އެމްޓީސީސީއިން މ. އަތޮޅުގައި ސްޕީޑް ފެރީގެ ޚިދުމަތް ފަށައިފި
ފުރަތަމަ ހަފުތާގައި މި ޚިދުމަތް ދޭނީ ހިލޭ
އެމްޓީސީސީއިން މ. އަތޮޅުގައި ސްޕީޑް ފެރީގެ ޚިދުމަތް ފެށުން
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މ. އަތޮޅުގައި ދެމުން އައި ފެރީ ޚިދުމަތް އިތުރަށް ފުޅާކުރުމުގެ ގޮތުން ސްޕީޑް ފެރީ ޚިދުމަތް ފަށައިފިއެވެ.
އެ ކުންފުނިން މި ޚިދުމަތް ފެށީ ހޯމަ ދުވަހުއެވެ. މި ޚިދުމަތުގައި ބޭނުންކުރާ ސްޕީޑް ފެރީތަކަކީ 45 ފަސިންޖަރުންނަށް ދަތުރުކުރެވޭ ގޮތަށް ފަރުމާ ކޮށްފައިވާ އުޅަނދުތައް ކަމަށް އެމްޓީސީސީއިން ބުނެއެވެ.
އެމްޓީސީސީއިން މ. އަތޮޅުގެ ހުރިހާ ރަށަކަށް ހަފުތާއަކު ތިން ދުވަހު ފެރީގެ ޚިދުމަތް ފޯރުކޮށްދޭނެއެވެ. އަދި ސްޕީޑް ފެރީ ޚިދުމަތުގެ ޝެޑިއުލް އެމްޓީސީސީ ވެބްސައިޓުން ފެންނަން ހުންނާނެއެވެ.
އެމްޓީސީސީއިން ބުނީ އެއް ހަފުތާގެ މުއްދަތަކަށް މ. އަތޮޅުގައި ސްޕީޑް ފެރީގެ ޚިދުމަތް ދޭނީ ހިލޭ ކަމަށެވެ. ހިލޭ ދަތުރުކުރެވޭ މުއްދަތުގައި ދަތުރަށް ޖާގަ ހޯދުމަށް ގުޅަން ޖެހެނީ އެމްޓީސީސީގެ ނަންބަރު 7955508 އަށް ކަމަށް އެ ކުންފުނިން ބުނެއެވެ.
އެއް ހަފުތާވަންދެން ހިލޭ ދަތުރުތައް ކުރަނީ އާއްމުން ފެރީ ޝެޑިއުލަށް އަހުލުވެރިކޮށް, އެ ޚިދުމަތް ރަނގަޅަށް ތަޖުރިބާކުރުމުގެ ފުރުސަތު ދިނުމަށެވެ. އަދި ކަސްޓަމަރުންގެ ޚިޔާލާ އެއްގޮތަށް ޚިދުމަތުގެ ފެންވަރު ރަނގަޅުކުރުމަކީ ވެސް މަޤްސަދެއް ކަމަށް އެމްޓީސީސީއިން ބުނެއެވެ.
އެއް ހަފުތާއަށްފަހު މި ފެރީތަކުގައި ދަތުރުކުރެވޭނީ ޓިކެޓް ނަގައިގެންނެވެ. ރަސްމީކޮށް އަގު ނަގައިގެން ޚިދުމަތް ފެށުމާއެކު ޚިދުމަތް ދިނުމަށް ތައްޔާރުކޮށްފައިވާ ވެބްސައިޓް stl.mtcc.mv މެދުވެރިކޮށް އޮންލައިންކޮށް ޓިކެޓް ނެގޭނެއެވެ.
