ރިޔާސީ އިންތިޚާބުގެ ދެވަނަ ބުރުގައި ކުލައަށް ނުބަލާ އަނިޔާވެރިކަމާއި ދެކޮޅަށް ވޯޓު ދިނުމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ގޮވާލައިފިއެވެ.
ރައީސް އިބްރާހީމް މުހައްމަދު ސާލިހަށް ވޯޓު ދިން މީހުންނަށް ޝުކުރުއަދާކުރައްވާ، ރޮޒެއިނާ ވިދާޅުވީ އިންތިޚާބު ދެވަނަ ބުރަކަށް ދިއުމަށް ރައްޔިތުން ނިންމި ނިންމުމަކީ ގައުމު އިސްކޮށް ނިންމި ނިންމުމެއް ކަމަށެވެ. އަދި ދެވަނަ ބުރުގައި އުންމީދުކުރަނީ ކުލައަށް ބެލުމެއް ނެތި ވޯޓުދޭނެ ކަމަށް ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ ރައްޔިތުން ވިސްނުން އިސްކުރަންޖެހޭ ކަމަށާއި އަނިޔާވެރިކަމާއި ހަމަނުޖެހުމާއި ދެކޮޅަށް ވޯޓު ދޭން ޖެހޭ ކަމަށެވެ.
ސެޕްޓެންބަރު މަހުގެ 9 ވަނަ ދުވަހު ބޭއްވި ރިޔާސީ އިންތިޚާބު ދެވަނަ ބުރަކަށް ގޮސްފައިވާއިރު، އިންތިޚާބުގެ ނަތީޖާއިން ޕީއެންސީގެ ކެންޑިޑޭޓު ޑރ.މުހައްމަދު މުއިއްޒު ވަނީ ކުރި ހޯއްދަވާފައެވެ. އަދި ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހަށް ލިބިވަޑައިގެންނެވީ ދެވަނައެވެ.
އެކަމާއި ގުޅިގެން އެމްޑީޕީން ބުނީ ހެދިފައިވާ ގޯސްތައް މިހާރު ދެނެގަނެވިފައިވާ ކަމަށާއި، އެކަންކަން ދިރާސާ ކުރުމުގެ މަސައްކަތްތައް ކުރަމުންދާ ކަމަށެވެ. އަދި ސެޕްޓެންބަރު މަހުގެ 30 ވަނަ ދުވަހު ބާއްވާ އިންތިޚާބުގެ ދެވަނަ ބުރަށް ތައްޔާރުވުމުގެ މަސައްކަތްތައް ފަށާފައިވާކަމަށް ވެސް އެމްޑީޕީން ބުނެއެވެ. އެމްޑީޕީން ބުނީ ކޯލިޝަން ހެދުމަށް މަޝްވަރާތައް ކުރަމުންދާ ކަމަށާއި، ކެންޕޭނަށް ގެންނަންޖެހޭ ބަދަލުތަކާއެކު ވަރަށް އަވަހަށް ކެންޕޭން ވެސް ފަށާނެ ކަމަށެވެ. އަދި ސަޕޯޓަރުން މާޔޫސްނުވުމަށާއި، މަސައްކަތް ކުރުމުން މިއީ ފަސޭހައިން ކާމިޔާބު ކުރެވޭނެ އިންތިޚާބެއް ކަމަށް އެމްޑީޕީން ބުނެއެވެ.
