އަންނަ ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00 އާ ދެމެދު ކެމްޕޭން ޖަގަހަ ހުޅުވާފައި ބެހެއްޓުމަކީ މަނާކަމެއް: އީސީ
1 ސެޕްޓެމްބަރު 2023 | ހުކުރު 13:54މަނާގަޑީގައި ކެމްޕޭން ޖަގަހަ ހުންނަންޖެހޭނީ ބަންދުކޮށްފައި
އިންތިޚާބާ ބެހޭ މަރުކަޒު
އަންނަ ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00 އާ ދެމެދު އެއްވެސް ކެންޑިޑޭޓެއްގެ ކެމްޕޭން ޖަގަހައެއް ހުޅުވާފައި ބެހެއްޓުމަކީ ހުއްދަ ކަމެއް ނޫން ކަމަށް އިލެކްޝަން ކޮމިޝަން (އީސީ)ން ބުނެފިއެވެ.
އީސީގެ ނާއިބު ރައީސް އިސްމާއީލު ހަބީބު ވިދާޅުވީ 2023 ސެޕްޓެމްބަރު 8 ވާ ހުކުރު ދުވަހުގެ އިރުއޮއްސި 6:00 އިން ފެށިގެން، ސެޕްޓެމްބަރު 10 ވާ އާދީއްތަ ދުވަހުގެ ހެނދުނު 6:00 އާ ދެމެދު، ސިޔާސީ ޕާޓީއެއްގެ ނުވަތަ އެއްވެސް ކެންޑިޑޭޓެއްގެ ކެމްޕޭން ޖަގަހަ އެއް ހުޅުވާފައި ބެހެއްޓުމަކީ، ހުއްދަ ކަމެއް ނޫންކަން، ރިޔާސީ ކެންޑިޑޭޓުންގެ ރަސްމީ އިންތިޚާބީ އޭޖެންޓުންނަށް ކޮމިޝަނުން އަންގާފައިވާ ކަމަށެވެ. އަދި މަނާގަޑީގައި ކެމްޕޭން ޖަގަހަ ހުންނަންޖެހޭނީ ބަންދުކޮށްފައި ކަންވެސް އަންގާފައިވާ ކަމަށް ހަބީބު ވިދާޅުވިއެވެ.
އިންތިޚާބަށްވަމުންދާ ތައްޔާރީތަކާއި ގުޅޭގޮތުން ހަބީބު ވިދާޅުވީ ރިޔާސީ އިންތިޚާބު 2023 ގެ ވޯޓުލާ މަރުކަޒުތަކަށް ފޮނުވަންޖެހޭ ލިޔެކިޔުންތަކާއި، ސެކިޔުރިޓީ ސާމާނު ހިފައިގެން، ކޮމިޝަންގެ އޮފިޝަލުން، ދިވެހިފުލުހުންގެ އެހީތެރިކަމާއެކު، ދެކުނުގެ އަތޮޅުތަކަށް ގޮސްފައިވާ ކަމަށެވެ. އަދި މާލެއަތޮޅު ފިޔަވައި، ރާއްޖޭގެ ހުރިހާ އަތޮޅަކަށް ފޮނުވަންޖެހޭ ތަކެތި ފޮނުވާ ނިމިފައިވާ ކަމަށް އޭނާ ވިދާޅުވިއެވެ. އަދި މާލެ އަތޮޅަށް ތަކެތި ފޮނުވަން ހަމަޖެހިފައިވަނީ ސެޕްޓެމްބަރު 4 ގައި ކަމަށް ހަބީބު ވިދާޅުވިއެވެ.
ސެޕްޓެންބަރު މަހުގެ 09 ވަނަ ދުވަހު ބާއްވާ ރިޔާސީ އިންތިޚާބުގައި މުޅި ޖުމްލަ 574 ވޯޓު ފޮށި ބަހައްޓާނެ އެވެ. އެއީ މާލެ ސަރަހައްދުގައި 176 ވޯޓު ފޮށި، މާލެ ފިޔަވައި ސިޓީތަކާއި އަތޮޅުތަކުގައި 384 ވޯޓު ފޮށި، ސިނާއީ މަސައްކަތް ކުރާ ތަންތަނާއި ޖަލުތަކުގައި 6 ވޯޓު ފޮށި، ރާއްޖެއިން ބޭރުގައި 8 ވޯޓު ފޮށި ބަހައްޓާނެއެވެ.
މީގެ އިތުރުން ރާއްޖެއިން ބޭރުގެ ފަސްގައުމެއްގައި ވޯޓު ފޮށި ބެހެއްޓުމަށް ވަނީ ނިންމާފައެވެ. އެއީ ސްރީލަންކާ، އިންޑިއާ، މެލޭޝިޔާ، އިނގިރޭސިވިލާތް އަދި އަބޫދާބީ ގައެވެ. އެގޮތުން ސްރީލަންކާގައި ދެ ވޯޓު ފޮށި، މެލޭޝިޔާގައި 3 ވޯޓު ފޮށި އަދި އެހެން ކޮންމެ ގައުމެއްގައި އެއް ވޯޓު ފޮށި ބެހެއްޓުމަށް ވަނީ ނިންމާފައެވެ.
