ރ އަތޮޅުގެ ވެރިކަން ކުރާ އުނގޫފާރަށް ރައީސްގެ ބޮޑެތި ވައުދުފުޅުތަކެއް
ބަނދަރަށް ގެންނަންޖެހޭ ބަދަލުތައް ގެންނަވާނެ
ރައީސް ޞާލިހް އުނގޫފާރު ބަނދަރު ބައްދަލުވުމުގައި ވާހަކަފުޅުދައްކަވަނީ
އަންނަ ދައުރުގެ ތެރޭގައި ރ. އުނގޫރާފުގައި ހައުސިންގ ޕްރޮޖެކްޓަކާއި އައު ސްކޫލެއް އަޅުއްވައިދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
"އުފާވެރި އަމާންރާއްޖެ" ކެމްޕޭނަށް ރ. އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، ރ. އުނގޫފާރަށް ވަޑައިގެން ބޭއްވެވި "ބަނދަރު ބައްދަލުވުން" ގައި ވާހަކަފުޅުދައްކަވަމުން ރައީސް ވިދާޅުވީ ވަޑައިގެންނެވި ކޮންމެ ރަށަކުން ވެސް ފެނިވަޑައިގަންނަވަނީ އެއް މަންޒަރެއް ކަމަށާއި، އެއީ ތަރައްގީއާއެކު ކުރިއަށްދާން ބޭނުންވާ މަންޒަރު ކަމަށެވެ. އަދި އަނިޔާވެރިކަމާއި ބިރުވެރިކަމުގެ ތެރެއަށް ދާން ބޭނުން ނުވާ މަންޒަރު ފެނިވަޑައިގަންނަވާ ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ އުނގޫފާރުގެ ދީނީ އިލްމުވެރިއެއްކަމަށްވާ ޑރ. އަފްރާޝީމް އަލީ 2013ގައި އަވަހާރަކޮށްލި ހާދިސާގެ މަތިން އެ ރަށުގައި ހުންނަވާ ވާހަކަފުޅުދައްކަވާއިރު ހަނދާން އައުކޮށްލަންޖެހޭ ކަމަށެވެ. ރައީސް ވިދާޅުވީ އެއިރު އޮތީ ނާމާންކަމަށާއި، ސިޔާސީ ފަރާތްތަކާއި ދީނީ އިލްމުވެރިން ހިފާ ހައްޔަރުކުރެވުނު ކަމަށެވެ. މީޑިއާގެ މިނިވަންކަމެއް ނެތް އިރު ރާއްޖެޓީވީގައި ރޯކޮށްލި ކަމަށެވެ. ރައީސް ނަޝީދު ރަށެެއްގައި ހުންނަވަނިކޮށް ހިފާ ހައްޔަރުކުރެވުނު ކަމަށެވެ. އެއިރު އޮތީ ބިރުވެރިކަމެއްގެ ތެރޭގައި ކަމަށެވެ. ނަމަވެސް 7 އަހަރު ފަހުން އެ ހާލަތު ބަދަލުވީ ރައްޔިތުން ނުކުމެ އެ ބަދަލަށް ބޭނުންވެގެން ވޯޓު ދެއްވުމުން ކަމަށެވެ.
ރައީސް ވިދާޅުވީ 2018ގެ ކެމްޕޭންގައި ދިމާވި އުނދަގޫތަކާއި ކުރިމަތިލާން ޖެހުނު ކަންކަމާމެދު ވިސްނާލަން ޖެހޭ ކަމަށެވެ. ތަނެއްގައި ޖަލްސާއެއް ބޭއްވެނީ ރައްޔިތުން މުޒާހަރާކޮށް ޕްރެޝަރުކޮސްގެންކަމަށެވެ. ނަމަވެސް، 2018 ގައި ރައްޔިތުން ވެރިކަން ހަވާލުކުރި ގޮތަށް މި ގެންދަވަނީ ރާއްޖޭގެ ރަށްތައް ތަރައްގީކުރައްވަމުން ކަމަށެވެ. ރައީސް ވިދާޅުވީ އުނގޫފާރަކީ ވެރިކަން ކުރާ ރަށަށް ވެފައި ތަރައްގީގެ މަންޒަރެއް މީގެ ކުރިން ފެނިވަޑައިނުގަންނަވާ ކަމަށެވެ. ނަމަވެސް މި ދައުރާ އަންނަ ދައުރުގެ ތެރޭގައި އެ ރަށުން ތަރައްގީގެ ކުލަތައް ފެނިގެންދާނެކަމަށެވެ.
ރައީސް ވިދާޅުވީ ކުރިއަށް އޮތް ދައުރުގައި އުނގޫފާރަށް ގެންނަން ބޭނުންވާ ތަރައްގީގެ މަސައްކަތް އެބަހުރި ކަމަށެވެ. އެގޮތުން ބަނދަރަށް ބޭނުންވާ ބަދަލު ގެނެސް ފަސޭހަ ބަނދަރަކަށް ހައްދަވާނެ ކަމަށާއި، އޮޑިދޯނިފަހަރު އެހެލާނެ ތަނަކާއި މޫދަށް އެރޭނެ ސަރަަހައްދެއް ގާއިމްކުރައްވާނެ ކަމަށް ރައީސް ވިދާޅުވިއެވެ. މީގެ އިތުރުން ބިން ހިއްކުމުގެ މަސައްކަތް ކުރިއަށް ގެންގޮސް ހައުސިންގ ޕްރޮޖެކްޓެއް ކުރިއަށް ގެންދަވާނެ ކަމަށެވެ. މީގެ އިތުރުން ފުރިހަމަ ވަސީލަތާއެކު އައު ސްކޫލް އިމާރާތެއް އިމާރާތް ކުރައްވާނެ ކަމަށާއި، އެއް ދަންފަޅިއަށް ސްކޫލް ބަދަލުކުރައްވާނެ ކަމަށް ރައީސް ވިދާޅުވިއެވެ.
ފުޓްބޯޅަ ދަނޑުގެ ރޮސްޓްރަމްއާއެކު ސިޑިބަރި ހަދާނެ ކަމަށާއި، ހޮސްޕިޓަލާއެކު މުވައްޒަފުންނަށް އެކޮމަޑޭޝަން ބްލޮކެއް އަޅުއްވާނެ ކަމަށް ރައީސް ވިދާޅުވިއެވެ. މިހާރު ކުރިއަށްދާ މަގު ހެދުމުގެ މަސައްކަތް ނިމިގެންދާއިރު ބާކީ ހުރި ހުރިހާ މަގެއްގައި ތާރުއެޅިގެންދާނެކަމަށް ރައީސް ވިދާޅުވިއެވެ. ރައީސް ވިދާޅުވީ ސިއްހީ ދާއިރާއިން ތައުލީމް ދޭނެ ވަސީލަތްތައް އުނގޫފާރުގައި ގާއިމްކޮށް އެކަން ފުޅާކުރައްވާނެ ކަމަށެވެ.
