އިޓަލީގެ ޑިފެންޑަރު ލިއޮނާޑޯ ބޮނޫޗީ އޭނާ އެންމެ ފަހުން ކުޅުނު ކުލަބު ޔުވެންޓަސް އަށް ދައުވާކުރަން ނިންމައިފި އެވެ.
ޖަރުމަނުގެ ޔޫނިއަން ބާލިން އަށް ދާދި ފަހުން އޭނާ ބަދަލުވީ ޔުވެންޓަސްއިން އޭނާގެ ކޮންޓްރެކްޓް އުވާލުމުންނެވެ. އެކުލަބުން ވަނީ ކޮންޓްރެކްޓް އުވާލުމުގެ ކުރިން އޭނާ އަށް ޕްރެކްޓިހަށް ނުކުތުމަށް ވެސް އަންގައިފަ އެވެ.
އުމުރުން 36 އަހަރުގެ ބޮނޫޗީ ޔުވެންޓަސް އަށް ދައުވާ ކުރަން ނިންމީ ކޮންޓްރެކްޓް އުވާލި މައްސަލާގަ އެވެ. އޭނާ ބޮޑަށް މައްސަލަ ޖައްސަނީ އެކުލަބުގައި އެކަށީގެންވާ ވަސީލަތާއި ފަރިތަކުރުމާއި ފިޓްކޮށް ހުރުމަށް ހުރަސް އެޅިކަމުގެ ތުހުމަތުގަ އެވެ.
ބޮނޫޗީ ބުނީ މި މައްސަލަ އޭނާ އަށް ކާމިޔާބުވެ، ބަދަލުގެ ގޮތުގައި ލިބޭ ފައިސާ ހިލޭ ސާބަހަށް މަސައްކަތް ކުރާ ފަރާތްތަކާއި ބަލިމީހުންނާއި ހޮސްޕިޓަލްތަކަށް ހަދިޔާކުރަން ނިންމާފައިވާ ކަމަށެވެ.
ބޮނޫޗީ އަކީ 2020 ވަނަ އަހަރުގެ ޔޫރޯ އިޓަލީ އަށް ކާމިޔާބުކޮށްދިނުމުގައި މުހިންމު ދައުރެއް އަދާކުރި ކުޅުންތެރިއެކެވެ.
