ހައުސިންގ މިނިސްޓްރީގެ ހައުސިންގ ޑިޕާޓްމަންޓްގެ މުވައްޒަފުން ގެއަށް ފޮނުވާލައިފި
އެއްވެސް މުވައްޒަފެއްގެ ވަޒީފާގެ ޔަގީން ކަމެއް ނެތް
ހައުސިންގ މިނިސްޓްރީ ރޯވެ އެނދުމަށްފަހު، އެމިނިސްޓްރީ އުވާލާ މިހާރު އެތަނުގެ މުވައްޒަފުން ވެސް ވަނީ މަގުމަތިވެފައި
ހައުސިންގ މިނިސްޓްރީގެ ހައުސިންގ ޑިޕާޓްމަންޓުގެ މުވައްޒަފުންނަށް އިތުރު އެންގުމެއް އަންގަންދެން ގޭގައި މަޑުކުރަން ބުރާސްފަތި ދުވަހު އަންގައިފިއެވެ.
ބުރާސްފަތި ދުވަހުން ފެށިގެން އިތުރަށް އޮފީހަށް ނުނިކުންނަށް އެންގުމާއެކު، ހައުސިންގ ޑިޕާޓްމަންޓުގެ މުވައްޒަފުންގެ މެދުގައި ވަޒީފާގެ ޔަގީން ކަމާ މެދު ކަންބޮޑުވުން އުފެދިފައިވާ ކަމަށް މި ނޫހަށް ވާހަކަ ދެއްކި އެ މިނިސްޓްރީގައި ގިނަ ދުވަސް ތަކެއް ވަންދެން ޚިދުމަތް ކުރި މުވައްޒަފަކު ބުނެފައިވެއެވެ.
އިމާރާތުގައި ހިނގި އަލިފާނުގެ ހާދިސާ ކޮންޓްރޯލު ނުވެ ހައުސިންގ މިނިސްޓްރީ ހިނގަމުން ދިޔަ މުޅި އިމާރާތް އަނދާ ހުލިވި ހާދިސާ އަށް ފަހު، ކުރީގެ ހައުސިންގ މިނިސްޓްރީ އުވާލައި، މިނިސްޓްރީ އޮފް ކޮންސްޓްރަކްޝަން އާއި މިނިސްޓްރީ އޮފް ފިނޭންސްގެ މެދުގައި ކުރީގެ ހައުސިން މިނިސްޓްރީގެ މަސައްކަތްތައް ބަހާލެވުނު އިރު، ބައެއް މުވައްޒަފުންގެ ވަޒީފާ ގެއްލިދާނެކަމަށް މިނިސްޓަރު ހުރިހާ މުވައްޒަފުންނަށް އެންގެވި ކަމަށް މައުލޫމާތު ލިބިފައިވެއެވެ.
މިނިސްޓަރު ހުރިހާ މުވައްޒަފުންނަށް ފޮނުވި އީމޭލެއްގައި، އެހެން މިނިސްޓްރީތަކަށް މުވައްޒަފުންނަށް ބަދަލުވުމުގެ ފުރުސަތު ލިބޭނީ އެހެން އޮފީސްތަކުގެ އިދާރީ އޮނިގަނޑު މުރާޖަޢާކުރުމަށްފަހު އަދި ގުޅުންހުރި މަޤާމުތައް ލިބެން ހުރިނަމަ އެކަނި ކަމުގައި އެ އީމެއިލްގައި ބުނެފައިވާ ކަމަށް މައުލޫމާތު ދިން މުވައްޒަފު ބުނެފައިވެއެވެ.
މީގެ އިތުރުން، ކޯޕަރޭޓް ޑިޕާޓްމަންޓް އިތުރަށް ބޭނުމެއް ނުވާނެކަމަށާއި، މި ޑިޕާޓްމަންޓުގެ މުވައްޒަފުންނަށް އެހެން މިނިސްޓްރީތަކުގައި މަޤާމުތައް ލިބެން ހުރި މިންވަރަކުން މަގާމު ހަމަޖެއްސުމުގައި ބަލާނެ ކަމަށް ވެސް މުވައްޒަފުންނަށް ފޮނުވި އީމެއިލްގައި ބަޔާންކޮށްފައިވެއެވެ.
ސިވިލް ސަރވިސް ކޮމިޝަން (ސީއެސްސީ) އަށް އެކަށީގެންވާ މަޤާމުތައް އެ މުވައްޒަފުންނަށް ހޯދައިނުދެވިއްޖެނަމަ، އިދާރީ މުވައްޒަފުން ވަކިކުރެވޭނެ ކަމަށް ވެސް މުވައްޒަފުންނަށް ވަނީ އަންގާފައެވެ.
މައުލޫމާތު ދިން މުވައްޒަފު ބުނެފައިވަނީ ކަންކަން ހިނގަމުންދަނީ ސިއްރުން ކަމަށެވެ. އެހެން މިނިސްޓްރީ އަކަށް ބަދަލު ވެވޭނީ ކޮން މުވައްޒަފުންނަށް ކަމެއް، ކޮން ޑިޕާޓްމަންޓަކަށް ވާނީ ކިހިނެއް ކަމެއްވެސް މުވައްޒަފުންނަށް ސާފު ނުވާ ކަމަށެވެ.
އޭނާ ބުނި ގޮތުން، މުވައްޒަފުންނަށް ސީއެސްސީ އިން ވަނީ ފަހުން އީމެއިލްއެއް ފޮނުވާފައެވެ. އެ އީމެއިލްގައި އެ މުވައްޒަފުން މިނިސްޓްރީ އޮފް ފިނޭންސް ނުވަތަ މިނިސްޓްރީ އޮފް ކޮންސްޓްރަކްޝަނަށް ބަދަލުކުރެވިފައިވާ ކަމަށާއި، އެ މިނިސްޓްރީތަކުގެ އޮނިގަނޑާ އެއްގޮތަށް އެ މީހުންގެ މަޤާމުތައް މުރާޖަޢާކުރެވެމުންދާ ކަމަށް ބަޔާންކޮށްފައިވެއެވެ. މި އީމޭލުން ވަޒީފާގެ ރައްކާތެރިކަން ކަށަވަރުވެފައި ނެތްކަން މުވައްޒަފުން ފާހަގަ ކުރާ ކަމަށް އޭނާ ބުންޏެވެ.
ވަޒީފާގެ ޔަގީންކަން ގެއްލި ކަންބޮޑުވެފައިވާ މުވައްޒަފުން ބުނާ ގޮތުގައި، ސިވިލް ސާވިސްގެ މުވައްޒަފުން މަގާމުން ވަކިކުރާއިރު މުވައްޒަފުންނަށް ދެވޭ ތިން މަސްދުވަހުގެ މުސާރަ އަކީ މިނިސްޓްރީ އަށް އެ މީހުން އަހަރުތަކެއް ވަންދެން ކޮށްފައިވާ ޚިދުމަތަށް އެކަށީގެންވާ ބަދަލެއް ނޫނެވެ.
"އަޅުގަނޑުމެން މި ހުރިހާ ސިވިލް މުވައްޒަފުންގެ ޙައްޤުގައި ވަކާލާތުކުރާނެ ފަރާތެއް ނެތް،" އޭނާ ބުންޏެވެ.
އޭނާ ބުނި ގޮތުގައި ހައުސިންގ މިނިސްޓްރީ އުވާލައި މިހާ ގިނަ މުވައްޒަފުން ވަކިކުރަނީ ސިޔާސީ މަޤާމުތަކަށް ޢައްޔަންކުރެވިފައިވާ ތިބި މީހުންގެ ސަބަބުންނެވެ.
"އަޅުގަނޑުމެން ކަމާބެހޭ ހުރިހާ ފަރާތްތަކަށް ގޮވާލަނީ މި މައްސަލައިގައި އަވަހަށް އަޅަންޖެހޭ ފިޔަވަޅުތައް އަޅައި، ދަތި ޙާލުގައި ތިބި މި މުވައްޒަފުންނަށް ލިބޭ ގެއްލުން ކުޑަކުރުމަށް މަސައްކަތްކުރުމަށް،" އޭނާ ބުންޏެވެ.
އޭނާ އިތުރަށް ބުނި ގޮތުގައި "މިއީ ސިޔާސީ ކަމެއް ނޫން، މިއީ ގިނަ އަދަދެއްގެ ދިވެހިންގެ ދިރިއުޅުމާއި ދިރިއުޅުމުގެ ވަސީލަތްތަކަށް ސީދާ އަސަރުކުރާ،" ކަމެކެވެ.
ރައީސް މުއިއްޒު ވެރިކަމަށް ވަޑައިގަތީ ސިޔާސީ މަގާމެއްގައި ހުރި މީހަކު ނޫނީ ވަޒީފާ ނުގެއްލޭނެ ކަމުގެ ޔަގީންކަން އެތައް ފަހަރަކު ކެމްޕޭންގެ ތެރޭގައި ދެއްވުމަށް ފަހުގައެވެ.
