ކޮންމެ ކަމެއްގައި ނުކުމެ ސަރުކާރާ ދެކޮޅުވުމަކީ އަދި ޑިމޮކްރަސީއެއް ނޫން: ރައީސް

ކޮންމެ ކަމެއްގައި ނުކުމެ ސަރުކާރާ ދެކޮޅުވުމަކީ އަދި ޑިމޮކްރަސީއެއް ނޫންކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅުދައްކަވަމުން ރައީސް ވިދާޅުވީ، ސަރުކާރަށް ނިސްބަތްވާ މެމްބަރުން މަސައްކަތް ކުރައްވަންވާނީ ސަރުކާރުގެ ސިޔާސަތުތައް ތަންފީޒުކުރެއްވުމަށް ކަމަށެވެ.

އެމަނިކުފާނު މެމްބަރުކަމުގައި ހުންނެވިއިރުވެސް އެ ރޫހުގައި މަސައްކަތް ކުރައްވާފައި ވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ، މެނިފެސްޓޯ ތަންފީޒުކުރުމަށްޓަކައި މަޖިލީހުގެ މެޖޯރިޓީ ސަރުކާރާ އެއްކޮޅަށް އޮތުން މުހިއްމު ކަމަށާއި، މަޖިލީހުން އެ މަސައްކަތުގައި މުހިއްމު ދައުރެއް އަދާކުރާ ކަމަށެވެ.

މިސާލެއްގެ ގޮތުން ރައީސް ވަނީ، ކޮވިޑުގެ ބަލިމަޑުކަމުގެ ހާލަތަށް އަލިއަޅުއްވާލައްވާފައެވެ. މިއަދު މަޖިލީހާއި، ވިޔަފާރިވެރިންނާއި، ދީނީ އިލްމުވެރިންނާއި، ސިއްހީ އަދި އެކި ދާއިރާތަކުގެ އެހީގައި އެކަމުން އަރައިގަނެވިފައި ވާކަމަށް ރައީސް ވިދާޅުވިއެވެ.

ރައީސް ވިދާޅުވީ، މަލްޓި ޕާޓީ ޑިމޮކްރަޓިކް ނިޒާމެއްގައި މަޖިލީހުގެ މެޖޯރިޓީ ސަރުކާރާ އެއްކޮޅަށް އޮތުން މުހިއްމު ކަމަށެވެ.

އޭގެ އިތުރުން، ކޮންމެ ކަމެއްގައި ނުކުމެ ސަރުކާރާ ދެކޮޅުވުމަކީ އަދި ޑިމޮކްރަސީއެއް ނޫންކަމަށްވެސް އެމަނިކުފާނު ވިދާޅުވިއެވެ.

ރައީސް ވިދާޅުވީ، މި ވޭތުވެދިޔަ 5 އަހަރުގެ ތެރޭގައި ގިނަ މަސައްކަތްތަކެއް ކުރެވިފައިވާ ކަމަށެވެ.

ސަރުކާރުން ގިނަ މަސައްކަތްތައް ކުރެވިފައިވާއިރު އެމަނިކުފާނު އެންމެ ފަޚުރުވެރިވެވަޑައިގަންނަވާ ކަމަކީ ހިލޭ ޑިގްރީގެ ދަށުން ޒުވާނުންނަށް ފަހިކޮށްދެއްވި ފުރުސަތުތައް ކަމަށް ރައީސް ވިދާޅުވިއެވެ.

ދެވަަނަ ކަމެއްގެ ގޮތުން ރައީސް ފާހަގަކުރެއްވީ މުޖުތަމައުގެ އަމަންއަމާންކަން ގާއިމުކުރުމަށް ސަލާމަތީ ބާރުތައް މެދުވެރިކޮށް ކުރެވުނު މަސައްކަތްތަކެވެ. އެ މަސައްކަތުގެ ދަށުން މަގުމަތީގެ އަމާންކަން ގާއިމު ކުރެއްވުނުކަން ރައީސް ފާހަގަކުރެއްވިއެވެ.

ދައުރުތެރޭގައި ބޭނުންފުޅުވެ، ނުކުރެއްވުނު އެއް ކަމަކީ ރާއްޖޭގައި ބައިނަލްއަގުވާމީ މުބާރާތެއްކަމަށްވާ އައިޖޯއައިޖީ ބޭއްވުން ކަމަށާއި، ދެވަނަ ދައުރެއްްގައި އެކަން ކުރައްވާނެކަމަށް ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގައި ވޯޓް ދެއްވާއިރު އެމްޑީޕީގެ ސިޔާސަތުތަކާއި އެހެން ކެންޑިޑޭޓުންގެ ސިޔާސަތުތައް މިނެކިރަންޖެހޭނެ ކަމަށާއި، އަދި އެމްޑީޕީން ގެންގުޅޭ ސިޔާސަތުތައް އެހެން އެއްވެސް ބޭފުޅަކަށް ހުށަނޭޅުއްވޭނެ ކަމަށް ރައީސް ވިދާޅުވެފައިވެއެވެ.