއްކޮށް، އިޓަލީ ސަޕޯޓަރުންގެ އިހުތިރާމު ހޯދާފައެވެ.

މެންޗެސްޓާ ސިޓީއާއެކު ދެ ޕްރިމިއާ ލީގު، އެފްއޭކަޕް އަދި ދެ ފުޓްބޯލް ލީގް ކަޕް ހޯދާފައިވާ ހާޓް ވަނީ ޕްރިމިއާ ލީގުގެ ގޯލްޑެން ގްލޯވް ޖެހި ޖެހިގެން ހަތަރު ފަހަރު ހޯދާފައެވެ. މީގެއިތުރުން އޭނާ ވަނީ އިންގްލޭންޑް ގައުމީ ޓީމަށް 70 މެޗު ވެސް ކުޅެދީފައެވެ.