ލޯނަކީ ރަނގަޅަށް އިންވެސްޓް ކޮށްފިނަމަ ދަރަންޏެއްގެ ގޮތުގައި ބެލޭނެ އެއްޗެއް ނޫން: ރައީސް ސާލިހު

ލޯނަކީ ރަނގަޅަށް އިންވެސްޓް ކޮށްފިނަމަ ދަރަންޏެއްގެ ގޮތުގައި ބެލޭނެ އެއްޗެއް ނޫން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ހޮނިހިރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅު ދައްކަވަމުން، ރައީސް ވިދާޅުވީ، ގައުމުގެ އިގްތިސާދާއި ރިޒާވަށް ބެލުމަށްފަހު، ލޯނަކީ ބައެއް ފަހަރު ނަގަންޖެހޭ އެއްޗެއް ކަމަށެވެ. އަދި އެ ލޯނު ރަނގަޅަށް އިންވެސްޓް ކުރާނަމަ އެއީ ދަރަންޏެއް ކަމަށް ނުބެލެވޭނެ ކަމަށެވެ. ނަމަވެސް އެލޯނުން ފައިސާ ނަގައި ޚަރަދުތައް ކުރާނަމަ އެއިން ނޭދެވޭ އަސަރެއް ކޮށްފާނެ ކަމަށް ރައީސް ވިދާޅުވިއެވެ.

Advertisement

ކޮވިޑް-19ގެ ހާލަތަށް އިޝާރާތް ކުރައްވައި ރައީސް ވިދާޅުވީ، މި ސަރުކާރުން ލޯނު ނެގީ ކޮވިޑްގެ ހާލަތާ ގުޅިގެން ދައުލަތުގެ ރިޒާވްގައި ފައިސާ މަދުވެ، މަޖުބޫރުވުމުން ކަމަށެވެ. އެ ހާލަތުގައި ވިޔަފާރިވެރިންގެ ޚިޔާލު ހޯއްދެވިކަންވެސް ރައީސް ފާހަގަކުރެއްވިއެވެ. ރައީސް ވިދާޅުވީ އެދުވަސްވަރު ލޯނު ނުނެގިނަމަ ރާއްޖޭގެ އިގްތިސާދު ނުހިފެހެއްޓޭނެ ކަމަށާއި، މުޅި ރާއްޖެ އިނދަޖެހިދާނެ ކަމުގެ ބިރު އޮތްކަމަށެވެ.

ރައީސް ވިދާޅުވީ މިސަރުކާރުން މަސައްކަތް ކުރަމުންދާ ގޮތް ކޮންމެ ހަފުތާއަކު ހާމަކުރަމުން ގެންދާ ކަމަށާއި، އެފައިސާ އަނބުރާ ދައްކާނެ ގޮތްތައް ވަރަށް ތަފްސީލުކޮށް ލިޔެފައިވާ ކަމަށެވެ. އަދި ދައުލަތުގެ އާމްދަނީ ކުރިއަރާވަރަށް ބަލާއިރު އެއްވެސް ކަހަލަ ދައްޗެއް ނެތް ކަމަށާއި، ކުރިއަށް އޮތް ފަސް އަހަރުގެ ތެރޭގައި ލޯނުގެ ބޮޑުބައެއް ދައްކައި ނިންމާލެވޭނެ ކަމަށް އެމަނިކުފާނު ވިދާޅުވިއެވެ.

ބޭރުގެ ގައުމުތަކުގެ ހިލޭ އެހީއަށް އިޝާރާތް ކުރައްވައި ރައީސް ވިދާޅުވީ، ކުރިއާއި މިހާރަށް ބަލާއިރު ހިލޭ އެހީ ލިބޭ މިންވަރު މިހާރު މަދު ކަމަށެވެ. ނަމަވެސް މިހާރު އެހީ ލިބޭ ގައުމުތައް އިތުރުވެފައިވާ ކަމަށާއި، ރާއްޖެއަކީ ޕްރޮމޯޓް ވެފައިވާ ގައުމެއް ކަމަށް ރައީސް ވިދާޅުވިއެވެ.

ރައީސް ވިދާޅުވީ ރާއްޖެއަކީ މިއަދު ޑިވެލޮޕިންގ ގައުމެއް ކަމަށެވެ. އެގޮތުން މިހާރު ވެސްޓަރން ޔޫރަޕިއަން ގައުމުތަކުންނާއި، ގަލްފުގެ ގައުމުތަކުން އަދި މިޑްލް އީސްޓްގެ ގައުމުތަކުން އެހީ ލިބޭކަން ރައީސް ފާހަގަކުރެއްވިއެވެ.