އެމްޑީޕީން އެދުނު ގޮތަށް، އިތުބާރު ނެތްކަމުގެ މައްސަލަ މަޖިލީހުން ބޭރުކޮށްލައިފި
ރައީސް ނަޝީދުގެ މަގާމުން ވަކިކުރުމަށް ހުށަހަޅުއްވާފައިވާ ގަރާރުގައި ބާކީ އޮތީ 21 މެންބަރުންގެ ސޮއި
މަޖިލިސް ޖަލްސާގެ ތެރެއިން
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނާއިބު ރައީސް އީވާ އަބްދުﷲ މަގާމުން ވަކިކުރަން އެމްޑީޕީން ހުށަހެޅި މައްސަލަ ކުރިއަށް ނުގެންދަން ނިންމައި މައްސަލަ ބޭރުކޮށްލައިފި އެވެ.
ހޯމަ ދުވަހު ކުރިއަށް ގެންދިޔަ ރައްޔިތުންގެ މަޖިލީހުގެ ޖަލްސާގައި ރިޔާސަތުގައި އިންނެވި ތ.ވިލުފުށި ދާއިރާގެ މެންބަރު ހަސަން އަފީފު ވިދާޅުވީ އެ މައްސަލައިގައި ސޮއިކުރެއްވި ގިނަ މެންބަރުންތަކެއް އެ ބޭފުޅުންގެ ސޮއި އަނބުރާ ނަންގަވާފައިވާ ކަމަށެވެ. އަދި އެ މައްސަލަ ކުރިއަށް ގެންދެވޭ ވަރަށް މެންބަރުންގެ ތާއީދު ނެތުމުން މައްސަލަ ކުރިއަށް ނުގެންދެވޭނޭ ކަމަށް އަފީފު އިއުލާންކުރެއްވި އެވެ.
މެންބަރު އަފީފު ވިދާޅުވީ މެންބަރުން އަނބުރާ ސޮއިގެންދެވުމުން ރައީސް ނަޝީދުގެ މަގާމުން ވަކިކުރުމަށް ހުށަހަޅުއްވާފައިވާ ގަރާރުގައި ބާކީ އޮތީ 21 މެންބަރުންގެ ސޮއި ކަމަށެވެ. އަދި ނާއިބު ރައީސް އީވާ މަގާމުން ވަކިކުރުމަށް ހުށަހަޅުއްވާފައިވާ ގަރާރުގައި އޮތީ 17 މެންބަރުންގެ ސޮއިކަމަށެވެ. އެހެންކަމުން މަޖިލީހުގެ ރައީސްއާއި ނާއިބު ރައީސްގެ އިތުބާރު ނެތް ކަމުގެ މައްސަލަ ކުރިއަށް ނުގެންދެވޭނެ ކަމަށް މެންބަރު އަފީފު ވިދާޅުވިއެވެ.
މެންބަރު އަފީފު ހޯމަ ދުވަހުގެ ޖަލްސާ ނިންމަވާލައްވާފައިވަނީ 12 ސެޕްޓެންބަރު ވާ އަންގާރަ ދުވަހުގެ ހެނދުނު 9:00 ގައި މަޖިލީހުގެ ޖަލްސާއެއް އޮންނާނެ އިއުލާން ކުރެއްވުމަށްފަހު އެވެ.
