ނޮވެމްބަރ 2018ގެ ކުރިން މިގައުމު އޮތް ކަޅު އަނދިރި ހާލަތަށް އަނެއްކާވެސް މިގައުމު ވައްޓާލާނީތޯ ނުވަތަ އުފާވެރި އަމާން ރާއްޖެއަކަށް ދާނީތޯ މިއަދު ސުވާލުކޮށްލަންޖެހޭ
އަދާލަތު ޕާޓީގެ ނާއިބު ރައީސް މުހައްމަދު އިއާދު ހަމީދު
ރިޔާސީ އިންތިޚާބުގެ ދެވަނަ ބުރު ކައިރިވަމުން އަންނައިރު ކޮންމެ ދިވެހި ރައްޔިތަކުވެސް އަނިޔާވެރިކަމަށް އަނެއްކާވެސް ފުރުސަތުދޭނީތޯ ނުވަތަ މިހާރު މިއޮތް ސުލްހަމަސަލަސްކަމާއި އަމާންކަން ދަމަހައްޓާނީތޯ ސުވާލުކޮށްލަންޖެހޭކަމަށް އަދާލަތު ޕާޓީގެ ނާއިބު ރައީސް މުހައްމަދު އިއާދު ހަމީދު ވިދާޅުވެއްޖެއެވެ.
އެމްޑީޕީ އާއި ގުޅިފައިވާ ޕާޓީތަކުން ބުދަ ދުވަހުގެ ރޭ ސޯސަން ޖަގަހަ ކުރިމަތީގައި ކުރިޔަށްގެންދިޔަ ކަންމަތީ ޖަލްސާގައި ވާހަކަފުޅުދައްކަވަމުން އިއާދު ވިދާޅުވީ ނޮވެމްބަރ 2018ގެ ކުރިން މިގައުމު އޮތް ކަޅު އަނދިރި ހާލަތަށް އަނެއްކާވެސް މިގައުމު ވައްޓާލާނީތޯ ނުވަތަ އުފާވެރި އަމާން ރާއްޖެއަކަށް ދާނީތޯ މިއަދު ސުވާލުކޮށްލަންޖެހޭކަމަށެވެ.
ކޮންމެ ދިވެހި ރައްޔިތަކުވެސް 2018 ގެ ކުރިން މިގައުމު އޮތް ހާލަތު ހަނދާނަށް ގެންނަންޖެހޭކަމަށް އިއާދު ވިދާޅުވިއެވެ.
އިއާދު ވިދާޅުވީ ދިވެހި ރައްޔިތުން އެ ފުރުސަތު ރިޔާސީ އިންތިޚާބުގެ ދެވަނަ ބުރުގައި ނުދޭނެކަމަށެވެ. ޕީޕީއެމް އަށް ވެރިކަން ލިބިއްޖެނަމަ ދަރިންގެ މުސްތަގުބަލަށް ވެގެންދާނެ ގޮތް ވިސްނާލަންޖެހޭކަމަށާއި އެހެންކަމުން ދެވަނަ ދައުރުގައި ރައްޔިތުން ނުކުމެ ދިވެހި ގައުމު ސަލާމަތްކުރާނެކަމަށް އިއާދު ވިދާޅުވިއެވެ.
