ރާއްޖޭގެ ޚާރިޖީ ސިޔާސަތު އޮންނާނީ އިސް އުފުލޭ ސިޔާސަތެއްގެ ގޮތުގައި ކަމަށާއި ޚާރިޖީ ކަންކަމާއި ބަސްކިޔާނެ ބަޔަކީ އަޅުގަނޑުމެން ދިވެހިން ކަމަށް ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ބަހުސްގައި ޚާރިޖީ ސިޔާސަތާ ގުޅޭގޮތުން ވާހަކަފުޅުދައްކަވަމުން ޚާރިޖީ ސިޔާސަތު މިހާރުވެސް ބައްޓަންކޮށް ކުރިއަށް ގެންދަނީ ޑިމޮކްރަސީ ކުރިއަރުވާ އިންސާނީ ޙައްޤުތައް ކުރިއެރުވޭނެ ގޮތަކަށް ކަމަށް ރައީސް ވިދާޅުވިއެވެ. އަދި ތިމާވެށި ހިމާޔަތްކުރުން ފަދަ ކަންކަމުގައި ޤައުމުތަކާއި އެކުގައި މަސައްކަތް ކުރައްވަމުން ގެންދަވާކަން އެމަނިކުފާނު ފާހަގަކުރެއްވިއެވެ. ފާއިތުވި 5 އަަހަރު 180 އަށް ވުރެ ގިނަ ޤައުމާއި އެކުގައި ޑިޕްލޮމެޓިކް ގުޅުން ޤާއިމްކުރެވި، 80 އަށް ވުރެ ގިނަ ޤައުމަށް ވިސާއާ ނުލާ ދަތުރުކުރެވެން ފަށާފައިވާ ކަމަށް ރައީސް ޞާލިހު ވިދާޅުވިއެވެ.

މީގެ އިތުރުން އަރަބި ޤައުމުތަކާއި އެކުގައި ގުޅުން ކަނޑާލާފައި އޮތް އޮތުން ބަދަލުކޮށް، ކޮމަންވެލްތަށް އަލުން ރުޖޫއަވެ، ޔޫރަޕިއަން ޔޫނިއަނާ އެކު ގާތް ގުޅުމެއް މި ދައުރުގެ ތެރޭގައި އުފެދިގެން ގޮސްފައިވާ ކަމަށް ރައީސް ވިދާޅުވިއެވެ. އަދި އިނގިރޭސިވިލާތާއެކު ފްރީޓްރޭޑް އެއްބަސްވުމެއް އެކުލަވާލުމުގެ މަސައްކަތް މިހާރު ކުރިއަށްދާކަމަށް ވެސް ރައީސް ވިދާޅުވިއެވެ. ރައީސް ޞާލިހު ވިދާޅުވީ ރާއްޖޭގެ ޚާރިޖީ ސިޔާސަތު ބައްޓަންކުރައްވާނީ ރާއްޖެ އަށް އެންމެ ފައިދާ ހުރި ގޮތަށް ކަމަށެވެ.

ރާއްޖެ އާއި ޗައިނާއާ ދެމެދު އޮތް ގުޅުން ހީނަރުކަމަށް ބުނާ ވާހަކަތަކަށް ވެސް އެމަނިކުފާނު ވަނީ ރައްދުދެއްވާފައެވެ. ޗައިނާއާ އެކުގައި އޮތީ ވަރަށް ގާތް ގުޅުމެއް ކަމަށް ރައީސް ވިދާޅުވިއެވެ. މިހާރުވެސް ޗައިނާ އިން ރާއްޖެ އަށް ގިނަ އެހީތައް ލިބޭކަން ފާހަގަކުރައްވާ ރައީސް ވިދާޅުވީ އައްޑޫގައި ހިންގާ ޓުއަރިޒަމް ޕްރޮޖެކްޓް ވެސް ހިންގަނީ ޗައިނާގެ ކުންފުންޏަކުން ކަމަށެވެ.

އިތުރަށް ވާހަކަފުޅު ދައްކަވަމުން ރައީސް ވަނީ ޗައިނާ އިން ރާއްޖޭގައި ޗައިނާ މޯލްޑިވްސް ފްރެންޑްޝިޕް ބްރިޖް ކާމިޔާބުކަމާއެކު ޤާއިމްކޮށްފައި ވަނިކޮށް ތިލަމާލެ ބްރިޖުގެ މަސައްކަތް އިންޑިއާގެ ކުންފުންޏަކާއި ހަވާލުކުރެއްވީ ކީއްވެތޯ ގިނަ ބަޔަކު ދަންނަވަމުންދާ ސުވާލަށް ޖަވާބުދެއްވާފައެވެ. ރައީސް ވިދާޅުވީ ތިލަމާލެ ބްރިޖްގެ މަސައްކަތަކީ އެގްޒިމް ފައިނޭންސްގެ ދަށުން ހިންގާ ޕްރޮޖެކްޓަކަށް ވުމުން އެ ޕްރޮޖެކްޓް ހިންގަން ޖެހެނީ ފައިސާ ދޭ ޤައުމުގެ ކުންފުންޏަކުން ކަމަށެވެ.

ރާއްޖޭގެ ޚާރިޖީ ސިޔާސަތަކީ އިންޑިއާ ފަރސްޓް، ވަން ޗައިނާ ސިޔާސަތު ކަމަށާއި، އެއީ ހެނދުނު ފުރައްސާރަކޮށް، ހަވީރު ފިރުމާގޮތަށް އޮތް ސިޔާސަތެއް ނޫން ކަމަށް ރައީސް ވަނީ ވިދާޅުވެފައެވެ.