ގިނަ އަދަދެއްގެ ދީނީ އިލްމުވެރިން ރައީސް ޞާލިހު އެންޑޯޒްކުރައްވައިފި
6 ސެޕްޓެމްބަރު 2023 | ބުދަ 07:32ވެރިކަން ކުރެއްވި ބައެއް ބޭފުޅުންގޮތަށް ރުޅިއިސްކުރައްވައި، ރުންކުރު ނިންމެވުންތަކެއް ނިންމަވާފައިނުވޭ
ދީނީ އިލްމުވެރިން ރައީސްއަށް ތާއިދުކުރައްވާކަން ހާމަކުރުމުގެ ގޮތުން ބޭއްވި ނޫސްވެރިންގެ ބައްދަލުވުން
އިސްލާމް ދީނުގެ ދައުވަތުގެ މައިދާނުގައި ހަރަކާތްތެރިވެވަޑައިގަންނަވާ ގިނަ އަދަދެއްގެ ދީނީ އިލްމުވެރިން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އެންޑޯޒް ކުރައްވައިފިއެވެ.
މިކަމާއި ގުޅިގެން ރާއްޖޭގެ މަޝްހޫރު އަދި ގިނަ ބައެއްގެ އިތުބާރު ލިބިފައިވާ ދީނީ އިލްމުވެރިންތަކެއް ބޭއްވި ނޫސްވެރިންގެ ބައްދަލުވުމުގައި ޝައިހް އިލްޔާސް ހުސެއިން ވިދާޅުވީ މިވަގުތަކީ ދިވެހިރާއްޖެގެ މުސްތަގުބަލާ މެދު މުހިންމު ނިންމުމެއް ނިންމަންޖެހޭ ވަގުތެއްކަމަށްވާތީ ފާއިތުވެދިޔަ މާޒީގައި ދީނީ އިލްމުވެރިންނަށް ތަޖުރިބާކުރަޖެހިފައިވާ ގިނަ ކަންތައްތަކެއްގެ މައްޗަށް ބުރަވެ އަދި އިލްމީ ހަމަތަކާއި އުސޫލުތަކުގެ މައްޗަށް ރިއާޔަތްކޮށް މިއަހަރުގެ ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިހަށް ދީނީ އިލްމުވެރިން ތާއިދުކުރައްވާ ކަމަށެވެ.
އިލްޔާސް ވިދާޅުވީ މިއީ ރާއްޖޭގެ ސިޔާސީ ހަލަބޮލި މާހައުލެއް އުފެދުނުފަހުން ރާއްޖެ ތަޖުރިބާކޮށްފައި ނުވާފަދަ ހަމަޖެހުން މިއަދު ރައްޔިތުން ތަޖުރިބާކޮށްފައިވާ ކަމަށެވެ.
އިސްލާމިކް މިނިސްޓަރު އަހުމަދު ޒާހީރު ވިދާޅުވީ ދީނުގެ ދައުވަތުގެ މަސައްކަތް މިނިސްޓްރީން ކުރަމުން އަންނަ އިރު، ދީނީ އިލްމުވެރިންގެ އެއްބާރުލުން ވަރަށްބޮޑަށް ލިބިގެންދިޔަ ކަމަށެވެ. މިނިސްޓަރު ވިދާޅުވީ ރައީސް ޞާލިހުގެ ސަރުކާރުގައި ދީނީ އިލްމުވެރިންނަށް މިނިވަންކަމާއެކު މަސައްކަތް ކުރުމުގެ ފުރުސަތު ފަހިކޮށްދެއްވި ކަމަށެވެ. އަދި ދީނުގެ ދައުވަތުގެ މައިދާނުގައި މަސައްކަތް ކުރަމުންދިޔަ އިރު، ގިނަ ދީނީ އިލްމުވެރިން އެކަމުގައި ބައިވެރިވެ ރަށްރަށަށް ވަޑައިގެންނެވި ކަމަށެވެ.
މިނިސްޓަރު ވިދާޅުވީ މީގެ ކުރީގެ ސަރުކާރުތަކުގައި ދީނީ ރޮނގުން އެކިއެކި ޕްރޮގްރާމްތައް ހިންގިފައި ނުވާވަރަށް މި ސަރުކާރުގައި ޕްރޮގްރާމް ހިންގިފައިވާ ކަމަށެވެ.
ޑރ. މުހައްމަދު ގުބާދު ވިދާޅުވީ ރައީސް ޞާލިހަށް ދީނީ އިލްމުވެރިން ތާއިދުކުރައްވާ ސަބަބަތަކެއް އެބަހުރި ކަމަށެވެ. އެގޮތުން އެމަނިކުފާނަކީ ތަފާތު ސިޔާސީ ހިޔާލުހުންނަ ބޭފުޅުންނާއެކީގައި މި ވޭތުވެދިޔަ 5 އަހަރުގެ ތެރޭގައި އެއްވެސްކަހަލަ ހަލަބޮލިކަމެއް ނެތި ރާއްޖެ ބެލެހެއްޓުމުގައި ކުރިއަށް ވަޑައިގެންނެވި ބޭފުޅެއް ކަމަށެވެ. އަދި އެމަނިކުފާނުގެ ވެރިކަމުގެ ފެނިގެންދިޔައީ އަމާންކަމާއި އޯގާވެރިކަމާއި އިހްލާސްތެރިކަން ފަދަ ރަނގަޅު ސިފަތަކެއް ކަމަށެވެ.
މި ބައްދަލުމުގައި ވާހަކަ ދައްކަވަމުން ޑރ. މުހައްމަދު އިޔާޒް އަބްދުއްލަތީފް ވިދާޅުވީ ރައީސް ޞާލިހުގެ ފަރާތްޕުޅުން ފާހަގަކުރެއްވުނު އެންމެ މުހިންމު އެއްކަމަކީ އެމަނިކުފާނު މަޝްވަރާކުރެއްވުން ކަމަށެވެ. ހާއްސަގޮތެއްގައި ދީނާ ގުޅުން ހުރި ކަންކަމުގައި ރައީސާއި ބައްދަލުކޮށް ކުރެވުނު މަޝްވަރާގެ އަލީގައި އެކަށީގެންވާ ހައްލެއް އެމަނިކުފާނު ހޯއްދަވައިދެއްވާފައިވާ ކަމަށެވެ.
މީގެ އިތުރުން އިލްމުވެރިން ކަންބޮޑުވުން ފާޅުކުރެއްވި ވަރަށް ގިނަ ކަންކަމުގައި އެމަނިކުފާނު ހައްލު ހޯއްދަވައިދެއްވާ، މިފަހުން ޓީޗަރުންގެ މޫނުބުރުގާގެ މައްސަލައިގައި، އަކުރުންއަކުރަށް އިލްމުވެރިން އެދިވަޑައިގެންނެވި ހައްލު ގެނެސްދެއްވި ކަމަށެވެ.
ޝައިހް އިލްޔާސް ވިދާޅުވީ މި ބައްދަލުވުމުގައި ދީނީ އިލްމުވެރިން ފާހަގަކުރެއްވި ކަންތައްތަކަކީ ރައީސް ޞާލިހް އެންޑޯޒް ކުރައްވަން އިލްމުވެރިން ނިންމެވި ބައެއް ކަންކަން ކަމަށެވެ. އަދި މި ނޫންވެސް ވަރަށް ގިނަ ކަންތައްތަކެއް އެބަހުރި ކަމަށާއި، ހާއްސަކޮށް ކަމަކާމެދު ކަންބޮޑުވެގެން މަޝްވަރާކޮށް ހައްލު ހޯދަންޖެހިއްޖެނަމަށް އެކަން ވެސް ރައީސް ކުރައްވާ ކަމަށެވެ.
ގިނަ އަދަދެއްގެ ދީނީ އިލްމުވެރިން އިދިކޮޅު ކެންޑިޑޭޓް ޑރ. މުހައްމަދު މުއިއްޒުއަށް ތާއިދުކުރާކަމަށް ދެކެވޭ ވާހަކައާއި ގުޅިގެން ޑރ. އިޔާޒް ވިދާޅުވެފައިވަނީ 363 ޢިލްމުވެރިންގެ ތެރެއިން ޑރ. މުޢިއްޒުއަށް ތާއީދުކުރަށްވަނީ 87 ބޭފުޅުން ކަމަށެވެ. އެއީ ޢިލްމުވެރިންގެ 24 އިންސައްތަ ކަމަށާއި، އިލްމުވެރިންގެ 76 އިންސައްތަ ޑރ މުޢިއްޒުއަށް ތާއީދެއް ނުކުރައްވާ ކަމަށެވެ.
