މެޗުގެ ކުރިން ކުޅުންތެރިން ރަހުމަތްތެރިކަމުން ކީން ހިތްހަމަނުޖެހިއްޖެ
ކީން ވަނީ އާސެނަލް އާއި ޔުނައިޓެޑް މެޗަށް ފަހު ކުޅުންތެރިންގެ އަމަލުތަކަށް ފާޑުކިޔާފައި
މެންޗެސްޓާ ޔުނައިޓެޑްގެ ކުރީގެ ކެޕްޓަން ރޯއި ކީން
ވަރުގަދަ ދެ ޓީމު މުހިންމު މެޗަކަށް ނުކުތުމުގެ ކުރިން ޓަނަލްގައި ކުޅުންތެރިން މާ ރަހުމަތްތެރިކޮށް އުޅޭތީވެ މެންޗެސްޓާ ޔުނައިޓެޑްގެ ކުރީގެ ކެޕްޓަން ރޯއި ކީން ހިތްހަމަނުޖެހުން ފާޅުކޮށްފި އެވެ.
ސްކައި ސްޕޯޓްސްގެ އެންލިސްޓެއްގެ ގޮތުގައި މެޗުތަކަށް އޭނާގެ ހިޔާލު ފާޅު ކުރަމުން އަންނަ ކީން މިފަދައިން ވާހަކަ ދެއްކީ ޕްރެމިއާ ލީގުގައި ރޭ އޭނާގެ ކުލަބު މެންޗެސްޓާ ޔުނައިޓެޑް އަތުން ބަލިވި މެޗަށްފަހު އެވެ.
އަޔަލޭންޑްގެ ވެސް ކެޕްޓަންކަން ކުރި ކީން އަކީ ޔުނައިޓެޑުގެ އެންމެ ކާމިޔާބު ކެޕްޓަނެވެ. އަދި އޭނާ ކުޅުނު 90ގެ ތެރޭގަ އާއި 2000ގެ ކުރީކޮޅު ޔުނައިޓެޑާއި އާސެނަލްގެ މެޗުތަކުގައި ފެނިގެންދިޔައީ ކުލަބަށްޓަކައި ''މަރު''ދިންތަނެވެ.
އާސެނަލް ޔުނައިޓެޑް މެޗާ ބެހޭ ގޮތުން ވާހަކަ ދައްކަން ސްކައި ސްޕޯޓްސް ސްޓޫޑިއޯގައި ކީންއާއެކު އިހަށްދުވަހު ކުޅުން ހުއްޓާލި ކުޅުންތެރިން ތިއްބެވެ. މިހެންވެ ކީން ބުނީ އޭނާގެ މުސްކުޅި ހިޔާލާމެދު ނުރުހުން ނުވަތަ ހިޔާލުތަފާތުވާނަމަ އާސެނަލް އަށް ކުރިން ކުޅުނު ތިއޯ ވޮލްކޮޓް ފަދަ ޒުވާނުން އެކަން އޭނާ އަށް ކިޔައިދިނުމަށް އެދޭ ކަމަށެވެ.
