ޝާމިލުގެ "މޫސަލް": ވެއްޓިފައި އޮތް ފުރާޅެއްގެ ދަށުން އުފަލާއި ހިތާމަ

އިރެއްގައި ބޮމާއި ބަޑީގެ ހަމަލާތަކުގެ އަޑުފަށްގަނޑުން ގުގުމަމުން ދިޔަ ޢިރާޤުގެ މަޞްރަޙު މިއަދު އޮތީ މުޅިން ބަދަލުވެފައޭ ދެންނެވުމަކުން ގޯހެއް ނެތެވެ. ނަމަވެސް ހަނގުރާމައިގެ ހަނދާންތައް އަދިވެސް ތާޒާއެވެ. ބަދަލު ކުރި ހަމަލާތަކުގައި ސުންނާފަތި ވެފައި ވާ ޢިމާރާތްތަކުގެ ބައިތައް އަދިވެސް އެގޮތުގައި ފެންނަން ހުރި ސަރަޙައްދުތައް އެބަ ހުއްޓެވެ. އަހުމަދު ޝާމިލްއަކީ އެފަދަ ތަނެއްގައި މިއަދު އޭނާގެ އަމިއްލަ ވިޔަފާރިއެއް ހިންގަމުން އަންނަ މީހެކެވެ.

ތިރިއަށް ވެއްޓި، ގޮނިވެފައި އޮތް ފުރާޅުލީ އެ ކާރުޚާނާއަކީ މިއަދު ޝާމިލުގެ ޖޫސްޖޮއިންޓްއެވެ. މޫސަލްގެ ގިނަ ބަޔަކު ފިނި ބުއިންތަކަށް އިންސާފުކޮށްލުމަށްޓަކައި އެއްވާ މައިޒާނެވެ. އެ ތަނުން އިވެމުން ދަނީ އެ ކާރުޚާނާގެ މާޒީއާ ގުޅޭ އޮލަ ވާހަކަތަކުގެ އަޑެވެ.

ޝާމިލްގެ ޖޫސްޖޮއިންޓް ހިންގާ އިމާރާތަކީ، މި ފަހުގެ ތާރީޚުގައި ދުނިޔެ ދުށް އެންމެ ވަރުގަދަ ޓެރަރިސްޓް ޖަމާޢަތް ކަމަށް ވާ އައިސިސްގެ ހަނގުރާމަވެރިން ވެރިކޮށްލައިގެން އުޅުނު ކާރުޚާނާއެކެވެ. އައިސިސްގެ ހަނގުރާމަވެރިން މޫސަލް ހިފުމަށްފަހު އެ ކާރުޚާނާ ބޭނުން ކުރަމުން ގެންގޮސްފައި ވަނީ ޗެކްޕޮއިންޓެއްގެ ގޮތުގައެވެ.

އައިސިސް ހަނގުރާމަވެރިންގެ ބާރު ކަނޑުވާލުމަށް ފަހު އާންމު ދިރިއުޅުމައިގެން ޢިރާޤުގެ އަހުލުވެރިން ކުރިއަށް ދާން މަސައްކަތް ކުރަމުންދާ ރޭހުގައި ޝާމިލުވެސް ދުލެއް ނުދެއެވެ. އައިސިސްއިން ޗެކްޕޮއިންޓެއްގެ ގޮތުގައި ބޭނުން ކުރަމުން ދިޔަ ކާރުޚާނާ ތެރޭގައި ހުރި މިސައިލްތަކާއި، ގޮވާތަކެތީގެ ބައިތައް ހަމަ އެ ހުރި ގޮތަށް ބަހައްޓާފައި ހުރީއެވެ. ވައިގެ ހަމަލާތައް އަމާޒުވެ، ޢިމާރަތަށް ލިބިފައި ހުރި ގެއްލުންތައް މަރާމާތު ކުރުމަށްވެސް މާ ބޮޑު މަސައްކަތްތަކެއް ކޮށްފައެއް ނެތެވެ. ކުރިހާވެސް ކަމަކީ، އޭނާގެ އިސްކޮޅު ހުންނަ ވަރަށް، ފުރާޅު އުފުލާލުމެވެ.

ޢުމުރުން 22 އަހަރުގެ ޒުވާނާ ކިޔައިދިން ގޮތުގައި އޭނާގެ ޖޫސްޖޮއިންޓަށް ގިނަ ބައެއްގެ ސަމާލުކަން ހުއްޓެއެވެ. މަގު ހިނގާފައި ދާ މީހުންވެސް އެ ތަން ހުރި ގޮތް ފެނި، އެ ތަނާ ބެހޭ މަޢުލޫމާތު އޮޅުން ފިލުވާ، އެ ކާރުޚާނާގެ ވާހަކަ އަޑުއަހަން މަޑުކޮށްލައެވެ.

"މޫސަލް"ގެ ނަން ދީފައިވާ ޖޫސް ޖޮއިންޓްގައި ޝާމިލު ވަޤުތުތައް ހޭދަ ކުރަމުން ދަނީ އޭނާގެ ކަސްޓަމަރުންގެ ޚިދުމަތުގައެވެ. ސުންނާފަތިވެފައި ވާ ޢިމާރާތެއްގެ އިޙުސާސް، ކުޑަކޮށްވެސް ނުކުރެވޭހާ ފުރިހަމައަށް ޚިދުމަތް ކުރުމުގައެވެ.

ޝާމިލުގެ މޫސަލްގައި، އައިސިސް އިން ބޭނުން ކުރި ކާރެއްވެސް ބާއްވަފައި އޮވެއެވެ. ހަލާކުވެފައި އޮތް އެ ކާރަކީ، މޫސަލް ސިޓީއިން ތަޙައްމަލު ކުރި ވޭންތަކުގެ ހަނދާނަކަށް އޭނާ ބާއްވައިގެން އުޅޭ ކާރެކެވެ.

އެއް ދުވަސްވަރެއްގައި ޢިރާޤާއި ސޫރިޔާގެ ބޮޑު ސަރަޙައްދެއް ކޮންޓްރޯލް ކުރަމުން ދިޔަ އައިސިސް ޖަމާޢަތުން މިހާރު އޮޕަރޭޓް ކުރަމުން ދަނީ 'ބިންގަރާހުގައި' ކަމަށްވެސް ދެންނެވިދާނެއެވެ. ޓެރަރިސްޓް ސެލްތައް އޮޕަރޭޓް ކުރަނީ އާންމު ދުނިޔެއަށް ފިލާ އޮވެގެންނެވެ.