ހއ. ދިއްދޫ ބިން ހިއްކުމުގެ މަޝްރޫއުގެ އަމަލީ މަސައްކަތް ފެށުމަށް އެމްޓީސީސީއިން ސައިޓް މޮބިލައިޒް ކޮށްފިއެވެ.
ހއ. އަތޮޅުގެ ވެރިކަން ކުރަމުން އަންނަ ދިއްދޫއަކީ ތަފާތު ގިނަ ޚިދުމަތްތަކާއެކު ކުރިއަރުވަމުން އަންނަ ރަށަކަށްވާއިރު ކައިރި ރަށްތަކުން އެ ރަށަށް ބަދަލުވާ މީހުންގެ އަދަދު ދަނީ އިތުރުވަމުންނެވެ. މިއާއެކު އެ ރަށުގައި ބިމުގެ ދަތިކަން ވަނީ ދިމާވެފައެވެ. އެހެންވެ، ސަރުކާރުން ކުރިއަށްގެންދާ މި މަޝްރޫއާއެކު ބިމުގެ ދަތިތަކަށް ހައްލު ލިބި، ދިއްދޫ އިތުރަށް ތަރައްޤީ ކުރުމަށް ތަފާތު ފުރުސަތުތައް ހުޅުވިގެންދާނެ ކަމަށް ވަނީ ލަފާ ކޮށްފައެވެ.
މި މަޝްރޫއުގެ ދަށުން އެ ރަށުގައި ސޭންޑް ސަރޗް ސާވޭއެއް ހެދުމަށްފަހު 26 ހެކްޓަރުގެ ބިން ހިއްކާނެއެވެ.
މި މަޝްރޫއުގެ މަސައްކަތް ސަރުކާރުން އެމްޓީސީސީއާ ހަވާލުކޮށްފައިވަނީ 83.07 މިލިއަން ރުފިޔާއަށް 360 ދުވަހުގެ ތެރޭގައި ނިންމާގޮތަށެވެ. މި މަޝްރޫއުގެ މަސައްކަތް ފަށާނީ އެކަމަށް ބޭނުންވާ އެންވަޔަރަމަންޓަލް އިމްޕެކްޓް އެސެސްމަންޓް ހެދުމަށްފަހު ކަމަށް އެމްޓީސީސީއިން ބުނެއެވެ.
