ޕީޖީ އޮފީހުގެ އޮންލައިން ހިދުމަތްތައް މެދުވެރިކޮށް ކުށުގެ ރެކޯޑު ސާފުކުރެވޭ ގޮތް ހަދައިފި
5 ސެޕްޓެމްބަރު 2023 | އަންގާރަ 08:15ޖަވާބު އެ އޮންލައިން ޕޯޓަލް މެދުވެރިކޮށް ފޯރުކޮށްދޭނެ
ޕްރޮސެކިއުޓަރ ޖެނެރަލް ހުސައިން ޝަމީމް
ޕްރޮސިކިއުޓާ ޖެނެރަލް (ޕީޖީ) އޮފީހުގެ އޮންލައިން ޚިދުމަތްތައް މެދުވެރިކޮށް، ކުށުގެ ރެކޯޑު ސާފުކުރެވޭ ގޮތް ހަދައިފިއެވެ.
ޕީޖީ އޮފީހުން އެގޮތަށް ހަމަޖައްސާފައި ވަނީ އެ އޮފީހުން ކުށުގެ ރެކޯޑު ސާފުކުރަންޖެހޭ ކަންކަމުގައި ލުއިފަސޭހަ ކޮށްދިނުމުގެ ގޮތުންނެވެ. ޕީޖީ އޮފީހުން ބުނީ ކުށުގެ ރެކޯޑް ސާފުކުރުމުގެ ޚިދުމަތް އީފާސް މޯބައިލް އެޕް މެދުވެރިކޮށް ލިބޭނެ ކަމަށެވެ. އަދި ޕީޖީ އޮފީހުގެ ޕޯޓަލް އިން އީފާސް މެދުވެރިކޮށް ވަދެގެން ވެސް ކުށުގެ ރެކޯޑު މެނޫއިން ކުށުގެ ރެކޯޑަށް އެދެވޭނެ ކަމަށް ޕީޖީ އޮފީހުން ވަނީ ބުނެފައެވެ.
އިތުރަށް ޕީޖީ އޮފީހުން ބުނީ ކުށުގެ ރެކޯޑަށް އެދޭ ތާރީހުން ފެށިގެން މަސައްކަތުގެ އެއް ދުވަސް ތެރޭގައި ޖަވާބު އެ އޮންލައިން ޕޯޓަލް މެދުވެރިކޮށް ފޯރުކޮށްދޭނެ ކަމަށެވެ.
އެހެންކަމުން ކުރިއަށް އޮތްތަނުގައި ކުށުުގެ ރެކޯޑުތައް ސާފުކުރުން ފަސޭހަވެ، އޭގެ ޖަވާބުވެސް ފޯނުން ބަލާލެވޭނެ ކަމަށާ ޕްރިންޓު ކުރަން ބޭނުންވާނަމަ އެ މައުލޫމާތު ޕްރިންޓުވެސް ކުރެވޭނެ ކަމަށް ޕީޖީ އޮފީހުން ވަނީ ބުނެފައެެވެ. މީގެ އިތުރުން އެ ލިޔުމަކީ ޕީޖީ އޮފީހުން ފޯރުކޮށްދޭ ލިޔުމެއްކަން އެނގޭނެ ވެރިފިކޭޝަން ކޯޑެއް އެ ލިޔުމުގައި ހިމެނެއެވެ. ހަމައެހެންމެ އީމެއިލުން ކުށުގެ ރެކޯޑު ސާފުކުރަން ބޭނުންވާ މީހުން ޕީޖީ އޮފީހަށް އީމެއިލް ކުރުމުން މަސައްކަތުގެ ދެ ދުވަސް ތެރޭ ކުށުގެ ރެކޯޑު ސާފުކޮށް ޖަވާބު ފޯރުކޮށްދިނުމުގެ އިންރިޒާމް ވަނީ ހަމަޖެހިފައެވެ.
