ހއ. ކެލާ މަގު ހެދުމުގެ މަޝްރޫއު އާރްޑީސީއާ ހަވާލުކޮށްފި
މި މަޝްރޫއުގެ ދަށުން 3.9 ކިލޯމީޓަރުގެ މަގުގައި ތާރު އަޅާނެ
ހއ. ކެލާ މަގު ހެދުމުގެ މަޝްރޫއުގެ އެއްބަސްވުމުގައި ސޮއިކުރުން
ހއ. ކެލާގެ މަގު ހެދުމުގެ މަޝްރޫއު ސަރުކާރުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ ހަވާލުކޮށްފިއެވެ.
ބުދަ ދުވަހު ބޭއްވި ރަސްމިއްޔާތެއްގައި އެއްބަސްވުމުގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން، ޑިރެކްޓަރ ޖެނެރަލް ފާތިމަތު ޝާނާ ފާރޫގު ސޮއިކުރެއްވިއިރު، އާރްޑީސީގެ ފަރާތުން ސޮއިކުރެއްވީ އެ ކުންފުނީގެ ޖެނެރަލް މެނޭޖަރު ހަސަން ސައީދެވެ.
މި މަޝްރޫއުގެ ދަށުން 3.9 ކިލޯމީޓަރުގެ މަގުގައި ތާރުއެޅުމަށް ހަމަޖެހިފައިވާއިރު، މަގުތަކުގައި ފެން ހިންދާ ނިޒާމު ގާއިމުކުރާނެއެވެ. އަދި މަގުގައި ބައްތި ޖަހާނެއެވެ.
ޕްލޭނިންގ މިނިސްޓްރީން ކެލާގެ މަގު ހެދުމުގެ މަޝްރޫއު އާރްޑީސީއާ ހަވާލުކުރީ 99،292،426.83 (ނުވަދިހަ ނުވަމިލިއަން ދެލައްކަ ނުވަދިހަ ދެހާސް ހަތަރުސަތޭކަ ސައްބީސް ރުފިޔާ، އަށްޑިހަ ތިން ލާރި)އަށެވެ. މި މަޝްރޫއު ނިންމަން އާރްޑީސީއަށް ދީފައިވަނީ 730 ދުވަހުގެ މުއްދަތެކެވެ.
