މިނިވަން އިންސާފުވެރި ކޮމެޓީއެއް އެކުލަވާލައި ހަ މަސް ދުވަހުގެ ޕްލޭނަކާއެކު ވޮލީގައި މިވަގުތު ހުރި ދަތިތައް ރީފޯމް ކުރުމަށް މަސައްކަތްތަކެއް ކުރަމުން އަންނަ ކަމަށް ވޮލީބޯލް އެސޯސިއޭޝަންގެ ރައީސް މުހައްމަދު ލަތީފް (ލަތީބެ) ވިދާޅުވެއްޖެ އެވެ.
ޒުވާނުންގެ މަރުކަޒު ސެމިނާ ރޫމްގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުން ލަތީފް ވިދާޅުވީ ވޮލީގެ އާއިލާތަކާ ހަމައަށް ރަނގަޅު ގޮތުގައި ވޮލީ ރައްދުކުރުމަށްޓަކައި ރީފޯމް އެޖެންޑާ އަކާއެކު މަސައްކަތްތަކެއް ކުރަމުން އަންނަ ކަމަށާއި އެގޮތުން ހަތް މެމްބަރުންގެ މައްޗަށް އެކުލެވޭ ރީފޯމް ކޮމިޓީއެއް އެކުލަވާލައި އެކަން ވަރަށް އަވަހަށް ފެށިގެންދާނެ ކަމަށެވެ. އެގޮތުން މި ކޮމިޓީގައި ހިމެނެނީ މޯލްޑިވްސް އޮލިމްޕިކް ކޮމިޓީގެ މެމްބަރަކާއި ކުޅިވަރާބެހޭ މިނިސްޓްރީގެ މެމްބަރެއްގެ އިތުރުން ވީއޭއެމްގެ އެކްސްކޯގެ މެމްބަރަކާއި ވޮލީ ސީނިއާ ކޯޗަކާއި ގައުމީ ކުޅިވަރު އެސޯސިއޭޝަނެއްގެ ރައީސެއްގެ އިތުރުން ކުރީގެ ވޮލީ ކުޅުންތެރިޔެއް އަދި ގާނޫނީ ވަކީލެކެވެ.
ލަތީފް ވިދާޅުވީ މި މަސައްކަތް ކުރިއަށްދާނީ އެފްއައިވީބީ، އޭވީސީ އަދި މޯލްޑިވްސް އޮލިމްޕިކް ކޮމިޓީގެ ހިންގާ ގަވައިދާ އެއްގޮތްވާ ގޮތުގެ މަތިން ކަމަށެވެ. މީގެ އިތުރުން ދިވެހި ރާއްޖޭގެ ކުޅިވަރުގެ ގާނޫނަށް ބެލުމަށްފަހު އެއަށް ފުށު ނާރާ ގޮތަށް ރީފޯމް އެޖެންޑާ އަށް އިސްލާހުތައް ގެނައުމަށް މަސައްކަތްކުރާނެ ކަމަށް ލަތީފް ވިދާޅުވިއެވެ.
މި ބައްދަލުވުމުގައި އެންމެ ބޮޑަށް ވާހަކަ ދެކެވިގެންދިޔައީ ވޮލީގެ އިންތިހާބެއްގައި ވޯޓުލެވޭ ކްލަބުތަކުގެ ސައްހަކަމާ މެދު އެވެ. އެގޮތުން ގިނަ މުބާރާތްތަކެއްގައި ވާދަކުރާ އަބަދުވެސް އެކްޓިވް ކްލަބުތަކަށް ވޯޓްލެވޭ ގޮތް ހެދުމަށް ރީފޯމް އެޖެންޑާއަށް ހުށަހަޅުއްވާނެ ކަމަށް ލަތީފް ވިދާޅުވި އެވެ.
ލަތީފް ވިދާޅުވީ މިކޮމިޓީގެ މަސައްކަތްތައް ފެށިގެންދާއިރު، ވޮލީ އެސޯސިއޭޝަނުން ތަފާތު ހިޔާލުތައް ހުށަހަޅާނެ ކަމަށާއި އަދި އިސްލާހީ މަސައްކަތްތައް އެއްކޮށް ނިމިގެންދާއިރު ވޮލީއަށް ގެންނަންޖެހޭ ފުރިހަމަ ބަދަލުތައް ގެނެވިގެންދާނެ ކަމަށެވެ.
