ކުރީގެ މެންބަރު އަމީތު އެމްޑީޕީއަށް ސޮއިކުރައްވައިިފި
5 ސެޕްޓެމްބަރު 2023 | އަންގާރަ 08:13އަމީތު ގެންދަވަނީ ސަރުކާރާއި އެކު މަސައްކަތްކުރައްވަމުން
ކުރީގެ މެންބަރު އަމީތު އެމްޑީޕީއަށް ސޮއިކުރެއްވުން
ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުހައްމަދު އަމީތު އަހުމަދު މަނިކު އެމްޑީޕީއަށް ސޮއިކުރައްވައިފިއެވެ.
އޭނާ އެމްޑީޕީ އަށް ސޮއިކުރެއްވީ ހޯމަ ދުވަހުއެވެ. އަމީތު އެމްޑީޕީއާ ގުޅިވަޑައިގަންނަވާފައި ވަނީ ރައީސް އިބްރާހީމް މުހައްމަދު ސާލިހު ކެމްޕެއިނަށް ރ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ. އަމީތު އެމްޑީޕީއަށް ސޮއި ކުރެއްވުމަށް ފަހު އެ ފޯމު ހަވާލުކުރައްވާފައި ވަނީ ރައީސް ޞާލިހު އާއިއެވެ.
ނިމިދިޔަ ދައުރުގައި އަމީތު މަޖިލީހަށް ހޮވިވަޑައިގަތީ ޕީޕީއެމްގެ މެންބަރެއްގެ ގޮތުގައެވެ. އޭނާ އަކީ ޕީޕީއެމް އިން ވަކިވުމުން ގޮނޑިގެއްލުމުކަމަށް އިލެކްޝަނުން އޭރު ނިންމި 12 މެންބަރުންގެ ތެރޭގައި ހިމެނިވަޑައިގަންނަވާ މެންބަރެކެވެ. ނަމަވެސް ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމަށް ފަހު އެ މެންބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ނިންމިއެވެ. އަމީތު ގެންދަވަނީ ސަރުކާރާއި އެކު މަސައްކަތްކުރައްވަމުންނެވެ.
