ފިނޭގައި ބޯހިޔާވަހިކަމުގެ މައްސަލަ ހައްލުކޮށް، މަގުތައް ޒަމާނީ ފެންވަރަކަށް ހަދާނަން – ރައީސް
3 ސެޕްޓެމްބަރު 2023 | އާދީއްތަ 12:11ޒުވާނުންނަށް ކުޅިވަރު ކުޅެވޭނެ ވަސީލަތްތައް ގާއިމް ކުރެއްވުން
ރައީސް ސާލިހް ފިނޭއަށް ވަޑައިގެން، ރައްޔިތުންނާ ސަލާމް ކުރައްވަނީ
ހދ. ފިނޭގެ ބޯހިޔާވަހިކަމަށް ހައްލު ގެނައުމަށް އަންނަ ދައުރުގައި ފުލެޓް އަޅުއްވާނެ ކަމަށާއި، މަގުތައް ޒަމާނީ ފެންވަރަކަށް ހައްދަވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ހދ އަތޮޅުގެ ރަށްތަކަށް ކުރައްވަމުން ގެންދަވާ ކެމްޕޭން ދަތުރުފުޅުގެ ތެރެއިން، ފިނޭގައި ވާހަކަފުޅުދައްކަވަމުން ރައީސް ވިދާޅުވީ، ބާކީކޮށްފައި އޮތް ފެނާއި ނަރުދަމާގެ މަސައްކަތް ނިމިއްޖެކަމަށާއި، އިންޖީނުގެއާއި ފެނަކަ އައު އޮފީސް ނިމިއްޖެ ކަމަށެވެ. ރައީސް ވިދާޅުވީ އަދިވެސް އެތައް ކަންތައްތަކާއެކު ފިނޭ ވަނީ ބަދަލުވެފައި ކަމަށެވެ.
ރައީސް ވިދާޅުވީ މި ގެންނަ ބަދަލުތަކަކީ މީހުންނަށް އިހުސާސް ނުވެދާނެ ކަންކަން ކަމަށެވެ. ފެނާއި ނަރުދަމާ އޮންނަނީ ބިމު އަޑީގައި ކަމަށާއި، އަބަދުވެސް ފެންނަނީ އުސްކޮށް ނަގާފައި ހުންނަ އިމާރާތް ކަމަށެވެ. ރައީސް ވިދާޅުވީ މިކަމުގައި މުހިންމީ މީހާއަށް އަންނަ ބަދަލު ކަމަށެވެ.
ރައީސް ވިދާޅުވީ އިންތިޚާބުގައި ވާދަކުރައްވާ ކެންޑިޑޭޓުންނާމެދު ވިސްނަންޖެހޭ ކަމަށެވެ. އިންތިޚާބުގައި ވާދަކުރައްވާ ހުރިހާ ބޭފުޅުންނަކީ ކުރީ ސަރުކާރުތަކުގައި ނުފޫޒުގަދަ މަގާމުތަކުގައި ތިއްބެވި ބޭބޭފުޅުން ކަމަށާއި، މިހާރު ނުކުމެ ވިދާޅުވަނީ އަނިޔާވެރިކަން ނައްތަވާލައްވައި ހަމަޖެހޭ ތަނަކަށް ހައްދަވާ ވާހަކަ ކަމަށެވެ. ރައީސް ވިދާޅުވީ މިހާރު އެ ވާހަކަ ދައްކަވާ ބޭބޭފުޅުންގެ ސަރުކާރުގައި މީހުން ހިފައި ހައްޔަރުކޮށް ޖަލަށް ލެވުނު ކަމަށެވެ.
ރައީސް ވިދާޅުވީ، ގެންދަވަނީ ހައްލު ހޯއްދަވައިދެއްވައި، ރައްޔިތުންނާ ވާހަކަދައްކަވައިގެން ކަންކަން ކޮށްދެއްވަމުން ކަމަށެވެ. އަދި ކުރިއަށް އޮތް ތަނުގައިވެސް ކަންކަން ކުރައްވާނީ އެގޮތަށް ކަމަށާއި، ސިޔާސަތަކީ އެއްވެސް ރަށެއް ބާކީ ނުކުރެއްވުން ކަމަށެވެ.
ރައީސް ވިދާޅުވީ، ފިނޭގެ ތަރައްގީއަށްޓަކައި ކުރިއަށް އޮތް ދައުރުގައި ކުރަންޖެހޭ ކަންކަން އެބަހުރި ކަމަށެވެ. އެގޮތުން މަގުތައް ޒަމާނީ ފެންވަރަށް ހައްދަވައިދެއްވައި، ތާރުއަޅުއްވައި، ބޯހިޔާވަހިކަމަށް ފުލެޓް އިމާރާތްކޮށްދެއްވާނެ ކަމަށެވެ. އަދި ޒުވާނުންނަށް ކުޅިވަރުކުޅޭނެ ވަސީލަތައް ގާއިމްކޮށްދެއްވައި، މޫދަށް އެރޭނެސަރަހައްދެއް ހައްދަވައިދެއްވާނެ ކަމަށެވެ.
ރައީސް ވިދާޅުވީ އިތުރު ކަންކަން ކައުންސިލާ ވާހަކަދައްކަވައިގެން ހުށަހަޅުއްވާނެ ކަމަށާއި، ރައްޔިތުން އެދޭ ކަންކަން ކޮށްދެއްވާނެ ކަމަށެވެ.
